Faenemaot olsem wanem faea naef danis blong Samoa i go wetem gospel blong Jisas Kraes blong ol seven yut long Hawae, YSA.
Ol foto i kam long Leslie Nilsson mo Marissa Couto
Sam pipol oli plei long piano. sam oli laekem blong ridim ol buk. Ol narawan oli mekem ol jimnastik, soka o jes. I no fulap, mo iven i had smol blong biliv, sam pipol oli laekem danis mo spinim ol naef we oli stap long faea.
Histri blong Danis blong Faea Naef
Danis blong faea naef danis blong Samoa, o ailao afi, i wan tradisen wo danis blong tedei. Hem i wan spesel talen, wan fom blong art mo stori, mo, blong plante, wan wei blong ona long kalja blong olgeta.
Hemia olsem wanem trufala yut blong Hawae, YSA i eksplenem:
Vivian, 18 yia: “Long tradisen, hem i wanem we ol man blong faet oli bin mekem wetem wan naef nomo. Afta, faea, mo spin oli ademap. Hem i kolosap semmak long danis ia we oli stap swingim stik blong wud (baton twiling), be nomo se hemia wetem faea long tugeta en.”
Tui, 12 yia: “Danis blong faea naef i tekem plante hit blong faea. Mo tu, i gat plante spin. Iven yu bangem naef mo muvum raonem yu taem yu stap spinim.”
Joseph, 18 yia: “Taem faea i stap muv, win i stap wesil, mo ol dram oli stap plei, hem i laod smol. Be blong ones, hem i wan kaen kwaet taem long saed blong spirit blong mi, from i gat bigfala mining long mi. Faea naef i wan wei we mi konek wetem famli mo kalja blong mi.”
Blong ol yut ia, danis blong faea naef i no wan naes mo t popula talen. Hem i tijim olgeta tu plante lesen blong laef we i gat valiu abaot stap kolosap long Lod taem yu laef folem gospel mo helpem ol narawan.
Gat Tras long Lod
Joseph A., 18 yia
Taem yu stap danis long faea naef, fulap samting i save go rong. Karasin i save go olbaot long handel blong naef, blong mekem i glis. Mo tu, win i save jenisim ol samting mo mekem se bae i had blong kajem naef. Blong stap trastem Lod taem mo stap danis i bin wan bigfala help long mi.
Wan long ol skripja we mi laekem tumas i Ol Proveb 3:5, we i tokbaot stap trastem Lod wetem ful hat blong yu. Mi ting se hemia i impoten from long taem we yu stap danis, yu luksave se yu bin go long evri praktis, be i tru se, i kam nomo long yu, faea naef, mo Papa long Heven.
Mi laekem blong prea long Papa long Heven, “OKEI, mi putum long praktis, naoia plis yu lidim ol han blong mi.”
Stap Mekem Rum blong Lod
Gary K., 16 yia
I gat plante priperesen we i blong ol faea naef kompetisen. Mi praktis evri dei blong sikis manis go kasem kompetisen.
Hem i save had tu, be, from taem tebol blong mi i bisi tumas. Be, oltaem mi mekem rum blong Lod blong go long jos, Yang Man aktiviti, mo seminari mo stap ridim ol skripja blong mi mo prea. Taem mi mekem ol samting ia, mi luksave se long dei blong mi i gat samting i defren. Evri samting i oraet gud nomo.
Mi save filim se Kraes i stap ia wetem mi. Sapos yu trastem Lod mo traehad blong putum Hem faswan, bambae Hem i helpem yu wetem wanem we yu nidim blong mekem.
Stap Kasem Strong Tingting mo Givim Insperesen long Ol Narawan
Vivian K., 18 yia
Taem mi stap gro i kam antap, mi bin luk ol angkel mo ol kasen blong mi oli danis long faea naef. Mi ting se hemia i naes tumas, be, mi no bin save sapos miwan mi save mekem. Long hae skul, mi mekem hemia i wan long ol gol blong mi blong lanem olsem wanem blong danis wetem faea naef. Afta we mi lanem, mi putum gol blong mi i kam moa klia: Mi wantem blong kompit long wan danis blong faea naef kompetisen.
Faea naef i helpem mi blong kasem strong tingting long miwan. Taem yu danis, i gat sam muv we yu sakem naef i go antap, wajem long ea, mo afta yu kajem bakegen. Fastaem mi bin stap ronwe long naef afta we mi sakem i go antap. Papa blong mi i talem long mi se mi nid blong putum mi fulwan long muv mo gat strong tingting long miwan.
Wetem insperesen blong ol memba blong famli, Vivian i kasem strong tingting blong karem stik faea.
Taem i pas, mi bin stat blong gat long miwan moa strong tingting taem mi stap danis mo long evri nara samting. Naoia i moa gud nao from samtaem ol gel oli kam long mi afta long ol danis mo talem se oli laekem mo wantem blong traem danis blong faea naef. Mi glad tumas we mi givim insperesen long ol nara pipol blong mekem samting we oli ting se oli no save mekem.
Tui i talem se, “Mi stap prea blong gat proteksen mo helpem mi blong gat wan gudfala danis.”
Winim Fraet tru long Prea
Tui M., 12 yia
Taem mi danis, mi no filim fraet. Mi filim wan glad. Mi lanem se iven sapos mi mestem, mi save jenisim i kam wan samting we i naes. Hem i kolosap semmak olsem peinting. Taem wan man blong peint i mekem wan mistek, bae oli mekem i kam wan samting we i niu. Samtaem mi mestem naef blong mi i foldaon, be mi pikimap bakegen mo gohed blong danis.
Blong leftemap tingting blong miwan i bin helpem mi bigwan wetem ol fraet blong blong mi. Be i no blong gat ol tingting olsem “?Bae i olsem wanem sapos mi stap mesmestem?” Mi traem blong gat moa tingting olsem“!Okei, olsem wanem sapos mi mekem gud!”
Mo tu, i kam wan samting long mi blong oltaem blong talem wan smol prea evri taem bifo wan danis blong faea naef. Mi stap prea blong gat proteksen mo helpem mi blong gat wan gudfala danis. Taem mi prea, mi filim se mi gat strong tingting blong bae mi mekem gud.
Manasseh T., 12 yia
Bifo mi danis long faea naef, oltaem mi stap fraet. Evri taem bifo mi stat, mi talem wan prea. Wantem, bifo mi stat mi talem wan prea, mo mi filim gud mo no fraet. Taem mi danis, mi filim olsem se wan i stanap long ples ia wetem mi.
Prea i helpem mi blong no filim fraet. Afta we prea, mi kam blong luksave se !mi stap gat wan gud taem!
Stap Serem wan Mesej blong Lav
Kawiki A., 15 yia
Long sama we i pas, mifala i bin danis long faea naef long Romania mo Bulgaria. Oltaem, papa blong mi i mekem mifala i lanem “Love at Home” (Hymns, no. 294) long lanwis blong ol kantri we mifala i visitim. Mifala i mekem hemia blong mekem se mifala i save singsing long hem tugeta olsem wan famli.
Mi ting se mesej blong lav long hom i impoten from i rimaenem yumi blong gat lav evri ples we yumi go. Mi filim se mi stap leftemap tingting blong ol nara pipol mo mekem olgeta oli hapi. Mo iven se samtaem oli no save toktok long lanwis blong mi, mi save se oli filim gospel we mifala i serem tru ol talen blong mifala.
Nainoa A., 13 yia
Mesej blong lav long hom i impoten from sapos ol pipol oli no save se i gat lav i raonem olgeta, bae oli save harem nogud. Taem i gat lav long hom, mi filim kwaet mo pis.
Stap Serem Laet tru Ol Talen
Faea Naef danis i wan wei we ol yut ia oli saenem laet blong olgeta mo serem ol talen blong olgeta wetem ol narawan. “Mi bin danis mo serem ol talen blong mi raon long wol wetem famli blong mi. I mekem mi filim glad insaed blong save se sapos yu sarem ol talen blong yu, bambae yu leftemap ol narawan,” Nainoa i talem
Brata blong Nainoa, Kawiki, i talem se faea naef danis i rimaenem mi long olsem wanem laet i winim tudak. Long hem, blong stap serem ol talen blong hem i olsem blong serem laet blong hem wetem ol narawan.
Joseph i talem se taem yumi saen, yumi saen blong Papa long Heven. “Taem yumi serem wanem we yumi gat, yumi no blesem nomo yumi, o blesem olgeta we yumi serem ol talen blong yumi wetem olgeta, be yumi givim pres tu long Papa long Heven.”
Vivian i talem se oltaem apu man blong hem i serem skripja ia Matiu 5:16, we i tokbaot letem laet blong yumi i saen i go long man. “Mi ting se i wan gud skripja from yu no nid blong kam gud long faea naef blong serem gospel. Yu kam save gud long eni samting mo yusum ol talen blong yu blong serem gospel long wei ia.”