Vakaisulutaki vata na iTovo Savasava ni Yalomatua

E kaya na Turaga:

“Ia sa rawa walega mera vakaitavi kina ko ira era sa yalomalumalumu ka dauloloma, ko ira sa tu vei ira na vakabauta, na inuinui kei na loloma, io ko ira sa yalomatua ena ka kecega era sa vakaitavi kina.”

Na veidusimaki ni iVakabula, ka volai ena ivakatakila tabu oqo, e vakananuma vei keda ni ivalavala malua e sa veivaqaqacotaki bibi ki na dua na yavu tudei vei Jisu Karisito.

Ena maliwa ni ivakarau ka ukutaka na tisaipeli dina i Karisito, na ivalavala malua e tu me ivakaraitaki ni iVakabula Vakataki Koya, e dua na vua talei ni Yalotabu, ka vakarautaki kivei ira kece era sa dolavi ira ki na veivakayarayarataki vakalou.

O ira na tisaipeli i Karisito era segata me ra teivaka cake na ivakarau va-Karisito oqo sa yaco mera yalomalumalumu cake ka dauloloma vakalevu cake.

Na kosipeli i Jisu Karisito e sureti keda meda cakacakataka vakauasivi na ivalavala dodonu oqo ena gauna ni bolebole, ni baleta na veigauna oqo e vakatakilai mai kina na ivakarau dina ni tamata yadua.

Na nona cakacaka vakalotu na iVakabula e vuravura a vakatakilakilataki ena ivalavala dodonu ni ivalavala malua ena ituvaki kece sara ni Nona ivakarau.

O Jisu Karisito, na ka cecere duadua, a vakararawataki ena vukuda me yacova ni sa bunotaka mai yagona na dra, ia a sega vakadua ni vakatara o Koya me vakacudruya na Yalona, se veivakasewasewani, veivakacacani, se vosa ca me drotani mai na Gusuna, ena loma sara mada ga ni veivakararawataki oqori.

Nida sasagataka ena vakabauta kei na gugumatua me da talia na ivalavala malua ena noda ivalavala kei na vosa, au vakadinadinataka ni da na vaqaqacotaka na noda bula ena yavu dei ni noda Dauveivueti.