Era Lewai Ira Ga Vakai Ira

Na inaki taumada ni Veibuli kei na noda bula vakayago oya me vakarautaka vei keda na veimadigi meda cakacaka ka yaco me vakataka sa sureti keda kina na Turaga meda vakataka.

Eda sega ni vakalougatataki ena digidigi dodonu meda cakava na ka ga eda vinakata ena gauna ga eda vinakata kina. Ia, me vaka na ituvatuva nei Tamada, eda sa ciqoma na galala ni digidigi meda vaqara ka cakacakataka vakakina ena dina tawamudu.

A vakabibitaka o Peresitedi Dallin H. Oaks ni kosipeli i Jisu Karisito e sureti keda tu meda kila e dua na ka, ka meda yaco me dua na ka ena kena cakacakataki vakadodonu na galala ni digidigi.

[Ia] ena sega ni rawa ni vakabulai keda duadua ga na noda cakacaka kei na gagadre. “Ni sa oti sara na veika kece eda rawa ni cakava,” eda sa vakaduavatataki walega kei na Kalou ena loloma cecere kei na loloma soliwale e tu ena solibula veisorovaki tawa vakaiyalayala ka tawamudu ni iVakabula.

E vuqa vei keda e namaka beka ni noda rairai ena mata ni itikotiko ni veilewai ni Turaganilewa Tawamudu ena tautauvata ki na valeniveilewai vakavuravura. Ena vakatulewa e dua na turaganilewa. Ena vakaraitaki na ivakadinadina. Ena vakatauci na lewa. Ka da na rairai veilecayaki ka rere tu me yacova ni da kila na kena macala e muri. Ia au vakabauta ni ivakaraitaki vaka oqori e sega ni donu.

Na rerevaka na Turaga e sega ni dua na noda kau yani ena lomalomarua ki na Nona iserau meda lewai. Ia, sa ikoya na noda rawa ni ciqoma vakai keda na veika baleti keda “na veika ni kedra ituvaki dina“ kei na “ituvaki dina ni veika ena qai yaco mai.“

Kena itinitini, eda na dui lewai keda ga vakai keda. Ena sega ni gadrevi me dua e tukuna vei keda na vanua meda gole kina. Ena iserau ni Turaga, eda na ciqoma na veika eda sa digitaka meda yacova e vuravura ka kila vakai keda na vanua e dodonu meda tiko tawamudu kina.