Te Bwaintituaraoi mai Karawa ae Korakora: Ana Mwakuri ni Kamaiu Iesu Kristo, Te Mangauti, Kaokan Bwaai

N ririki aika bwakanako, ti kakamatenanoi kiibu man te Baibara n ara reirei man te euangkerio n te karangaira. E anaaki riki nanou nakon kiibu aika a uarereeke. N aron Ioane 11:35—te kabanea n uarereke ni kibu n te Baibara, ti uoua taeka iai—“Tang Iesu.”

Irou ngkai, bwa tangin iesu ma te rawawata ao te kimwareirei e kaota raoi te kakai: e roko n rabwata natin te Atua nakon te aonaaba ao n reirei ni kaineti ma te maiu n rabwata n arona n taainako n roko ao ni kakabwaiaiara.

Ngkana ti takarua n tang n korakai ke ni kimwareirei, e ota ni koaua iai Iesu Kristo. E kona ni kaoti n taai ake ti rangi ni kainnanoa iai bwaaintituaraoi aika a korakora mai karawa: Ana Mwakuri ni Kamaiu Iesu Kristo, Te Mangauti, kaokan Bwaai.

A tang Maria ao Mareta ibukin mwaneia ae Rataro, are e mate. E tang Iesu ibukin ana nanoanga. E kauta Rataro nakon te maiu.

E roko Iesu i Ierutarem n tairikin te Toa Are Te Riao. E tang, e aki kona ni bobotiia Ana botanaomata n aron te moaine nakoia bunna. N te bong aei, E anganiira te kaantaninga Ana Mwakuri ni Kamaiu ngkana ti rawawata n baika a riki.

E tang Uean te nne ni kurebe ao e taku nakon ana tia mwakuri, are nakoira naba ngkai taari ao mwaane n te mwakuri ni kakaawari, “Tera are N na kona n tia ni karaoia ibukin au nne ni kurebe?”

E tei Maria i rarikin te nne ni mate. E karaurau n titiraki Iesu, “Ko aera ngkai ko tang?” E ataia bwa “E tang te aba ni kangaina, ma e kakatonga te aba n te ingabong.” Te Mangauti e uota te kaantaninga ibukia aomata ni kabane.

N aban Bokin Moomon, ngke a teirake aomata aika a bati nakoina, e bwanin kimwareirein Iesu. E tang.

“Ao e anai aia ataei ake a uarereke, temanna imwiin temanna, ao e kakabwaiaia, ao e tataro nakon te Tama i bukiia.

“Ao ngke e a tia ni karaoa aio e a manga tang riki.”i

Aio te Mangauti iroun Iesu Kristo: E katoka takan te nano ao titiraki mai nanora. E kaoi rannimatara, ma tiaki rannimata ni kimwareirei.

Ngkana a onrake nanora, ti kabwarabure n tabetai, ke ti bwainnrang. Ma ataakin Iesu bwa e atai maraki ao kimwareirei n te maiu aei e kona n anganira te korakora nakon are ti konaa i bon iroura ngkai ti rinanon te kangaangan ma kukurein te maiu aei.

I Aberika Maiaki, e tang te karo. Te bwai ae kakaawaki ni maiura, e mate natina te aine ae uarereke. “N na kona ni karaoi bwaai ni kabane bwa N na manga nooria,” e tang ngke I rabwatia ni baiu. I tang naba.

Ni katabuan te Puebla Mexico Tembora, a tinako ranin matan te aine ni kimwareirei. E oti ni moana te onimaki ao te mwakuri ae korakora. E taku, “Todos mis hijos estan aqui en el templo hoy“—”A bane ni mena i nanon te tembora natiu ni kabanen te bong aei.” Bootakia kain te utu n ana auti te Uea e uota te rannimata ni kimwareirei ao ni kakaitau.

N te bobuaka, a un ao ni karaoi bwaai i marenaia utu ao kaain rarikiia. Rannimata a karauaru ni manga karekea te iooki. Ni bwanaana ae ruru, e taku te aine man te kaawa teuana, “Raou, imwain mateu, I kan tuangngko te tabo ae ko kona ni kuneia iai kaain am utu ake a bua.”

A kabaeaki te tia iein te aine ma te tia iein te mwaane n ana auti te Uea. Bon 70 ana ririki neierei, ao ai aron naba teuarei. E a kaman tauraoi nakon te bong aei, te tia mare te aine ae tamaroa. E katiotioa kunikaina ni mare ma te bobotika. A tinako raninmataaa ni kukurei. A kakoroaki nanon ana berita te Atua. A uoti kakabwaia ana berita aika tabu.

N tain kawarakin te aine ae e a tia ni mate buuna, e reiakina te reirei ae tamaroa Boyd K. Packer ngke e kairake. Imwiin unraana ma buuna, e taekini taeka aika a kammaraki te aine aei. E riki te bwai ae karina ike e anaa maiun buuna n te bong arei. “I nanon nimabwi te ririki,” e tang te aine ae mate buuna, “I a tia ni maeka n te maraki ngkai I ataia bwa au kabanea n taeka ake e ongo mai wiiu a rangi ni buakaka, man kammaraki.”

E buokiira manga utin Iesu Kristo ni kaoka arora, kaetiira, ni karaoi reitaki aika a eti, ni iteran te rabuna aika uoua. E kona ni katoka te tang ni wenei Iesu; E kona ni karekea kabwaraan bure. E kona ni kainaomataira ma tabeman man bwaai ake ngaira ao ngaiia a tia n taekinna ke ni karaoi ake a kona n kabaeira iai n te rawawata.

E kona te mangauti ni karekea nakoira namakinan ana kariaia te Atua. E tuangira te aonaaba aio tiaki rang toamaiu n arora nako —tiaki rang wanawana, tikiraoi, ke arora n tamnei ae bon tau. Rinanon te bitaki n tamnei iroun Iesu Kristo, ti kona n tokanikai man aki kororaoi akanne iroun Iesu Kristo.

Ma kimwareirein te mangauti, ti anenea, “E tautoronaki te mate; e a inaomata te aomata. E a tia n tokanikai Kristo.” E kainaomataira man te mate Mangautin Kristo, man mamaarara ao aki taun te rabwata. E kaoka naba arora n tamnei Ana Mwakuri ni Kamaiu Iesu Kristo. E wanako raraana man bwangabwangan kunin rabwatana, raninmatana a raara, ae karekea nakoira te tokanikai man te bure ao te kamaenakoaki. E katiteuanaaki ma ngaira, ni bwanin ao n tabu, i marenara ao te Atua. N bwaai ni kabane aika a tamaroa, e kaoka arora ae korakora Iesu Kristo—tiaki n arona ngkoa ma aika a kona naba n reke.

Maiun ao otan Iesu a kaota koauan Ana tangira te Atua ibukiia natina ni kabaneia. Ibukina bwa e tangiria natina ni kabane te Atua, ae tamara n aia ririki aika a kakaokoro ao n aaba, ti kunea te kakao n tangira bwa ti na roko ni kunea te rau ao te kimwareirei i Rouna n aaro ao katei nako. N taabo, n te taai, antai ngaira, ti tibwaa kinakira mai karawa bwa natii ngaira iroun te TiaKarikibwai. N te aro ae ti tearona ma kaain te Islam, Judaism, ao Kiritian ti tibwa rikira n ara aaro iroun te Tama ae Aberaam ao reitakin berita aika tabu rinanon waaki ake a riki i Aikubita ngkoa.

E roko te Karo ae Aberaam i Aikubita ao e kakabwaiaaki.

Iotebwa, e kabonakoaki nako Aikubita, e ataa miin Barao ae nanona itiua te ririki n uaa n rimwiaki ma itiua te ririki n rongo. E kamaiuia ana utu Iotebwa ao ana botanaomata. E tang Iotebwa ngke e noora ana babaire ae bubura te Atua, ike a mwakuri raoi bwaai ni kabane ibukin te raoiroi ibukiia ake a kawakin aia berita aika a tabu.

Mote, e ikawairake n ana auti Bwarao i Aikubita, rimwi e kaoka te kiing ibukin bobotakian natin te Atua.

Kakoroan nanon te taeka ni burabeti, a kataniia i Aikubita Iotebwa, Maria,ao Iesu te teei. I Cairo, e taku te Muslim ae kakaonimaki: “E reireia te Quran bwa Iotebwa, Maria, ao Iesu te teei a mano ao n rau i abau. E amwarake i abau Iesu ngke e uarereke, e moana iai nakonakona, ao Ana taetae. I abau ikai, ti kakoauaa bwa a baoua n rinano aroka n anganna ma Ana utu kanaia uaanikai. Tikuna i abau e a tia ni kakabwaiaia ara botanaomata ao abara.”

Ana babaire te Atua ibukin te riai ao te inaomata ni karaoan ae riai e anganiira bwa ti na reiakinaki man waaki ake ti rinanona. A roko tabeua reirei aika a korakora ni maiura man bwaai ae ti na bon aki rineia ni karaoia. Inanon te tangira, e ruo rikaaki ao ni waerake Iesu Kristo i aon bwaai ni kabane. E kimwareirei ni korakorara mai karawa ibukin te kakammwakuri ao kakukurei, te akoi n akea kantaningaan te kaniwanga, te onimaki nakon te rairannano ao kabwaraan bure. Ao e tang n rawawata ni korakoran korakaira ngaira aomata, iowawa, aki riai— are e reke man te rinerine n aomata—n arona naba mai karawa ao mairoun te Atua ma ngaiia.

E kakoauaaki man tain te Itita bwa te waaki n tamnei ao ni katiteuanaaki bon mwakoron bannan te mwakuri ni kamaiu mai karawa n te mwakuri ni kamaiu, mangauti, ao kaokan bwaai iroun Iesu Kristo. E roko te katiteuanaaki ae tabu ma ni kanikinaeaki aei tiaki man te bwai ae riki ke man te manennati. Tabatin te Bwaam, te Wiiki ae Tabu, ao te Itita a bukamarua Ana Mwakuri ni Kamaiu Kristo ao Mangautina. N aron te bong, 6 n Eberi ni katoa tai, ti kakauringa katean ao barongaan Ana Ekaretia Iesu Kristo ibukiia Aika Itiaki ni Boong aika Kaitira. Kaokan Bwaai bon bukina ngkai ti ikota te moan Tabati ni katoa Eberi n te maungatabu ni kabuta.

E roko naba Kaokan Bwaai n kaokan te kiing n te nakoanibonga ao te kariaia iroun Iesu Kristo ae manga uti, Mote, Eriati, ao Eria ni katabuan te Kirtland Tembora ae boou n Tabatin te Itita, 1836. N baireana n te bong anne nakon kaokan Ana Ekaretia Iesu Kristo e roko iai ana kariaia ao kakabwaia te Atua ni ikotiia natina, katauraoia natina n oki nakoina, ao ni ikotiia utu ibukin te tai ae akea tokina. E kakoroa nanon te taetae ni burabeti Kaokan bwaai n te bong anne man rikina n te Itita ao te Toa Are Te Riao.

N aron te Kirtland Tembora, I kawari taabo aika a tabu i Ohio ike a noria n te mii ni burabeti te Atua te Tama ao Natina ae Iesu Kristo te Burabeti Iotebwa ao tabeman. E noora tein karawa te Burabeti Iotebwa. I karawa, E “kamaiu ni kabane uaan ana mwakuri baina” n te abanuea ae mimitong. Ma ti naake a “kaakea te Nati i mwin are e kaotia te Tama.”

Ni moanan ana mwakuri i aon te aba, e taekina ana mwakuri Iesu bwa e na kakabwaiaira ni kabane ma ake a kukurei ni butimwaeia—ni katoa tai, n kabane aaba, ao n aro nako. Imwiin 40 te bong n aki mamatam ao ni kataaki n te rereua, e nakon te tinakaoke Iesu ao n wareka, “E mena Tamnein te Uea iaou, bukina bwa e a tia ni kabirai bwa n na tataekina te euangkerio nakoia akana aki kaubwai; e kanakomaiai ni kamaiuia ake a uruaki nanoia, N na tuangiia taenikai te kainaomataaki nakon te tautoronaki, ao akana a mataki te manga nooraba, N kainaomataia akana a uruaki nanoia.”

Kainnano, a uruaki nanoia, tautoronaki, mataki, ikoaki—akanne arora ni kabane.

Ana boki Itaia e reitanako te berita ni meetia n te kaantaninga, kainaomataaki, ao kakoaua: “Ma ni motiki bukiia akana tang i Tion, … n angania te bau ae tamaroa n onea mwin te mannang, te bwa ni kukurei ibukin te tang, te kunnikai ni kamoamoa ibukin tamnein te nanorawawata.

Ngaia are, ti tang n takarua, “N na bati ni kimwareirei iroun te Uea, e na kakatonga tamneiu iroun Atuau; ngkae e kunnikaiai ni kunnikai aika bwain te maiu, e rabunai n te rabuna ae raoiroi.”

Ni katoa tain te Itita, ti bukamaru, bwa kanikinaean, bwaintituaraoi aika a korakora mai karawa rinanon Iesu Kristo—Ana Mwakuri ni Kamaiu, Ngaia (ao te berita ibukin arona) n te Mangauti, Kaokan aron Bwaai n Ana Ekaretia ni boong aika kaitira ma kiingin te nakoanibonga ao te kariaiakaki ni kakabwaiaia natin te Atua ni kabane. Ti kakatonga ni kunnikain te kamaiuaki ao te rabuna n te raoiroi. Ti takaruaea, “Otanna nakon te Atua ao te Tiibu te Teei!”

“Ba E tangiriia aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.”

Ke ti na kunea n ana mwakuri ni kamaiu Iesu, te mangauti, ao kaokaan bwai—te rau, te riki, ao ataakin arora—are bon te keiakimwaaka ni koaua ao ni kimwareirei, kukurei n akea tokina, I tataro n Arana ae tabu, Iesu Kristo, amen.