¿Aguerovia piko?

30 de marzo, ojapo peteĩ ary, pe mitã Ethan Carnesecca, dos años oguerekóva, American Fork, Utah, EE. UU-gua, oike hospital-pe neumonía ha líquido ipulmónpe reheve. Mokõi ára rire ivaive icondición ha ogueraha chupe hikuái helicóptero-pe Hospital Primary Children´s, Salt Lake City-pe. Isy, Michelle, ojepy’apyetereívape oheja hikuái oho asiento tenondeguápe oakompaña hag̃ua chupe. Oñeme’ẽ chupe peteĩ auricular oñe’ẽ hag̃ua umi helicoptero-gua ndive. Ohendukuaa umi médico oñatendévo imemby’íre ha ha’évo ha’ete voi enfermera pediatría-pe, Michelle oikuaa porã Ethan oĩha peligro-pe.

Upe momento hasývape, Michele oñeme’ẽ en cuenta oveveha hína hikuái Draper, Utah Templo ári. Yvate guive omaña pe valle-re ha avei ikatu ohecha pe Jordan River templo, Oquirrh Mountain templo ha jepe Salt lake templo mombyry guive. Ou iñakãme pe pensamiento: ¿Aguerovia piko terã nahániri?

Upe experiencia-gui, ha’e he’i kóva:

“A’aprendekuri templogua jehovasakuéragui ha familiakuéra ikatuha iñeterna, primaria ha Mujeres Jovenes-pe. Akompartíkuri pe mensaje familiakuéra rehegua México-gua hente porãkuérape che misión aja. Ajesella che compañero eterno ndive ko tiempo ha opa eternidad-re pe templo-pe. Ambo’ékuri lección-kuéra familia rehegua ha’érõguare líder Mujeres Jovenes-pe, ha akomparti ñemombe’u familia eterna rehegua che membykuéra ndive noches de hogar-pe. Che aikuaákuri, ha katu ¿aguerovia piko? Pe ñembohovái oĝuahẽ pya’eterei oikehaguéicha pe porandu che akãme: pe Espiritu okonfirma che korasõ ha che akãme pe ñembohovái che aikuaamava’ekue voi: ¡Heẽ, aguerovia!

“Upe momento-pe, añohẽ che korasõ ñembo’épe che Ru Yvagapeguápe, ame’ẽvo aguyje aikuaa ha aguerovia haguére umi familia añetehápe iñeterna. Ame’ẽ chupe aguyje Ita’ýra Jesucristo rehe, ojapova’ekue opa mba’e iposible. Ame’ẽ aguyje che membýre, ha aikuaauka che Ru Yvagaguápe, Ha’e oguerahajeyva’erãramo che membymi Ethan-pe Hóga Celestial-pe, che a’aceptáta. Aconfia plenamente che Ru Yvagaguáre, ha aikuaa ahechajeytáha Ethan-pe. Aimékuri agradecidaiterei upe momento de crisis-pe aikuaahague ha agueroviahague pe Evangélio añeteguaha. Añandu py’aguapy”.

Ethan ohasa heta semana pe hospital-pe, orrecibívo atención médica umi experto-gui. Umi ohayhúva chupe ñembo’e, ayuno ha jerovia, oñembojoajúva upe atención médica reheve, opermiti ha’e osẽ pe hospital-gui ha oho jey hógape ifamilia ndive. Ko’aĝa ha’e hesãi porã.

Upe momento decisívo Michele-pe ĝuarã ha’ékuri peteĩ konfirmasión umi mba’e oñembo’eva’ekue chupe opa hekove aja ndaha’eiha ñe’ẽ añónte; ha’e añetegua.

¿Ñañe’acostumbraiterei piko umi jehovasáre jahupytýva Iglesia de Jesucristo de los Santos de los últimos Dias-pe miembroicha, ha nañakomprende porãi pe discipulado milagro ha tuichakue, Ñandejára tupao añetévape? ¿Ñamopokã piko pe don tuichavéva ikatúva oñeme’ẽ ñandéve ko tekovépe? Pe Salvador voi ombo’e; “Ha neñe’ẽrenduramo che rembiapoukapykuérare ha reho tenonde gotyo ipahaitépeve, reguerekóta vida eterna, ha’éva tuichavéva opa umi Tupã don-gui”.

Ñande jaguerovia ko tupao ndaha’eiha peteĩ tenda porãnte jahahápe domingokue ña’aprende hag̃ua mba’éichapa ha’eva’erã buena persona. Ndaha’éi peteĩ club social cristiano porãnte ikatuhápe jajoaju hente oguerekóva principios morales iporãva ndive. Ndaha’éi peteĩ tuicha idea atýnte tuvakuéra ikatúva ombo’e ita’ýra ha tajyrakuérape hógape oiko hag̃ua chuguikuéra persona buena ha responsable. Iglesia de Jesucristo de los Santos de los Ultimos Dias ha’e infinitamente hetave opa umi mba’égui.

Pepensami sapy’aite umi afirmación pypuku ñaproclamáva religión-cha. Jaguerovia pe tupao Jesucristoite omoĩva’ekue oĩ aja ko yvy’ape ári ojerrestauraha ñande épokape peteĩ profeta rupive oñehenóiva’ekue Tupãre ha ñande liderkuéra oguerekoha pe pu’aka ha autoridad o’actua hag̃ua Ñandejára rérape oguerkova’ekue umi Apostolkuéra ymaguare. Oñehenói pe Tupã Sacerdocio. Japroclama, upe autoridad restaurada rupive ikatuha jarrecibi umi ordenanza salvadora, bautismo-icha, ha jaipuru pe Espiritu Santo don, ñanemopotĩ ha ñanerefináva, oĩ hag̃ua tapiaite ñanendive. Jaguereko apóstol ha profetakuéra odirigi ha oguiáva ko tupao umi Sacerdocio llave rupive, ha jaguerovia Tupã oñe’ẽha Ita’ýra ha tajýrakuérape umi profeta rupive.

Avei jaguerovia ko Sacerdocio pu’aka rupive ikatu jajapo konvenio ha jarecibi umi ordenanza templo marangatukuérape ohejátava algún día jaha jey Tupã rendápe ha jaiko Hendive tapiaite ĝuarã. Avei Japroclama upe pu’aka rupive familiakuéra ikatu ojoaju tapiaite ĝuarã umi pareja oikérõ pe nuevo ha sempiterno konvenio del matrimonio-pe, umi edificio marangatúpe, ñande jagueroviáva ha’eha literalmente Tupã róga. Jaguerovia ikatuha jarrecibi umi ordenanza salvadora ñandéve ĝuarã ha avei ñande ypykuérape ĝuarã oikova’ekue yvy ári oguereko’ỹre oportunidad orrecibi hag̃ua ko’ã ordenanza oñeikotevẽva salvasiõrã. Jaguerovia ikatuha jajapo umi ordenanza ñande ypykuéra favor-pe en forma vicaria umi santo témplope.

Jaguerovia, pe profeta ha Tupã pu’aka rupive jarrecibihague umi Escritura adicional, omoĩvévo itestimonio pe Biblia ndive odeclara hag̃ua Jesucristo ha’eha pe Salvador del mundo.

Japroclama Iglesia de Jesucristo de los Santos de los Ultimos Dias ha’eha Tupã Reino ha pe úniko tupao añetéva ko yvy ári. Oñehenói Iglesia de Jesucristo Ha’e oĩgui a la cabeza; kóva ha’e Itupao, ha opa ko’ã mba’e ikatu oiko Isacrificio expiatorio rupive.

Jaguerovia ko’ã característica distintiva ndaiporiha ambue tenda ni organización-pe ko yvy’ape ári. Iporã ha añetérõ jepe ambue religión-kuéra, ndoguerekói hikuái pe autoridad ome’ẽ hag̃ua umi ordenanza de salvación oĩva disponible pe Iglesia de Jesucristo de los Santos de los Ultimos Dias-pe.

Jaikuaa ko’ã mba’e, ha katu ¿jaguerovia piko? Ko’ã mba’e añeteguáramo, upéicharamo jaguereko pe mensaje esperanza ha pytyvõ rehegua tuichavéva araka’eve ojeikuaava’ekue ko mundo-pe. Jaguerovia umíva ha’e peteĩ mba’e de importancia eterna ñandeve ha umi jahayhúvape ĝuarã.

Jaguerovia hag̃ua ¡jaguerahava’erã pe Evangelio ñane akãgui ñane korasõme! Ikatu simplemente ja’actua mecánicamente javivívo pe evangelio oñeha’arõ haguére jajapo upéicha, terã ha’ehaguére pe cultura jakakuaahaguépe, terã ha’égui peteĩ jepokuaa. Oĩ umi ikatu noñanduiva’ekue pe oñanduva rey Benjamin tavayguakuéra ohendúvove isermón mbarete: “Ha opavave ha’ekuéra he’ijoa peteĩ ñe’ẽme, he’ívo: Heẽ, roguerovia opa ñe’ẽ ereva’ekue oréve; ha avei, roikuaa añeteguaha, pe Ñandejára Ipu’akapáva Espíritu rupive, ojapóva peteĩ tuicha ñemoambue orepype, térã ore korasõme, upévare ndorojaposevéima mba’e vai, ha katu rojapo meméntema pe iporãva’’.

Opavave ñañeha’ãva’erã ñamoambue ñane korasõ ha naturaleza ndajaguerekovéima hag̃ua deseo jasegui hag̃ua umi yvóra rape, ha katu ñakomplase Tupãme. Pe konversión añetéva ha’e peteĩ proceso oikóva peteĩ tiempo puku javeve ha he’ise ñaimeha dispuesto jaipurúvo jerovia. Ou jahekávo umi Escritura-pe jaheka rangue internet-pe. Ou ñaneñe’ẽrendúramo Tupã rembiapoukapykuérare. Konversión ou jaservívo umi oĩva ñande jerérepe. Ou ñembo’e añetéva rupive, jaha py’ỹivo templope ha ñakumplívo umi responsabilidad Tupã oñeme’ẽva’ekue ñandéve. Oikotevẽ constancia ha ñeha’ã ára ha ára.

Py’ỹi oñeporandu chéve; … ¿Mba’épa desafio tuichavéva ombohovakéva mitãrusu ha mitãkuñanguéra ko’ã árape?” Ambohovái chupukuéra, chéve ĝuarã ha’e pe influencia oguerekóva tapiaite hekovekuérape pe “óga tuichapajepéva ha ipyrusúva”. Pe Libro de Mormón ojehaíramo ñande épokape ĝuarã ndaikatúi jahasa rei pe relevancia oguerekóka opavave ñandéve ĝuarã pe visión oguerekova’ekue Lehi pe yvyramáta tekove rehegua ha efecto oguerekóva umi ohechaukáva ikũame ha oñembohorýva pe “óga tuichapajepéva ha ipyrusúva” guive.

Pe itristevéva chéve ĝuarã ha’e pe descripción ojejapóva umi oñeha’ãmava’ekue ohasa hag̃ua umi tatatĩ ypytũva rupive pe tape po’íre, ojejagarra pe barra de hierro rehe ha ohupyty imeta ha oñepyrũ ho’u pe yva potĩ ha hetereíva pe yvyramáta tekove rehegua. Upéi, pe escritura he’i umi yvypóra oñemonde porãva pe óga tuichapajepéva ha ipyrusúvape “ha’etévaicha oñembohorýva ha ohechaukáva ikuãme umi oğuahẽva’ekuépe ha ho’úva hína pe yva.

“Ha ho’u rire hikuái pe yva, otĩ umi oñembohorýva hesekuéragui; ha ho’a tape oñembotovévape ha okañy hikuái”

Ko’ã versículo odescribi umi jaguerekómava pe Jesucristo evangelio ñande rekovépe. Ñanacérõ jepe ipype terã ñañeha’ãva’ekue jaha umi tatatĩ ypytũ rupive jatopa hag̃ua, ja’úma pe yva, ha’éva pe “ojeipotaveha opaitévagui” ha oguereko pe potencial ome’ẽ hag̃ua ñandéve pe vida eterna, “pe tuichavéva opaite Tupã don apytépe”. Javy’a mementeva’erã ha ani ñapena umi oñembohorýva ñande jeroviakuéra rehe terã umi ovy’áva ocrearõ duda terã umi ohekáva falla lider ha doctrinakuéra tupaoguápe. Ha’e peteĩ decisión jajapóva ára ha ára; jaiporavo jerovia duda rangue. Elder M. Russell Ballard he’i: “pepyta pe bote-pe, peipuru pende chaleco salvavidas ha pejejoko mokõi pende pópe reheve”

Ñandejara tupao añetéva miembroicha, ñaiméma pe bote-pe. Natekotevẽi jaheka umi filosofía ko mundopeguápe jajuhu hag̃ua pe añeteguáva ome’ẽtava ñandéve consuelo ha guía ñandegueraha hag̃ua a salvo umi prueba ko tekove rehegua rupive ¡jajaguerekóma!. Ethan sýicha, ikatúva o’examina igueroviakuéra heta tiempopeguare ha he’i confianza reheve peteĩ momento de crisis-pe, “Heẽ, che aguerovia”, ñande avei ikatu jajapo upéicha!.

Ame’ẽ testimonio ñane membresía Ñandejára Reino-pe ha’eha peteĩ don de valor incalculable. Atestifika umi jehovasa ha py’aguapy Ñandejára oguerekóva umi iñe’ẽrendúva ha hekojojávape ĝuarã, ohasa opa mba’e yvypóra akã ikatúva okomprende. Aheja ko testimonio penendive Jesucristo rérape. Amén.