Help blong Ol Had Dei

Oltaem laef i no wok long wei we yumi hop se bae i olsem. Yumi evriwan i laekem ol dei we i fulap wetem selebresen mo glad, be sam dei oli fulap wetem harem nogud. Long namba ia, bae yu faenem help blong ol dei ia (luk long pej 8, 14, mo 22).

Wan long ol skripja we mi laekem tumas, i gat insaed wan pis blong advaes mo wan promes blong ol had dei. Hem i rid olsem, “Yu mas gat fasin blong save wet longtaem long ol hadtaem, from we bambae yu gat plante; be stap strong agensem olgeta, from we, luk, mi stap wetem yu, go kasem en blong laef blong yu.” (Doktrin mo Ol Kavenan 24:8). Advaes hem i blong stap strong kasem en.

Stamba tingting blong, stap strong kasem en i minim blong stap strong long laef. Hemia i save had blong mekem, hemia from wanem mi laekem promes ia “Mi stap wetem yu” Promes ia i minim se yumi no nid blong go tru ol had dei yumiwan. Lod bae i helpem yumi blong stap strong long hem.

Nomata wanem i stap hapen long ol laef blong yumi, bes wei blong konek wetem Papa i tru long prea. Hem i stap long ples. Bambae Hem i harem mo ansarem ol prea blong yumi. God i harem mo toktok long ol pikinini blong Hem long ol gud mo nogud dei (luk long pej 2). Hem i bin promes blong stap wetem yumi.