Itok, Ļoor Eō
Mennin Aorōk ko Ņooji
Lin̄ūri jeje ko rekwojarjar im kwonaaj lo aolep men otemjeļo̧k.
Revelesōn in raan kein rej kalikkar jeje ko rekwojarjar.
Katak im Bujen Ko 19 ej kōmeļeļeik ruo men ko kōn Rilo̧mo̧o̧r.
Luk ej ba bwe menokadu ko an Irooj ilo Jikin Kallib Getsemane “āinwōt eḷap pilin̄lin̄ in bōtōktōk e wōtlo̧k ioon bwidej” (Luk 22:44). “Āinwōt an kar” kwaļok bwe ej juon kein kareilo̧k ilo juon kōnono.
Jisōs ej kalikkarļo̧k. E ej ba An en̄taan kar kōm̧m̧an An “bōtōktōk ilo aolepān Ānbwinnū,” (Katak im Bujen Ko 19:18). Ejjeļo̧k kein keidi. Metak eo An ekar lukkuun ļap ekkar lukkuun menokadu kōn bōtōktōk.
Ijoko jabdewōt, jeje ko rekwojarjar rej kōjerbal naan ko āinwōt “en̄taan ejjeļo̧k jem̧ļo̧kin” im “kaje eo ejjeļo̧k jem̧ļo̧kin.” Alma eo Edrik ej ba eaar “ widbwebwe kōn en̄taan ejjeļo̧k jem̧ļo̧kin,” (Alma 36:12). Ak en̄taan eo an eaar jem̧ļo̧k ilo jilu wōt raan ko (lale Alma 36:16). Ekōjkan an “indeeo”?
Bar juon alen, Jisōs ej kalikare. Kōn an Jemedwōj Ilan̄ im Jisōs rej indeeo im ejjeļo̧k jem̧ļo̧kier, jabdewōt kaje Rej letok ej, jān meļeļe eo, “indeeo” ak “ejjeļo̧k jem̧ļo̧kin” kaje eo, mekarta jon̄an aetokin (lale Katak im Bujen Ko 19:6–12). En̄taan eo wōt an m̧aan ro nejin marok renaaj ilo m̧ool pād n̄an indeeo; (lale Katak im Bujen Ko 76:30–38).
Juon peptaij ebwe—bōtaab ej aikuji mālim eo.
Ro rej oktak ekkā aer kajjitōk ippān mijenede ro: Ak n̄e em̧ōj aō kar peptaij ilo bar juon kabun̄? Ij ke aikuj in bar peptaij?
Katak im Bujen Ko ej kōmeļeļe bwe ilo an jako priesthood eo—maron̄ eo n̄an jerbal ilo etan Anij—“men̄e juon armej ej peptaij jibukwi alen ejjeļo̧k tokjān n̄an e” (Katak im Bujen Ko 22:2).
Kōn menin uwaak eo ekkar in: “Peptaij eo am̧ m̧okta ekar juon jerbal ejim̧we pedped ioon ta eo kwar jeļā ilo tōre eo. Kiiō eļapļo̧k jeļā eo am̧, im Irooj ej kōņaan bwe kwon jerbal kōn jeļā eo.”
Ejjeļo̧k juon ejeļā men otemjeļo̧k. Im menin EMMAN.
Rikanaan Josep Smith eaar jab jeļā kōn business ak economics. Ilo men ko an laļin, ekar jab jeraam̧m̧an.
Irooj eaar jiron̄ e bwe enaaj kar āindeo “ilo jerbal ko an kanniōk eban wōr am kajoor, bwe ejjab kūr eo am in” (Katak im Bujen ko 24:9).
Enaaj wōr ro m̧ōttam̧ im rijikuuļ ro m̧ōttam̧ me rej etal n̄an univeristy ko rem̧m̧anļo̧k jān kwe, bōk jerbal ko rebun̄bun̄ļo̧k jān kwe, im ļapļo̧k aer jeraam̧m̧an ilo mour in jān kwe.
Im ta?
Mour ejjab juon kein jiāe. Aaet, kwoj aikuj kajjieon̄ ijo em̧m̧an tata ippam̧. Bōtaab jab wiwijet eļan̄n̄e kwoj lo an ro jet ļapļo̧k aer jeraam̧m̧an ilo mour in. Remaron̄ jab jibadōkļo̧k ejja mejān kajjiōk eo kwoj kaiookļo̧k! Kōm̧m̧ane wōt ta eo Irooj ej kōņaan bwe kwon kōm̧m̧ane—am̧ “kūr”—im jab inepata kōn karōk ko An n̄an bar juon.
Im̧weo im̧ōn Anij ej juon im̧ōn koņ.
Rilo̧mo̧o̧r eo ekkā an kakeememej Rikanaan Josep Smith bwe aolep men rej aikuj kōm̧m̧an “ilo koņ” (lale Katak im Bujen Ko 20:68; 28:13; 58:55; 107:84). Kwoj aikuj kien ko eļan̄n̄e jab enaaj wōr poktak ko.
Ak ejjab meļeļein bwe ejāmin ejjeļo̧k jidik anemkwoj. N̄an waanjon̄ak, Irooj eaar jiron̄ Josep Smith bwe “ej jab aorōk ta kom̧ naaj m̧ōn̄ā ak ta kom̧ naaj idaak n̄e kom̧ij bōk kwōjkwōj eo”—eļan̄n̄e āindein bwe kom̧ij kōm̧m̧ane ilo ememej en̄taan im Pinmuur eo An (Katak im Bujen Ko 27:2).
Eļan̄e ej itok n̄an tōl Kabun̄ in, ijoke, ejjeļo̧k jāniknik. Juon wōt armej ilo juon iien emarōn̄ bōk revelesōn ko n̄an Kabun̄ in: m̧okta Josep Smith (lale Katak im Bujen Ko 28:2); innām armej eo Irooj ej jitōn̄e “ilo etan” (Katak im Bujen Ko 28:7)—Brigham Young, John Taylor, im āindein m̧aantak n̄an rikanaan eo rainin.
Ritōl ro jet an Kabun̄ in im kile er remaron̄ katakin, rōjan̄, im leļo̧k naan in kapilōk (lale Katak im Bujen Ko 28:4–5). Ijoke Būreejtōn eo wōt an Kabun̄ in emaron̄ ekenono n̄an Anij ilo jabdewōt men ko rejelet aolepen Kabun̄ eo.