M̧ōņakjen eo n̄an Jāmin Bar Likjab

Pijain kōmeļeļe ko jān Eric Chow

“Em̧m̧an ippa likjab!”

Bōlen ejjab juon men eo kwar ron̄ an elōn̄ armej ba. Elōn̄ wōt iaad ejjab m̧ōņōņō kōn likjab. Emaron̄ kōmmetak, pinej karōk ko ad, im jet iien kanooj kajjookok.

Bōtaab ta eļan̄n̄e en kar wōr juon m̧ōņōkjen n̄an jāmin bar likjab?

“Kōttar,” kwomaron̄ bōlen ļōmņak. “Ejjeļo̧k ewānōk. Jej aolep kōm̧m̧ani bōd ko. Ewi wāwein an juon jāmin likjab?”

Thomas Edison ekar lo m̧ōņōkjen eo ke ekar kajjieon̄ elōn̄ alen n̄an kōm̧m̧ane tōm̧a eo. “Iaar jab likjab 1,000 alen,” ekkar ba. “Tōma eo eaar juon kōm̧anm̧an eo ebbōk 1,000 bun̄ten.”

Edison ekar likjab im bar likjab, bōtaab ekar jab kāālet n̄an lo ilo jekjek jab eo. Im en̄in ej m̧ōņōkjen eo! Ukot kōļmenļo̧kijeņ eo am̧! Eļan̄n̄e kwoj ukōt kōļmenļo̧kjeņ eo am̧, “likjab ko” am̧ remaron̄ erom juon men eo ekāāl im em̧m̧an.

En̄iin emān wāween ko n̄an ukot wāween am̧ kalimjōke likjab ko:

1. Kappukot ta eo kwomaron̄ im kwojjab maron̄ kōjbwebweik. Jet iien men ko eļap tata ad inepata kaki jejjab maron̄ kōjbwebweik. Kanne juon peba in jerbal, n̄an waanjon̄ak. Ko maron̄ kōjbwebweik kijejeto eo kwoj likūti n̄an kanne peba, bōtaab kwoj jab maron̄ peek jem̧ļokin. Ijelo̧kin am̧ joļo̧k am̧ kajoor im inepata bwe kwonaaj “likjab,” kajjieon̄ door kijejeto eo am̧ n̄an ta eo kwoj kōjbwebweik n̄an lōke Irooj. E eaar kallim̧ur bwe “men otemjej rej jim̧or jerbale em̧m̧an n̄an ro rej yokwe Anij” (Rom 8:28). Im n̄e koban bōk jerbal eo? Kwoj jab juon eo elikjab! Jekdo̧o̧n eļan̄n̄e kwoban bōk tōprak eo kwar kōjatdikdik kake, kwar leļo̧k kijejeto eo am̧ em̧m̧antata, im ej menin wōnm̧aanļo̧k!

   

2. Dāpij ko rem̧m̧an im wōnm̧aanļo̧k wōt. N̄e kwoj en̄jake bwe kwoj likjab, kajjieon̄ kam̧wilaļļo̧k am̧ lale iminene eo am̧. Kwar jab tōprak ilo kumi in ikkure eo? Kwar bōk juon grade eo ejjab em̧m̧an ilo juon teej? Kalimjōk ijo kwar jorrāān ie enaaj lewaj n̄an eok juon meļeļe eļap kōn ta eo kwoj aikuj in kōm̧m̧ane ilo ilju im jekļaj. Eļan̄n̄e juon en̄jake ej kōm̧m̧an am̧ en̄jake an nana tam̧m̧ūm̧, kile en̄jake ko am̧ innām kāālet n̄an etal kōn eo em̧m̧an. Likjab emaron̄ ilo m̧ool jipan̄ eok bun̄ m̧aanļo̧k ilo iaļ ko rekāāl im em̧m̧anļo̧k.

   

3. Kememej bwe ejjab jem̧ļo̧k eo in. Ewōr juon jabōn kinaaan ej ba: “Aolep men naaj em̧m̧an ilo jem̧ļo̧kin. N̄e ejjab jejjōt, ejjab jem̧ļo̧k eo in.” Moronai ej katakin juon men ainļo̧k wōt. Ekar ba, “Jem̧ļo̧k eo enan̄in ke itok? Lo ij ba n̄an kom̧, Jaab; im Anij ej jan̄in bōjrak an juon Anij in mennin bwilōn̄ ko” (Mormon 9:15). Ilo ad lōke ilo Anij, bun̄ m̧aanļo̧k ilo tōmak, im kememej bwe bwebwenato ko ad rejjab jem̧ļo̧k ilo an roļo̧k juon men, kabwilōn̄lōn̄ ko remaron̄ waļok im jabdewōt “likjab ko” jej jelm̧ae maron̄ āliktata erom̧ juon jeram̧m̧an aibuojwōj.

4. Jutak ippen Kraist. Kōn Pinmuur eo an Jisōs Kraist, ejjeļo̧k likjab ej n̄an indeeo. Aolep iien ej wōr ad kāālet n̄an ukweļo̧k, ukot būruōd n̄an Anij, im kajjitōk kōn An jipan̄. Būreejtōn Jeffrey R. Holland, Eo Ej Pinej Jenkwan Būreejtōn eo an Doulul eo an Jon̄oulruo Rijilōk ro, eaar katakin: “Jekdo̧o̧ņ ewi lōn̄ in bōd ko kwoj en̄jake kwar kōm̧m̧ani … , Ij kam̧ool bwe kwoj jan̄in itok itak eļapļo̧k jān iakwe eo ekwojarjar maron̄ tōpare. Ejjab pidodo n̄an kwe bwe kwon maron̄ wanlaļļo̧k jān ilaļ in meram in Pinmuur eo an Kraist ej rom̧aak.” Kōn menin, ilo juon wāween, n̄e kwoj jutak ippān Kraist, kwe jāmin likjab!

Ilo am̧ kalimjōk likjab ko am̧ āinwōt bun̄ten ko n̄an jeraam̧m̧an, kwoj kōppeļo̧k juon uwaak eo ettino n̄an jāmin bar likjab ilo m̧ool.

Kōn menin, kajjieon̄! Im eļan̄n̄e kwonaaj likjab? Keememej wōt—kwojjab lukkuun likjab. Kwoj kōm̧m̧an wōnm̧aanļo̧k, juon bun̄tōn ilo juon iien.