Taura na Yaca i Jisu Karisito.

Eda rawa ni raica kina e lima na veika e tautauvata kei na iwalewale eda taura kina na yaca i Jisu Karisito.

Na imatai ni ka o ya na ivakatakilakila. Ni da sa taura vei keda na yaca i JIsu Karisito, eda sa semata na yacada ki na Yacana. Eda sa vakatakilakilataki vata kei Koya.

Veiwekani voleka ki na ivakatakilakila e dua tale na vosa tautauvata:—ivakananumi. Vei keda, na noda vakaivotavota ena sakaramede e veimacawa sa vukea meda nanumi Jisu Karisito ena loma ni macawa taucoko.

Ena gauna sara mada ga eda ogaoga tiko kina ena veika tale eso, eda na nanumi Koya tikoga, me vaka ga na noda nanuma tu na yacada, se cava ga e vagolei kina noda vakasama.

Basika kina na kena nanumi na veika sa cakava vei keda na iVakabula na ikatolu ni ka tautauvata—na vakatotomuria. Vei keda, na levu ga ni noda vakatakilakilataki vata ka nanumi Jisu Karisito, na levu ni noda vinakata me da vakataki Koya.

Na vakatotomuri Jisu Karisito ena kauti keda yani kina ikava ni ka vakatautauvata— vakataudonutaki keda ki na Nona inaki. Eda duavata kei Koya ena Nona cakacaka.

.Ena noda cakava na va oqo ena kauti keda ki na ikalima ni ka tautauvata—veivakaukauwataki. Eda na rawata na kaukauwa ni Kalou kei na veivakalougatataki ena noda bula.

Nida cakava eso tale na veiyalayalati kei na Kalou, eda sa taura vakataucoko vei keda na yaca i Jisu Karisito. Ena yaco sara, me vakalougatataki keda na Kalou ena Nona kaukauwa.

Lako mai vei Tamada Vakalomalagi. Taura vei iko na yaca i Jisu Karisito. Ena yaco mo sa itaukei vakacerecerei ena matanitu i Tamada mai Lomalagi, mo taukena vata kei na Nona Ulumatua, na noda iVakabula lomani ka Dauveivueti.