Mekem Muv wetem Spirit
Papa long Heven i wantem toktok wetem yu. Hemia ol wei we yu save kipim komunikesen ia i stap gohed.
Papa blong yu long Heven i save mo lavem yu. Hem i harem yu taem yu prea, mo Hem i wantem blong toktok long yu. Faenemaot olsem wanem Hem i toktok i impoten—mo i defren blong yumi evriwan. Be plante taem, yu save luksave se Papa long Heven i toktok long maen mo hat blong yu taem yu mekem muv—mekem laef blong yu mo putum fet long aksen.
Gohed blong Stap Konek
Yu save kipim koneksen blong yu wetem Papa long Heven i open taem yu oltaem mo wetem tru hat prea long Hem. Stadi toktok blong Hem insaed long ol skripja. Lisin mo folem ol wokman blong Hem we Hem i jusum—ol profet mo ol aposol. Mo traem bes blong yu blong kipim ol komanmen blong Hem.
Blong gohed blong stap konek long Papa long Heven i tekem hapines mo mining i kam long laef blong yumi. Hem i helpem yumi blong andastanem gud plan blong Hem mo filim lav blong Hem. Yumi luksave taem Hem i toktok, taem yumi traehad blong stap long gudfala bodi long saed blong spirit.
Stap Kwaet
Insaed long ol skripja, Lod i rimaenem yumi blong “stap kwaet mo save se Mi, Mi God” (Ol Sam 46:10; luk tu long Doktrin mo Ol Kavenan 101:16). Wol ia i fulap long noes mo ol samting blong pulum win, be Papa long Heven i no laod o mekem noes. Hem i toktok long wan “kwaet smol voes” (1 King 19:12). Yumi save luksave paoa blong Hem taem yumi stap kwaet.
Eksampol, faenem wan kwaet ples blong prea, tekem taem blong stap raon long ol naesfala kriesen blong God, o filim gud long miusik mo art we i givim insperesen. Ol samting ia oli helpem ol maen mo hat blong yumi blong oli open long ol spesel eksperiens wetem Papa long Heven.
Folem Ol Toktok blong Spirit
Papa long Heven plante taem i toktok long yumi tru long ol smol kwaet voes. Be, ?olsem wanem nao bae yumi save gud sapos wan smol kwaet voes ia i kam long Hem? Profet Momon i givim gaed long yumi se: “Evri samting we i stap invaetem mo switim man blong mekem samting we i gud, mo blong lavem God, mo blong wok blong hem, i kamaot long God” (Moronae 7:13). Presiden Gordon B. Hinckley (1910–2008) i bin talem wantaem se: “Hemia nao tes, taem oli talem mo mekem evri samting. ?Hem i stap winim tingting blong wan blong mekem gud, blong girap, blong mekem raet samting, blong stap kaen, blong yu gat gudfala hat? Sapos yes, nao Hem i Spirit blong God.”
Plante taem, wan smol kwaet voes i blong “go mo mekem” (luk long 1 Nifae 3:7) o blong talem wan samting. Taem yumi mekem folem ol smol kwaet voes ia—speseli faswan taem yumi filim—moa eksperiens bae oli kam. Spos yu filim se yu sapos blong talem o mekem wan samting we i gud mo i stret, !mekem! Konfemesen se yu stap long raet saed i kam taem yu mekem wan muv.
Go Fored wetem Fet mo Tras
Blong luksave taem God i toktok i wan proses. Hem i nidim tugeta, fet mo tras se Papa long Heven bae i toktok long yu mo helpem yu blong mekem moa bitim wanem we yu save mekem yuwan. Mo tu, hem i impoten blong tingbaot se Papa long Heven i trastem yu i no blong lukaotem gaed blong Hem long laef blong yu nomo be tu, blong blesem mo leftemap olgeta we i stap raon long yu.
Oltaem bae yu no kasem evri ansa. Yu no sud stap tingting long hem. Be oli leftemap tingting blong yu blong putum fet long aksen. Sapos yu mekem, bae yu faenem se God i save toktok long fulap wei bitim we yu save tingbaot. Taem bae i kam, we voes blong Hem bae i kam klia, daereksen blong Hem bae i kam moa klia, mo bae yu luksave ples blong Hem moa blong helpem yu kam huia we Hem i save yu blong kam.