Sikret blong Neva Foldaon Bakegen
Hem i moa simpol bitim we yu stap tingting long hem.
Ol pikja droing oli kam long Eric Chow
“Mi laekem blong no pas!”
Hemia i wanem we yu no harem plante pipol oli talem. Plante long yumi i no glad abaot fasin blong no pas. I save mekem man i harem nogud, sakemaot ol plan blong yumi, mo samtaem gat fasin blong sem.
?Be, olsem wanem sapos i gat wan sikret blong neva foldaon bakegen?
“Leftemap hed blong yu” maet yu stap tingting. I nogat wan I stret gud evriwan. Yumi evriwan i mekem mistek. ?Hao nao wan i no save foldaon?”
Thomas Edison i bin faenem sikret taem hem i mekem plante taem blong mekem laet balb. “Mi no bin pas 1000 taem” hem i bin talem. “Laet balb i bin wan invensen wetem 1000 step.”
Edison i no bin pas bakegen mo bakegen, be hem i no bin jusum blong luk long wei ia. !Mo hemia nao i sikret! !Jenisim lukluk blong yu! Taem yu jenisim lukluk blong yu, “fasin blong no pas” blong yu i save kam wan samting we i niu mo gud.
Hemia fo wei blong jenisim lukluk blong yu abaot fasin blong no pas:
-
Faenemaot wanem yu save mo no save kontrolem. Samtaem ol samting we yumi sori long hem moa nao yumi no save kontrolem. Eksampol, yu aplae from wan wok. Yu save kontrolem hadwok we yu putum blong aplae, be yu no save kontrolem ansa blong hem. Blong stap spendem paoa blong wari se yu “no pas,” traem putum efot long wanem we yu save kontrolem mo trastem Lod. Hem i bin promes se “God i stap wok long olgeta samting we oli stap kamtru long laef blong yumi, blong mekem i gud long yumi ya we yumi lavem hem.” (Rom 8:28). ?Mo sapos yu no kasem wok ia? !Yu yu no man blong no pas! Iven sapos yu no kasem ansa we yu stap gat hop from, yu bin givim bes efot blong yu, mo !hemia i sakses!
-
Yu tekem gud fasin mo stap gohed. Taem yu filim se yu no pas, traem blong lukluk moa long eksperiens blong yu. ?Yu no bin pat long ol spot tim? ?Gat wan harem nogud abaot mak blong wan tes? Blong lukluk long wea ples yu bin traehad long hem bae i givim yu wan bigfala map long wanem yu nidim blong mekem long fiuja. Sapos wan eksperiens i mekem yu filim nogud, luksave ol filing blong yu mo afta jusum blong muv i go fored wetem gud tingting. Fasin blong no pas i save helpem gud yu blong gohed i go fored long niu mo moa gud daereksen.
-
Tingbaot se hemia i no en. I gat wan toktok we oli stap talem se: “Evri samting bae kam oraet long en. Sapos i no oraet, hem i no en.” Moronae i tijim wan samting we i kolosap semmak. Hem i se, “En i kam finis? Luk mi talem long yufala, No; mo God i no bin stop blong stap wan God blong ol merikel” (Momon 9:15). Taem yumi trastem God, go fored wetem fet, mo tingbaot se ol stori blong yumi i no en taem wan samting i go rong, ol merikel i save hapen mo eni “samting blong no pas” we yumi save fesem i save kam sakses long en.
-
Stanap wetem Kraes. From Atonmen blong Jisas Kraes, i no gat wan samting we yu no pasem i save stap blong oltaem. Oltaem, yumi gat joes blong sakem sin, tanem ol hat blong yumi i go long God, mo askem help long Hem. Presiden Jeffrey R. Holland, Akting Presiden blong Kworom blong Olgeta Twelef Aposol, i bin tijim: “Nomata hamas mistek yu filim se yu bin mekem… , mi testifae long yu se yu no bin go longwe yet blong tabu lav ia i no save kasem yu. Hem i no posibol blong yu draon i go daon olgeta long laet ia we i no gat en we i laet blong Atonmen blong Kraes we i stap saen.” Mekem se, long wan wei, taem yu stanap wetem Kraes, !yu no save foldaon!
Taem yu lukluk ol samting we yu no mekem gud long hem olsem ol step blong go kasem sakses, yu openem sikret blong neva foldaon bakegen.
!Yu traem! ?Mo sapos yu no pas? Tingbaot nomo se—yu yu no pas tru. Yu stap mekem progres, wan step long wan taem.