Lale elmen an eb in bakbōk eo an armej in Samoa keidi n̄an gospel eo an Jisōs Kraist n̄an jodikdik ro ilo Hawaii, USA.
Pija ko jān Leslie Nilsson im Marissa Couto
Jet armej rej kōjan̄jan̄ piano. Jet em̧m̧an ippāer riit bok. Jet rej ikkure gymnastics, jōkar, im jekkab. Men ko rejeja, im em̧ool pen n̄an tōmake, jet armej em̧m̧an ippāer eb ilo aer kero̧lool bakbōk ko im kauruur kijeek.
Bwebwenato in Eb in Babbōk eo Eouruur
Eb in bakbōk eo an armej in Samoa, ak ailao afi, ej juon eo kōm̧m̧ane rainin im ej bōk jikin juon eb kōn tariņae ko etto. Ej juon kapeel eo ejenolo̧k, juon ļam in art im ņa kajjieon̄, im, n̄an elōn̄, juon wāween n̄an kautiej m̧anit eo aer.
En̄iin ej wāween an jilu jodikdik ro jān Hawaii, kōmeļeļe kake.
Vivian, 18: “Ilo iminene in m̧anit, ekkar juon men eo ritariņae ro rekar kōm̧m̧ane kōn baj bakbōk wōt. Tokālik, kijeek im wāween kōroloolekar kobaikok. Ej lukkuun ainļo̧k wōt kōrolool aļļaaļ, kōn baj kijeek ilo jabōn jim̧or.”
Tui, 12: “Eb in bakbōk eo eouruur eļap an bwil. Ebarāinwōt ļap kōrolool ie. Em̧ool kwoj jolōn̄ļo̧k bakbōk eo im kōm̧akūtkūti ipeļaakim̧ ilo an ero̧lool wōt.”
Joseph, 18: “Ilo an kijeek eo em̧m̧akūtkūt, kōto eo ej ajwewe, im drum ko rej kōjan̄i, ebwe an ļap ainikien. Ak ilo m̧ool, ej āinwōt juon iien elur ilo jetōb n̄an n̄a, kōnke eļap m̧eļeļein n̄an n̄a. Bakbōk eo eouruur ej juon wāween ij ekkejel ippān baam̧le im m̧anit eo aō.
N̄an jodikdik rein, eb in bakbōk eo eouruur ejjab baj juon tōļan ekabwilōn̄lōn̄ im jeja. Eaar barāoinwōt katakin er elōn̄ katak ko rarōk an mour in kōn epaake wōt Irooj n̄an mour kake gospel eo im jipan̄ ro jet.
Lōke Irooj
Joseph A., 18
N̄e kwoj eb kōn bakbōk eo eouruur, elōn̄ men ko remaron̄ bōd. Kiaaj eo emaron̄ ajedeed ilo jejjor eo, kōm̧m̧an an ijjir. Kōto eo emaron̄ barāinwōt ukōt men ko im kōm̧m̧an an bakbōk eo pen bauri. Lōke Irooj ilo aō eb ekar juon jipan̄ ļapļap n̄an n̄a.
Juon iaan eoon ko rem̧m̧antata ippa ej Jabōn Kenaan Ko 3:5, eo ej kōnono kōn lōke ilo Irooj kōn aolepen buruōm̧. Ij ļōmņak eaorōk kōnke ilo iien eb eo kwoj kile bwe kwoj door aolep am̧ kōmālmel ilo am̧ ikkure, ak ej lukkuun pedped wōt ioom̧, bakbōk kijeek eo, im Jemāedwōj Ilan̄.
Ikōņan jar n̄an Jemedwōj Ilan̄, “EM̧M̧AN, iaar kōm̧m̧ane ijo koņaō ilo jerbal, kiiō jouj im tōl pā ko peiū.”
Kōm̧m̧an Jikin n̄an Irooj
Gary K., 16
Eļap kepopo ko rej bōk jikin n̄an jiāe ko an bakbōk kijeek eo. Ij kōmmālmel kajjojo raan ium̧win jiljijno allōn̄ ko maanļo̧k n̄an jiāe eo.
Emaron̄ in pen, barāinwōt, kōnke jikejuuļ eo aō ekanooj in poub. Ak ij aolep iien kōm̧m̧an jikin n̄an Irooj ilo aō etal n̄an m̧ōn jar, m̧akūtkūt ko an Doulul eo an Likao ro, im jemenere im aō riiti jeje ko rekwojarjar im jar. N̄e ij kōm̧m̧ane men kein, ij loe juon oktak ilo raan eo aō. Aolep men rōm̧m̧an.
Ij lukkuun en̄jake bwe Kraist ej pād ippa. N̄e kwonaaj lōke Irooj im kajjieon̄ in likūt E m̧oktata, E enaaj jipan̄ eok kōn jabdewōt men kwonaaj aikuj in kōm̧m̧ane.
Bōk Peran im Im̧we Ro Jet
Vivian K., 18
Ke ikar rūttoļo̧k, ikar lale an ro ulepa im ro rilikū kar eb kōn eb in bakbōk kijeek eo. Iar ļōmņak bwe elukuun jejjōt, bōtaab ikar jab jeļā eļan̄n̄e imaron̄ kar kōm̧m̧an n̄a make. Ilo high school, iaar kōm̧m̧an bwe en juon aō kōttōpar n̄an ekkatak wāween kōm̧m̧ane. Ālkin aō kar ekkatak, iaar kōm̧m̧ane kōttōpar eo aō bwe en lukkuun alikarļo̧k: Ikar kōņaan jiāe ilo juon jiāe an kijeek in bakbōk.
Bakbōk kijeek eo ekar jipan̄ eō bōk lōke ilo n̄a make. N̄e kwoj eb, ewōr jet kōl ko me kwoj jolōn̄ļo̧k bakbōk eo, alooje ilo mejatoto, innām bauri. Ekkā aō kajoor ko jān mejān bakbōk eo ālkin aō kar jolōn̄ļo̧k. Jema ear jiron̄ eō bwe ij aikuij lelo̧k aolepen aō n̄an kōl eo im peran ilo aō lōke eō.
Kar im̧we jān baam̧le eo an, Vivian ekar bōk lōke eo n̄an bōk kijeek eo.
Ālkin jet iien, iaar jino kōļapļo̧k aō lōke eō ilo aō ikkure im ilo aolep men ko jet. Ej lukkuun em̧m̧an kiiō kōnke jet iien leddik ro rej jibadōktok eō ālkin iien eb ko im ba raar im̧we im barāinwōt kōņaan kajjieon̄ eb in bakbōk kijeek eo. Ij lukkuun m̧ōņōņō bwe imaron̄ kareel ro jet n̄an kōm̧m̧ane juon men eo raar ļōmņak bōlen reban kar kōm̧m̧ane.
“Jar ej kōjparok eō im jipan̄ eō bwe in kōm̧m̧ane juon eb em̧man,” Tui ej ba.
Anjo̧ Jān Mijak kōn Jar
Tui M., 12
N̄e ij ikkure, Ijjab ikūm̧kūm̧. Ij en̄jake juon irruj. Em̧ōj aō katak bwe mekarta n̄e inaaj kōm̧m̧an bōd, imaron̄ oktakļo̧k n̄an juon men eo em̧m̧anļo̧k. Enan̄inļo̧k āinwōt jin̄a. N̄e juon ripija ej kōm̧m̧ane juon bōd, remaron̄ kōm̧m̧ane n̄an juon men eo ekāāl. Jet iien ij kawōtlo̧ke bakbōk kijeek eo aō, bōtaab ij kotake im eb wōt.
Kōketak-eok make ekar jipan̄ eō eļap kōn mijak ko aō. Ijello̧kin an wōr ļōmņak ko āinwōt, “Ta eļan̄n̄e ikōm̧m̧an bōd?” Ij kajjieon̄ kōļapļo̧k ļōmņak ko āinwōt, “Ekwe, ta eļan̄n̄e em̧m̧an aō kōm̧m̧ane?”
Ej barāinwōt erom juon iminene n̄an n̄a n̄an ba juon jar edik aolep iien m̧okta jān juon iien ikkure kōn bakbōk kijeek eo. Jar ej kejparok eō im jipan̄ eō bwe en em̧m̧an aō ikkure. N̄e ij jar, ij en̄jake lōke bwe inaaj em̧m̧an aō ikkure.
Manasseh T., 12
M̧okta jān aō kōm̧m̧ane eb in bakbōk kijeek eo,ekkā aō ikūm̧kūm̧. Aolep iien m̧okta jān aō jinoe, ij jar. Juon iien, m̧okta jān aō jinoe ikar jar, im iar en̄jake okmāņāān im jab mijak. N̄e in eb, ikkar en̄jake āinwōt juon armej ej jutak ikōjaō.
Jar ej lukkuun jipan̄ eō bwe in jab mijak. Ālkin aō jar, ij kile bwe ij lukkuun limo!
Kwaļo̧k juon Enaan kōn Iakwe
Kawiki A., 15
Summer eo kiiō, kōm kar ikkure kōn bakbōk kijeek eo ilo Romania im Bulgaria. Baba aolep iien ej katakin kōm “N̄e Ewōr Iakwe” (Al Ko Al In Ajri, nō. 34) ilo kajin eo an laļ eo kōmij loļo̧k. Kōmij kōm̧m̧ane menin bwe kōmin maron̄ al kake ippān doon āinwōt juon baam̧le ālik am eb.
Ij ļōmņak enaan eo kōn iakwe ilo m̧weo eaorōk kōnke ej kakeememej kōj bwe en wōr ad iakwe ijok ko jabdewōt. Ij en̄jake āinwōt n̄e ij kotak ro jet im kōm̧m̧an aer m̧ōņōņō. Im mekarta n̄e jet iien rejjab maron̄ kōnono kajin eo aō, ijeļā bwe rekkar maron̄ en̄jake gospel eo im kōm kar kwaļo̧k ilo kapeel ko am.
Ikkure eo kōn bakbōk kijeek ej juon wāween jodikdik rein rej rome meram ko aer im kwaļo̧k kapeel ko aer n̄an ro jet. “Imaron̄ ikkure im kwaļo̧k tōļan ko aō ipeļaakin laļ in ippān baam̧le eo aō. Ekōm̧m̧an aō m̧ōņōņō ilowa ilo aō jeļā bwe n̄e kwoj kwaļo̧k kapeel ko am̧, innām kwonaaj kotak ro jet,” Nainoa ej ba.
Ļaddik eo jein Nainoa, Kawiki, ej ba eb in bakbōk kijeek eo ej kakeememej e kōn wāween an meram anjo̧ ioon marok. N̄an e, kwaļo̧k kapeel ko an ej āinwōt kwaļo̧k meram eo n̄an ro jet.
Josep ej ba eļan̄n̄e jej romaak, jej romaak n̄an Jemedwōj Ilan̄. “Eļan̄n̄e jej kwaļo̧k ta eo epād ippād, jejjab kōjeraam̧m̧an wōt kōj make, ak kōjeraam̧m̧an ro jej kwaļo̧k kapeel ko ad ippāer, ak jej barāinwōt leļo̧k nebar n̄an Jemedwōj Ilan̄.”
Vivian ej ba jim̧m̧aan ej aolep iien kwaļok eoon eo ilo Matu 5:16, eo ej kōnono kōn kwaļo̧k meram eo ad im̧aan armej. “Ij ļōmņak ej juon eoon em̧m̧an kōnke kwojjab aikuj in wōt jeļā ikkure kōn bakbōk kijeek eo n̄an kwaļo̧k kōn gospel eo. Kwomaron̄ jeļā jabdewōt men im kōjerbal kapeel eo am̧ n̄an kwaļo̧k gospel eo.