Kaaina te Katauraoi ibukin Okin Kristo
Wewete ao waaki tabeua are ti karaoa iai ana mwakuri te Atua e katauraoira n te aro ae okoro ni kaitibo iai ma te Tia kamaiu.
Tabeua namwakaina n nako, Ngke I tabe n teitei n te ruu teuana e a mwananga irarikiu Unimwaane Neil L. Andersen. I a bon tibwa weteaki n te tai anne bwa te Mataniwi ni Kabuta. Tao e namakinna ae iai namakinan te aki tau irou, e ngare ao n taku, “Taraan ae iai te mwaane ae aki ataia bwa tera ae na karaoia.”
Ao I iangoia, “Bon iai te burabeti ao te tia mamata n koaua.”
E wirikiriki imwiina Unimwaane Andersen, “Tai raraoma, Unimwaane Shumway. E na nakoraoi—inanon nimaua ke onoua te ririki.”
Ko a tia n iangoia bwa bukin tera ti tuangaki bwa ti na karaoi bwaai inanon abanuean te Atua ae taraa n riaon ara konaa? Ma kairoro n te maeu aei, ko a tia n titiraki bwa bukin tera ti kainanoi wewete inanon te Ekaretia? Eng, I a tia.
I karekea te kaeka n te maungatabu n kabuta ngke e kangai Beretitenti Russell M. Nelson, “Aio bon te tai ibukim ao ibukiu ni katauraoi ibukin Kauoakin ara Uea ao ara Tia Kamaiu, Iesu te Kristo.” Ngke e taekina aio Beretitenti Nelson, e reireiai te Tamnei bwa ngkana ti ira buakon ana mwakuri te Atua, ti katauraoira ma tabeman ibukin okin Kristo. Ana berita te Uea bon te wewete ae katitiika n te aro are wewete, mwakuri n kaakawaki, te mwakuri n te tembora, irirakin wirikiriki, ao tabeua kawai ake ti karaoi iai ana mwakuri te Atua e katauraoira nakon kaitibora ma te Tia Kamaiu.
E Kukurei Te Atua Ngkana Ti Karaoa n Ana Mwakuri
N ”kakannaton te tai aio,” ngkana e rababanako Abanuean te Atua ao a kaona te aba tembora, iai rakan kainanoaia aomata aika a kukurei ibukin karaoan ana mwakuri te Atua. Te mwakuri ni kakeako bon kakawakin te aro n reirei iroun Kristo. Ma e kangaanga reken tain te beku. Anne bukina I mataiakini ngkami ana reirei aika kam kawakin berita, ni ikotaki ma ara mitinare aika a tangiraki, ake kam katannakoi nanomi ao katakimi bwa kam na beku ibukin te Atua man ami beku ibukiia Natina. Te Atua e kukurei ni “karineia [ake a beku Ibukina] inanon te raoiroi.” E berita, “E na korakora kanuanga[mi] ao e na akea tokin mimitongi[mi].” Ngkana ti taekina eang nakon te beku, ti taekina eang nakon Iesu Kristo. Ao ngkana ti taekina eang nakon Kristo, ti taekina eang nakon te kabanea n kaubwai n maeu ae konaa n reke.
I reiakina te reirei aio ngke I mwakuri ao n reirei taekan te Chemical Engineering n te kuura ae rietata. I tuangaki bwa N na riki bwa te tia baairea waaki ni kakukurei ibukin aia uoote aika tuai iein. Bon te bwai ae aki raoiroi aio irou. Ma, I butimwaeia, ao e bon kabotu irou n te moantai. Ma n teuana te tai ni te bootaki e anaaki nanon te ataeinaine man arou ngke I tibwatibwai aitikureem. E okioki teniua te tai, ma ana kantaninga bwa n na nooria. A reke nanora n tangira, ao uoua te wiiki imwiina e anganai ana rongorongo ibukin te Mare. Ao ngke, tao e aki rang tawe rikin anne, ao bon ngai are N na bon anga au rongorongo ibukin kan mare, ma te koaua raoi: I raraoma n iangoia bwa ngke I aki butimwaea te wewete ao N na aki kaitibo ma Heidi.
Kainakin te mwakuri bon te kakatauraoi nakon Okin Kristo
Ti waaki n ana mwakuri te Atua tiaki bukina bwa e kainnanoira te Atua ma bukina ti kainnanoa te Atua ao Ana kakabwaia ae korakora. E berita, “Bwa, nooria, N na kakabwaiaia ni kabane naake a mwakuri n au nne ni kurebe.” N na tibwai teniua tuua are e reireia aron kaainakin ana mwakuri te Atua ni kakabwaiaira ao ni buokira ni katauraoira ni kaitibo ma te Tia Kamaiu.
Te moan, ngkai ti kaina ana mwakuri te Atua, ti rikirake nakon “bukin kakoroan nanon kari[kara]”
Ti reiakina te beaten aio n rongorongon te karikibwai. Imwiin boong n beku, E kariaia te Atua rikiraken mwakuri ae karaoaki man taekinan “E bon raoiroi.” E aki taekinna bwa e a tia te mwakuri ke e nakoraoi. Ma are E taekinna bwa iai te rikirake, ao i matan te Atua, e tamaroa anne!
Taian wewete a bon aki kaota ke ni kaboua taun temanna ke kororaoina. Ma, ngkai ti beku ma te Atua n te kawai are e tua, ti rikirake nakon kakoroan nanon karikara.
E kimwareirei n rikirakera te Atua, ao ti riai naba ngaira, e ngae ngkana bon iai naba ara mwakuri ae ti karaoi. N tabetai e kona n akea iroura te korakora ke te konaa n beku inanon weteakira. Ti kona ni beku n ana mwakuri ao ni kamanoi ara koaua rinanon waaki n aron te tataro ao kamatebwaian booki aika tabu. Tamara are i Karawa ae tangirira e aki kabuakakaira ngkana iai nanora ma tiaki kona n karaoa te beku.
Te kauoua, te beku e karietatai mwengara ao ara aro nakon taabo aika tabu are ti na kona n maeukina ara berita.
Te katoto, e karaoaki iroura ara berita bwa ti na ururinga Kristo n taainako, ma te berita aio e maeuakinaki ngkana ti beku ibukiia tabeman. A katobibira wewete ma taai ni “buoka rawawatan temanna, ao e kakoroaki iai nanon ana tua Kristo.” Ngkana ti beku ibukin ae ti tangira te Atua ao n tangiria n maiuakina ara berita, te mwakuri are ti taraia bwa katabetabe man kakua e onikaki nakon te kakukurei ao te ibitaki.
A aki kamaiura otenanti ibukina bwa a kakoroa nanon kainibaaire mai karawa. Ma, ngkana ti maiuakina berita ake a toma ma otenanti aikai, ti riki bwa ai aroia aomata ake a tangiria ni mena i matan te Atua. Te mataata aio e katoki mwarara ni beku ke naano n aki beku. E rikirake ara kakatauraoi ni kaitiboaki ma Kristo ngkana ti katoka titirakinan ana kariaia te Atua ma ti na waaki n titiraki bwa tera ae nano iai te Atua.
Te kateniua, kaainakin ana mwakuri te Atua e buokira ni karekea ana bwain tangira Te Atua ae te Nanoanga ao namakinan Ana tangira ae korakora.
Ti aki karekea boora man karaoakin te mwakuri. Ma, Book aika a tabu e reirei bwa ibukin ara “beku [ti na] karekea ana nanoanga te Atua, bwa [ti] na kamatoatoaki inanon te tamnei, [ni karekean] ana ataibwai te Atua, [ao]… reirei ma mwaakan ao ana kariaia mai iroun te Atua.” Anne bon te mwakuri ae tamaroa!
Ibukin ana nanoanga Te Atua, ara konabwai ao ara aki konabwai bon tiaki oin bukin te wewete ke butimwaean te wewete. E aki kantaningaa te konabwai ae tamaroa te Atua ke te tarena ae onoti bwa ena ira aron Ana mwakuri. Ngkana ngaia anne, Te uea n aine ae Etita e na bon kona n kamauia kain abana, Betero e na bon aki kona n kaira te ekaretia n taai akekei, ao Iotebwa Timiti e bon aki riki bwa te Burabeti ibukin Kaokakin bwaai.
Ngkana ti mwakuri ma te onimaki n karaoi bwaai aika a riaon ara konabwai, ao ana oti ara aaki konabwai. E na bon aki kamwengaraoi aio, ma e bon riai bwa ti aonga n “ataia bwa n ana nanoanga te [Atua], … bwa ti karekea te mwaaka n karaoi bwaai aikai.”
Ti na bon bwaka n taai tabetai inanon ara tai n kabaeaki n ana mwakuri te Atua. Ma i nanon korakorara, e raweira Iesu Kristo. E na raweira Iesu Kristo ao man tabekirakeira bwa ti na namakina te kamauiaki man kabwakara ao maakura ao man namakinan ae ti na bon aki konaa n tau. Ngkana ti katabui ara konabwai aika uarereke, E na kakorakorai te Atua. Ngkana ti anga maiura ibukin Kristo, E na katabuira. Aio bon mwakan te Atua ni bitii bwai man ana nanoanga. Ngkana ti beku, ti rikirake inanon ana akoi n karokoa te tai are ti a tauraoi “n tabekakirake irou te Tama, n tei imatan [Iesu Kristo].”
Buokia Tabeman n Butimwaea ao n Kukurei n Ana Bwai n Tangira ae te Wewete
I aki ataia bwa titiraki raa aika e na titirakinai iai te Tia Kamaiu ngkana I a tei i matana, ma teuana mai buakona e na kangai, “Antai ae ko kairia irarikim?” Wewete bon bwain tangira aika a tabu mai iroun Tamara are I karawa ae na buokira n kairia tabeman ma ngaira nakon Kristo. Ngaia are I a kaoiia taan kairiiri ao ngaira n tatabemaniira n ukoriia riki ma nanora te koraki ake akea weteakiia. Kaungaia ao buokiia bwa a na karaoa ana mwakuri te Atua ni buokiia bwa a na tauraoi imwain okin Kristo.
E bon aki kakaonimaki Ioane n roko n te aro ngke e roko n kawaria ana Bitiobi ao n tuanga bwa iai ana mwakuri te Uea ibukina ae e na karaoia. E kaoa Ioane bwa e na katoka mokona. E ngae ngke e mwaiti te tai are e iangoa iai Ioane ni katoka tangiran te moko mai imwaaina, ma n te tai aio e namakina te mwaaka ae buokia.
Ao imwiin teniua te wiiki, e kawaraki Ioane iroun te beretitenti n te titeiki. N weteia bwa e na beku n te bitiobiriki. E rangin n tounako Ioane. E tuanga ana beretitenti n te titeiki ae e a bon tibwa katoka mokona. Ngkana nanon aio bwa e nang katoka te butiboora n Tabati, e na bon bubura anne nakoina. Ana kaeka te beretitenti n te titeiki ae bebete man iangoaki raoi: “Ioane, I aki tuangko ngai; ma bon te Uea.”
N te aro are e kaeka iai Ioane, “Ngkana ngaia anne, I tauraoi n beku.”
E tuangai Ioane bwa anganano ni beku aikai bon rairakia nakon te maeu n tamnei ibukina ao ana utu.
I tabe n iangoia ngkana ti kamatakiaki, ao n kabwaka n angania te wewete tabeman ake, nakon ara taratara n aomata, a taraa n aki tau ke n aki kororaoi. Ke tao ti tabetabe riki ma kateia ma aia konabai nakon reirein te kekeiaki, n aki mwannanoia bwa ti na kanga n noora bwa e kanga te Tia Kamaiu n karikirakea aia konabwai ake a tara n aki tau ke n tuai n kataaki man anganakia te konaa n beku.
Unimwaane David A. Bednar e reirei bonganan katabeaia man booki aika a tabu n “angania ni kabane [aine] ao mwaane n reiakina tabe[ia], ao n mwakuri.” Ti na kanga ni karaoa aei? Ngkana taan kairiri ao kaaro a anganiia tabemaang bwa a na reiakinna ao n karaoia i bon irouia, a na rikirake man maeureirei. Ngkai te kawai ae bebete tao anganakiia membwa aika a kakaonimaki te kauoua ni wewete, te anga ae rangi tamaroa bon kaoakiia ake ti taku bwa aki konabwai ni beku ao karekea nakoia reiakinaia ao rikirakeia.
Ngke tao e mena rabwatan Kristo ikai, E na bon kawariia aoraki, reireiniia kain te kiraati n te Reirei n Taabati, tekateka ma te teinnaine ae uruaki nanona, ao ni kakabwaiaia ataei. E bon kona n karaoa Oin Ana mwakuri. Ma E maeukina te reirei aio are e anganira bwa ti na mwakuriia ao n reiakinna i bon iroura, ngaia are E kanakoira bwa ti na onea mina.
Man iriran ana mwakuri te Atua e anganira “te kariaia, te konabwai, ao te tabe n tei ibukin te Uea [Iesu Kristo].” Ngkana ti beku ni kaotamwaaka Kristo ma tiaki ngaira, a na kakukurei ara beku. Ngkana tabeman a kitana ara reirei, bowi, mwakuri n kakawari, ke te waaki n ururinga Kristo riki nakon are ana ururingaira, e na rang kakorakoraira te mwakuri.
N te ukeuke ae korakora n tei ibukin te Tia Kamaiu, ti riki ni kaan riki n ai arona. Anne bon te kakatauraoi ae nakoraoi ibukin te tai ae tabu are ngaira aikai n tabemanira nako ti na katorobubua ao n atoatonga ae Iesu bon te Kristo, are I kakoaua bwa bon ngaia, ao Beretitenti Russell M. Nelson bon “bwanana … nakon tabotabon nako te aonnaba” bwa e na buokira “katauraoira … ibukin are e na roko.” N aran Iesu Kristo ae tabu, amen.