Jipan̄ n̄an Raan ko Reppen

Mour in ejjab aolep iien āinwōt ad kōjatdikdik kake. Em̧m̧an ippād aolep raan ko im rej obrak kōn kam̧ōņōņō im lan̄lōn̄, bōtaab jet raan rej obrak kōn būrom̧ōj. Ilo wūnin kenono in, konaaj lo jipan̄ n̄an raan kein (lale peij ko 8, 14, im 22).

Juon iaan eoon ko rem̧m̧an tata ippa epād ie kapilōk eo im juon kallim̧ur n̄an raan ko reppen. Ej riit, “Kwōn ineem̧m̧an ilo en̄taan, bwe kwo naaj iioon elōn̄; ak niknik ie, bwe, lo, N̄aij pād ippam̧, em̧ool n̄an jem̧ļo̧k in raan ko am.” (Katak im Bujen Ko 24:8). Naan in kapilōk ej n̄an niknik.

Ilo okaran, niknik ej meļeļe in n̄an dim itulowa. Menin emaron̄ pen n̄an kōm̧m̧ane, ej unin an em̧m̧an ippa kallim̧ur eo “N̄aij pād ippam̧.” Kallim̧ur jab in ej meļeļe in jejjab aikuj dibuk raan ko reppan makeļo̧k. Irooj enaaj jipan̄ kōj depdep wōt n̄an dim itulowa.

Jekdo̧o̧n ta eo ej waļok ilo mour ko ad, wāwein eo em̧m̧antata n̄an ekkeijelļo̧k ippen Jemed ej ilo jar. E ej lukkun pād. E enaaj ron̄jake im uwaake jar ko ad. Anij ej ron̄jake im ekenono n̄an ajiri ro Nejin ilo raan ko rem̧m̧an im ilo raan ko renana (lale peij 2). E ekar kallim̧ur n̄an pād ippād.