Kōjerbal Meļeļe ko
Ice Cream, Jemjerā, im Iakwe Eo Riturum̧
Kōjparok kien eo kein karuo eļap ejjab pen āinwōt am̧ ļōmņake.
Pija kōmeļeļe ko jān Valentina Vinci
N̄e juon m̧ōttam̧ ak baam̧le ej pād ilo juon iien elukkuun epen, kwoj ke kajoor inepata kake wāwein n̄an joļo̧k inepata ko aer? Menin eo ej juon ļōmņak eo em̧m̧an ilo lale ļo̧k.
Ak baj ļōmņak eļan̄n̄e ro jinen im jemān eo m̧ōttam̧ rej jepel. Ak leddik eo jatūm edik kar kakkure ilo jikuuļ Ak ļaļļap eo jim̧aam̧ ej jelm̧ae kajoor in aer in kōmālij. Ekōjkan am̧ kōkm̧anm̧ane aolep men kein?
Uwaak eo ekadu ej bwe koban. Im ej EM̧M̧AN wōt. Ejja iien eo wōt, ijoke, kwomaron̄ aolep iien jipan̄. Im kwomaron̄ ilbōk kōn ewi jon̄an an juon jipan̄ edik maron̄ ukōt men ko.
Appan̄ ko Reļļap, Jouj eo Eļam̧waan
Foni P. ekkar rūttoļo̧k ilo im̧weo ippān jinen eo emakke. Ilo tōre in iiō in ajri im jodikdik ko an, Foni ekar lale an jinen kakkōt n̄an karūttoļo̧k jilu ajri ro make. Kōn menin, Foni ear jino an dike jemān. Innām jet iien remmotļo̧k, ālkin an tōpar 19 an iiō, jemān ekar jino an pukotļo̧k n̄an kajjieon̄ im jeļā kajjien.
“Ikar illu,” Foni ej ba. “Ļōm̧ņak eo aō ekkar bwe, ‘Ear wōr 19 iiō ko im emaron̄ in kar itok n̄an mour eo aō ak ear jab. Etke kiiō?’” Mekarta n̄e ekkar jar im kōļmenļo̧kijen kake, Foni ekkar jab loe ainem̧m̧an. Kōnono ippān jinen im kōrā eo nej jinen ekar jipan̄ jidik, bōtaab ekar wōr an en̄jake nana ņae jekjek eo. Innem juon men ekabwilōn̄lōn̄ (ak eļamwaan) ear waļok: Eo m̧ōttan Foni im epaake tata ekar karuwaineneik e n̄an ice cream im kaikujkuj.
“Elōn̄ armej ro remaron̄ kalimjek wāween eo im ļōmņak bwe ejjab juon men eo eļap,” Foni ej ba, “ak elukkuun ļap an aorōk! Ikar en̄jake okmāņeņ in aļ kilū. Komro kar ettetal nabōj, im iarlo wōjke ko. Ikar en̄jake kōto eo, im iar en̄jake Jetōb eo ejja iien eo wōt. Eaar kanooj in aibuojwōj!
Iien kaikujkuj in ejeļo̧k kar karōk in ear ke ņa mejļan appan̄ ko an Foni? Ekwe, jaab. Foni ekkar kwaļo̧k bwe jemjerā eo an ippān jemān ekar pād wōt ilo an pen. Bōtaab jerbal in jouj eo eļamwaan jān eo m̧ōttan ekkar kōm̧m̧an bwe Foni en maron̄ bar en̄jake Jetōb Kwojarjar eo bar juon alen. Innām liin emaron̄ em̧m̧anļo̧k an jelm̧ae apan̄ ko an kōn eļapļo̧k kajoor. “Ijeļā bwe in m̧ōtta ekar im̧we jān Jetōb Kwojarjar eo n̄an bōk eō jān mweo,” Foni ej kwaļo̧k.
Wōn Eo Ej Aikuji Eok Rainin?
Ilo N̄an Kōkajoorļo̧k Jodikdik ro unin tōl eo, jej ruwainene n̄an “jipan̄ ko im rej en̄jake aer make, ettoļo̧k, ak aikuj jipan̄. Jipan̄ er n̄an en̄jake iakwe eo an Jemedwōj Ilan̄ kōn kwe” (N̄an Kōkajoorļo̧k Jodikdik Ro:Juon Unin Tōl n̄an Kōm̧m̧ane Jokāālet ko [2022], 12). Jemjerā in eļamwaan ekar jipan̄ Foni en̄jake iakwe eo an Anij ilo juon jekjek eo epen. Wōn eo kwomaron̄ jipan̄ eok en̄jake ejja iakwe in wōt rainin?