Vakadinadinataki Ka Vaqaqacotaki vei Karisito

Ena dua na gauna balavu sa oti, au saga meu vulica na physics kei na mathematics ena noqu yabaki ni koliji. Au a vakila na noqu loma-vuka. Sa tekivu meu vakasamataka meu sa vakasuka, meu cakava e dua na ka rawarawa sara.

Au a vakila niu sa malumalumu. Niu masu, au vakila na veivakadeitaki malumu ni Turaga. Au vakila ni a kaya kina noqu vakasama, “Au vakatovolei iko, ia au sa tiko talega vata kei iko.“.

Au a vulica ni noqu sasaga dredre ena vuli physics e sa dua dina na isolisoli mai vua na Turaga. A vakavulici au tiko ena Nona veivuke, kau a rawa ni cakava na veika e dredre kevaka a tiko na noqu vakabauta ni na tiko e kea o Koya me vukei au. Mai na isolisoli oqo, sa cakacaka tiko kina na Turaga me vakadinadinataki au ka vaqaqacotaki au.

Me vakadinadinataki e dua na tiki ni sitila sai koya me na moici vakaukauwa. Na sitila e sega ni vakamalumalumutaki mai na kena vakadinadinataki. Na kena dina, e yaco me dua na ka e rawa ni vakabauti, e dua na ka kaukauwa me ulabaleta na icolacola levu.

Ni da tomana tiko meda vakabauti Jisu Karisito—ena gauna mada ga e dredre kina vei keda na veika eso ena gauna oya—sa yaco meda kaukauwa vakayalo.

Ena vuku ni Nona Veisorovaki lagilagi, sa rawa kina vei Jisu Karisito me vakaukauwataki keda ena noda gauna ni veivakatovolei.

Ena rawa ni yaco mai vakamalua, ena veivakatovolei ni bula vakamatavuvale. Ena rawa ni yaco mai ena mate veitauvi se rarawa se yaluma se galili.

Au vakadinadinataka ni veigauna oqo e sega ni ivakadinadina ni sa biuti iko na Turaga. Ia, era sa ivakadinadina ni lomani iko vakavinaka o Koya me vakasavasavataki iko ka vaqaqacotaki iko. E sa vakaukauwataki iko tiko o Koya mo colata tiko na bibi ni bula tawamudu.