Na iSoro ni Loloma i Jisu Karisito

Talitha Cumi, mai vei Eva Timothy

Lavetaka na PDF

Kevaka o sa valavala ca bibi ka o sa vevutuni tiko se tiko na gagadre mo veivutuni vakaidina ka vakila na reki sega ni tukuni rawa ni veivosoti, yalovinaka kila ni waraki iko tiko na cakamana oqo.

Na vukitani mai na ivalavala ca, ka mua vua na Kalou, ka vakaukauwataki na nomu vakabauti Jisu Karisito sa dua na itekitekivu vinaka. Nomu vakayalomalumalumutaki iko vua na Kalou e okati kina me tusanaki na ivalavala ca bibi vua na nomu bisopi se peresitedi ni tabana, ia na taucoko ni veivosoti ena lako mai vua na iVakabula.

Na gagadre dina ni lesu vua na Kalou e sala vata kei na nuidei mo dinata na Tamada Vakalomalagi, vei iko, kei ira era sa mavoa, kei ira na nomu iliuliu ni matabete.

Nomu gagadre e muataki iko mo vinakata mo vakavinakataka na veika o sa voroka. Ia, ni ko sa kila ni so na ka e sega ni tiko vei iko na kaukauwa mo vakavinakataka, o masulaka vagumatua na Turaga, e na Nona loloma soliwale, ena vukea mera vakabulai o ira era vakaleqai ena vuku ni nomu ivalavala.

Ni o vakasaqara na veivosoti ni Turaga, mo vosota ena nomu waraka na Nona veivakadonui taucoko.

Vei iko ko sa vakaleqai vakatani ena ivalavala ca levu ni dua tale, au gadreva meu wasea na loloma kei na yalololoma ni iVakabula, na Nona veitaqomaki kei na vakacegu.

Au sa solia vei iko na noqu veivakadeitaki taucoko, ni iVakabula e kilai iko ka lomani iko. Dodoliga yani vei Koya. O Koya na nomu vakacegu kei na kaukauwa; ena talai ira mai na Nona agilosi me tuberi iko cake.