Jemedwōj Ilan̄ Ej Kōņan n̄an Kōnono N̄an Eok
En wōr am̧ tōmak bwe Jemedwōj Ilan̄ ekōņaan kōnono n̄an eok. E ej pād im ej iakwe eok eļapļo̧k jān naan ko maron̄ ba.
Jej ļaddik im leddik ro nejin Anij, mour ippān doon ioon laļ in ettoļo̧k jān kapijuknen eo ad ilan̄. En̄in ej mour wabanban, juon iien n̄an bōk ānbwin eo ad, kāālet em̧m̧an ioon nana, kaddōkļo̧k tōmak eo ad ilo ad Rilo̧mo̧o̧r Jisōs Kraist im Pinmuur ekwojarjar eo An, im lo̧udin̄din̄ ilo karōk in m̧ōņōņō eo an Jemād.
Ilo an ejeļo̧k ad jeļā kōn mour eo ad m̧okta, kōj, ewōr iien, en̄jake ajimakeke kōn laļ eo m̧okta jaar itok jān e. Jemād ear letok n̄an kōj juon menin letok in jetōb n̄an ekkejel n̄an E im n̄an bōk kajiniet, tōl, im kaenōm̧m̧an eo jān E. Eļap ad jeļā kōn menin letok in, ej ņa etan jar.
N̄an Ro Renaaj Tōmak Ilo N̄a, jān Dan Wilson
Jar n̄an Jem̧ōm̧ eo Ilan̄
Juon ānjeļ ear kappe Adam im Iv im aolep ro renaaj ļoor er n̄an “ukeļo̧k im kūr ioon Anij ilo etan Nejin jān kiiō n̄an indeeo” (Moses 5:8).
Jisōs eaar katakin:
-
“Kajjitōk, im naaj lewōj ñan koṃ; kappukot im koṃ naaj lo; kaḷḷaḷḷaḷ, im naaj kapeḷḷọk ñan koṃ” (Matu 7:7).
-
“A kwe, n̄e kwōj jar, … kwōn jar n̄n Jemaṃ … ilowaan jikōm ettino” (Matu 6:6).
-
“Innām en wāween de in ami jar: Jememwōj i lan̄, En Kwōjarjar Etaṃ” (Matu 6:9).
Jisōs ekar wōnm̧anļo̧k im jar n̄an Jemān (lale Luke 6:12; Mark 6:46). Ilo Gethsemane, E ear ba n̄an Rikaļoor ro An, “Koṃwin jijet ijin ilo iien Aō jar” (Mark 14:32). Ilo an pād ioon debwāāl eo, Jisōs ear jar kōn ritariņae ro rekkar debwāāl E: “Jema, Kwōn joļo̧k rueir; bwe re jaje ta eo rej kōṃṃane” (Luke 23:34).
Kar kapilōk kōj n̄an “jar aolep iien.” Ilo ad “kepaak Irooj ilo aolep [ad] m̧akūtkūt, … E enaaj tōl [kōj] n̄an em̧m̧an” (Alma 37:37). Ilo kakkobaba, jej “wūjlepļo̧k aolep kam̧m̧oolol ko im nebar ko aolepān [ad] ad kajoor n̄an būki” (Mosaia 2:20).
Ak em̧ool eļapļo̧k an aiboojoj, Jemād ilo Lan̄ ej uwaaki jar ko ad! Juon kajjitōk em̧wilaļ n̄an kōj ej ekōjkan an em̧m̧anļo̧k ad bōk im meļeļe uwaak ko, tōl ko, im kaenōm̧m̧an eo ej itok jān Jemād?
Bōk uwaak ko n̄an jar ko ad ej ijjino kōn tōmak ilo Jemād Ilan̄ im Nejin, Jisōs Kraist. Jej lōke ilo Jemād, kōm̧m̧ane ijo jemaron̄e n̄an kōjparok kien ko, im pukot Pein ilo aolep men (lale Katak im Bujen Ko 59:21).
Jemam̧ Ilan̄ enaaj jutak turum̧ kōkkajoorļo̧k maron̄ ko am̧, kaenōm̧m̧an eok, im “ukōti en̄taan ko am̧ n̄an am̧ ļapļo̧k.” (2 Nephi 2:2) ilo am̧ kūr n̄an E.
Ron̄jake Ainikien
Ilo ad kōjerbal tōmak ilo Anij im kejparok kien ko An, jej make katak n̄an an em̧m̧anļo̧k ad ron̄jake Ainikien.
Ilo 1993 eo, Būreejtōn James E. Faust, (1920-2007), tōre eo ekar juon uwaan Doulul eo an Jon̄oulruo Rijilōk ro, kar kajjitōk ippān lio pāleō, Kathy, im n̄a n̄an pād ilo nokon eo ilo Brigham Young University ippān. Nokon in ekar waļo̧k m̧oktaļo̧k jān an ajeeded smartphone ko, social media, im intōrenet.
Ilo kōnono eo an, Būreejtōn James E. Faust ekar kakkōl: “Ilo epepen eo ami kom̧ naaj jodik wōt kōn orļo̧k ko an ainikien ko jiron̄ eok ekōjkan mour, ekōjkan am̧ kabun̄ būruōn itok limo ko, ekōjkan kabun̄ būruōn būruōj, ekōjkan bōk aolepān” Ak, “ainikien eo kwoj aikuij ļoore ej ainikien Jetōb eo.” N̄an kōm̧m̧ane menin, “jej … aikuj kōpeļļo̧k lo̧jiln̄id, ukōtļo̧k mejān tōmak n̄an kein jipan̄ ko an ainikien, im dim reim̧aanļo̧k n̄an lan̄.”
Jet iiō tokālik, Būreejtōn Russell M. Nelson ear katakin, “Eļan̄n̄e eļapļo̧k am̧ kalimjōk men ko jān social media jān am̧ kalimjōk unoojdikdik eo an Jetōb, innām kwoj likūt eok make ilo kauwōtata ilo jetōb.”
Ainikien Jetōb eo ej itok jim̧or n̄an kōļmenļo̧kjeņ im en̄jake ko ad. “I naaj ba n̄an eok ilo ļōmņak eo am im ilo būruōm̧, jān Jetōb Kwōjarjar, eo enaaj itok ioom̧ im eo enaaj pād ilo būruōm̧” (Katak im Bujen Ko 8:2). Ron̄jake bōklōkōt eo am̧—ekkā an revelesōn ko ijjino ijo.
Jar kōn Būruōn Tōmak
Uwaak ko im im̧we ko jān Anij rejjab maron̄ in kipel. Jej jar im kōttar kōn juon buruōn tōmak. Jet uwaak rejjamin naaj itok ilo mour in, bōtaab n̄an eo ejim̧we, Irooj enaaj aolep iien jilkintok An aenōm̧m̧an (lale Jon 14:27). Jet iien, uwaak ko rej itok “ļain ioon ļain, kain̄i ioon kain̄i;” (Katak im Bujen Ko 98:12).
Ainikien lan̄ emaron̄ emakijkij an itok lo jab kōtmene ilo jikin ko relur im jikin ko rekwojarjar. Ilo lur eo an jar ko aō ilo jibbon̄ tata im kejekļo̧kjeņ ko, ij lo kōjeraam̧m̧an ko rejeja. Riiti jeje ko rekwojarjar raan otemjej, aō make, jab kabūņōņō, ilo an jekjek eo in jān iien n̄an iien, maron̄ bōktok ainikien Jetōb eo n̄an būruōd āinwōt kijeek ilo iien ko bar jet.
Ilo an aen̄wān̄wā ko kōm̧ad ko an laļ in pelto peltak ipeļaakid, Irooj ekar tōl rikanaan eo An n̄an ekkal eļōn̄ļo̧k tampeļ ko. Ilowaan im̧ōkein im̧ōn Irooj rekwojarjar, ilo ad door ļo̧n̄tak ko ad itunam̧ōj im delo̧n̄ kōn jar ko ad im n̄ūrbōktak ko, jej katak kōn m̧ool ko an indeeo. Juon iiō emootļo̧k, Būreejtōn Nelson ekkar kallim̧ur bwe eļan̄e jej kabun̄ jar ilo tam̧pel, “Ejjeļo̧k men enaaj kōpeļļo̧k lan̄ ko eļapļo̧k. Ejjeļo̧k!”
Kajjojo kweilo̧k eļap ej barāinwōt bōktok elōn̄ļo̧k kōjeraam̧m̧an ko. Ilo allōn̄ in tok anEprōl, jenaaj bar juon alen ioon doon ilo kweilo̧k eo eļap n̄an ron̄jake ainikien Irooj. Ij kallim̧ur bwe ilo am̧ kepopo im itok ilo am̧ jar n̄an kwelo̧k eo eļap, konaaj lo uwaak ko n̄an kajjitōk ko am im jeļā bwe “pā eo jān lan̄” ej pād ioom̧.
En wōr am̧ tōmak bwe Jem̧ōm̧ Eo Ilan̄ ej kenono n̄an eok. E ej! Kōm̧m̧an bwe tōmak eo am̧ ilo E im Nejin Jitōnbōro en jipan̄ eok ilo̧k jān rōn̄ōl nuknuk eo im bōk ainikein Jemam̧. Ij kam̧ool bwe E ej pād im ej iakwe eok eļapļo̧k jān naan ko maron̄ ba.