Papa blong Yu long Heven i Wantem blong Toktok long Yu

Wan enjel i givim instraksen long Adam mo Iv mo evriwan we bae i folem tufala blong “sakem sin mo bae yu prea long God long nem blong Pikinini blong oltaem gogo i no save finis” (Moses 5:8).

Jisas i tijim:

• “Sapos yufala i wantem samting, yufala i mas … askem, mo yufala i mas … lukaot, nao bambae yufala i … faenem, mo yufala i mas … kilkilim doa, nao bambae doa i save open …” (Matiu 7:7).

• “Be taem yu yu prea, … prea long Papa … insaed long rum blong yu” (Matiu 6:6).

• “From hemia, yufala i mas prea long fasin ia: Papa blong mifala we i stap long heven, nem blong yu i tabu” (Matiu 6:9).

Jisas i gohed blong prea i go long Papa blong Hem (luk long Luk 6:12; Mak 6:46). Long Getsemane, Hem i talem long ol disaepol blong Hem, “Yufala i sidaon long ples ia, mo bae mi mi go prea” (Mak 14:32). Long kros, Jisas i bin prea from ol soldia we oli bin kilim Hem: “Papa, plis yu fogivim olgeta ya, from we oli no save samting ya we oli stap mekem.” (Luk 23:34).

Oli givim kaonsel i kam long yumi blong “prea oltaem.” Taem yumi “askem advaes long Lod long evri wok blong [yumi], bae hem i lidim [yumi] blong gud (Alma 37:37). Blong ademap, yumi “givim evri tangkyu mo pres we ful sol blong [yumi] i gat paoa blong holem” (Mosaea 2:20).

Be wanem we i gat moa glori, !Papa blong yumi long Heven i ansa long ol prea blong yumi! Wan kwestin blong tingting long hem i, ? Olsem wanem nao yumi save kasem gud mo andastanem ol ansa, daereksen, mo kamfot we i kam long Papa blong yumi?

Blong kasem ol ansa blong ol prea blong yumi i stat wetem fet long Papa long Heven mo Pikinini blong Hem, Jisas Kraes. Yumi trastem Papa blong yumi, mekem evri bes blong yumi blong kipim ol komanmen, mo lukaotem han blong Hem long evri samting (luk long Doktrin mo Ol Kavenan 59:21).

Papa blong yu long Heven bae i stap wetem yu, mekem yu strong long paoa, givim kamfot long yu, mo “konsekretem ol hadtaem blong yu blong oli kam wan blesing blong yu” (2 Nifae 2:2) taem yu prea long Hem.

Taem yumi soem fet long God mo kipim ol komanmen blong Hem, yumi lanem long nomol fasin blong harem gud voes blong Hem.

Long 1993, Presiden James E. Faust (1920–2007), olsem wan memba blong Kworom blong Olgeta Twelef Aposol long taem ia, i invaetem mi mo waef blong mi, Kathy blong go long wan divosenol long Brigham Yang Yunivesiti wetem hem. Divosenol ia i hapen gud bifo long ol smatfon, sosol media, mo intenet we i stap tedei.

Long toktok blong hem, Presiden Faust i givim woning se: “Long jeneresen blong yufala bae yufala i harem plante voes oli talem long yufala olsem wanem blong yu laef, blong mekem gud wanem we yu laekem, mo blong kasem evri samting.” Be “voes we yu mas lanem blong harem save hem i voes blong Spirit.” Blong mekem olsem, “yumi… mas openem ol sora blong yumi, tanem ae blong fet i go long stamba blong voes, mo lukluk nomo i go long heven.”

Sam yia i pas, Presiden Russell M. Nelson i tijim se, “Sapos yu stap lukluk nomo long mesej blong sosol media bitim blong yu lisin long smol voes blong Spirit, yu stap putum yuwan long denja long saed blong spirit.”

Voes blong Spirit i kam long, tugeta, maen mo ol filing blong yumi. “Yes, luk, bambae mi talem long yu insaed long maen mo insaed long hat blong yu, tru long Tabu Spirit, we bambae i kam insaed long yu mo bambae i stap insaed long hat blong yu” (Doktrin mo Ol Kavenan 8:2). Lisin long tingting blong yu—plante taem revelesen i stat long ples ia.

Ol ansa mo filing we i kam long God, Hemi no save fosem blong oli kam. Yumi prea mo wet wetem wan hat we i biliv. Sam ansa bae oli no kam long laef ia, be long ol ol gudfala man, oltaem Lod bae i sendem pis blong Hem (luk long Jon 14:27). Wanwan taem, ol ansa oli kam tru long “tijing folem tijing, rul folem rul” (Doktrin mo Ol Kavenan 98:12).

Voes blong heven i save kam plante taem long ol kwaet spes mo tabu ples long taem we yu no tingting long hem. Long kwaet taem blong eli moning prea blong mi, mi stap tingting hevi, mo mi faenem ol blesing we i blong wanwan taem. Evri dei, stadi blong yuwan long skripja we i nogat noes, truaot long ol taem blong rid, i save tekem voes blong Spirit i kam long ol hat blong yumi olsem faea wanwan taem.

Taem noes mo ol samting blong pulum tingting blong wol i stap tantanem raon long yumi, Lod i givim daereksen long profet blong Hem blong bildim moa mo moa tempol. Long tabu haos ia blong Lod, taem yumi putum ol jalenj blong yumi aotsaed mo go insaed wetem ol prea mo wari blong yumi, bae oli tijim yumi ol trutok blong taem we i no save finis. Wan yia i pas, Presiden Nelson i givim promes se taem yumi wosip insaed long tempol, “I no gat wan samting bae i openem ol heven moa. !I no gat samting!”

Mo tu, wanwan konfrens i tekem i kam ol bigfala blesing. Long manis Epril we i stap, bae yumi mit bakegen long jeneral konfrens blong harem voes blong Lod. Mi promes se taem yu rere mo prea blong kam long jeneral konfrens, bae yu faenem ol ansa blong ol wari blong yu mo save se “han blong heven” i stap stretem i kam long yu.

Gat fet se Papa blong yu long Heven i stap toktok long yu. !Hem i stap! Soem fet blong yu long Hem mo Pikinini blong Hem blong helpem yu seperetem vel mo kasem voes blong Papa blong yu. Mi testifae se Hem i stap long ples ia mo i lavem yu bitim we ol toktok i save talem.