Stap Yusum Gaed
Aes Krim, Frensip mo Stap Lavem Neba blong Yu
Blong kipim bigfala seken komanmen i no had olsem we yu stap tingting long hem.
Ol pikja droing oli kam long Valentina Vinci
Taem wan fren o famli memba i stap go tru wan had taem, ?yu yu stap wari long olsem wanem blong mekem problem blong olgeta i gowe? Luk olsem wan gudfala aedia aotsaed.
Be traem tingbaot, sapos papa mo mama blong fren blong yu i divos. O oli stap jikim smol sista blong yu long skul. O apuman blong yu i stap faet agensem sik long tingting. ?Olsem wanem nao bae yu fiksim evri samting ia?
Sot ansa hem i yu no save. Mo hemia i Oraet. Long semtaem, oltaem bae yu save help. Mo bae yu sapraes hamas wan smol help i save tanem ol samting i kambak raon.
Bigfala Hadtaem, Simpol Kaen Fasin
Foni P. i bigwan insaed long hom wetem wan singgel mama. Long taem we hem i pikinini mo yangfala, Foni i luk mama blong hem i fesem hadtaem blong lukaotem tri pikinini hemwan. Olsem wan risal, Foni i stap gat ol nogud filing abaot papa blong hem. I no long taem i pas, afta we hem i gat 19 yia, papa blong hem i stat blong kamkamaot blong traem mo konek wetem hem.
Foni i talem, “Mi no bin glad.” “Tingting blong mi i we, ‘Hem i gat 19 yia blong kam long laef blong mi be hem i no bin kam. ?From wanem naoia?’” Nomata se hem i prea mo tingting hevi, Foni i no save faenem pis yet. Blong stap toktok wetem mama mo anti blong hem i bin help smol, be yet, i lego hem wetem filing blong konfius. Be afta, wan samting we i gud (be i simpol) i hapen: bes fren blong Foni i invaetem hem blong go aot blong dring aes krim mo soping.
“Plante man bae i luk hemia mo tingting se hemia i no wan bigfala samting,” Foni i talem, “be !hem i minim bigfala samting long mi!” Mi filim san long skin blong mi. Mitufala i stap wokbaot aotsaed, mo mi stap lukluk ol tri. Mi filim win, mo mi filim Spirit long semmak taem. Hem i bin naes tumas.”
?Soping trip ia we oli no mekem plan from i fiksim ol problem blong Foni? No, i no fiksim. Foni i talem se rilesensip blong hem wetem papa blong hem i stap yet olsem wan jalenj. Be simpol aksen blong kaen fasin blong fren blong hem i helpem Foni blong filim Tabu Spirit bakegen. Blong hem i save fesem jalenj blong hem wetem moa paoa. Foni i serem se, “Mi save se Tabu Spirit i bin lidim hem blong tekem mi go aot long haos.”
?Huia I Nidim Yu Tedei?
Insaed long Blong Ol Yut Oli Kam Strong gaed, oli invaetem yumi blong “go aot mo go lukluk olgeta we oli filim se oli stap olgetawan, oli sore, o oli no gat help. Helpem olgeta oli filim lav blong Papa long Heven tru long yu” (Blong Ol Yut Oli Kam Strong: Wan Gaed blong Stap Mekem Ol Joes [2022], 12). Simpol aksen blong frensip ia i helpem Foni blong filim lav blong God long taem blong wan taf situesen. ?Huia nao yu save helpem blong filim semmak lav ia tedei?