O Ira na Parofita ni Kalou

A vakadinadinataka na Turaga vua na yalewa ni Sunemi ni parofita ni Kalou o Ilaisa, ka cakacaka ena dolavi ni nona vale me ciqomi koya.

Sa rawa talega vei keda meda ciqoma e dua na noda dui ivakadinadina baleti ira na parofita ni Kalou nikua ka dolava na yaloda kei na noda vakasama—na noda vale—ki na itukutuku sa vakarautaka tu vei keda na Tamada Vakalomalagi ena veisiga e muri oqo.

Na cava na parofita? Na parofita sai koya na tamata sa kaciva na Kalou me vosa ena Vukuna.

O ira na parofita era sa daurairai ka dauvakatakila. E kena ibalebale oqo ni ra raica na veika era sega ni raica rawa na tamata, ka ra rawa ni parofisaitaka na veika ena yaco ena veisiga ni mataka. Era ciqoma na parofita na ivakaro kei na ivakatakila mai vua na Turaga.

Era vunautaka talega na parofita na kosipeli ka ra sa qasenivuli veivakauqeti ka italai ni Kalou kivei ira na tamata kecega e vuravura.

O ira na parofita era sa vakadinadinataki Karisito—Na Nona bula, Nona ilesilesi, kei na Nona vakalou.

E vakavulica vei keda na marama ni Sunemi ni rawa ni tiko vei keda na ivakadinadina oya mai na Yalo Tabu. Au yalataka vei kemuni ni gauna eda kila kina ni ra sa nona ilumuti na Kalou, ena rawarawa na noda bula veitalia ga na noda bolebole e tomani tiko, ni da na talairawarawa kina domodra ena veidinati, vakabauta, kei na inuinui. Na vakarorogo ka talairawarawa kina domo ni parofita sa ka bibi sara meda tautauri matua tikoga kina veika vinaka me yacova na iKarua ni Lako mai ni noda iVakabula.

Au sa vakavinavinakataka na nodra veidusimaki kei na nodra sasaga vakatabui na parofita bula. Ena dau vaka tu ga kina na Turaga me na digitaki ira na Nona italai.