Te Burabeti ao Ana Tia Kamaiu
N aron ae taekinaki, rongorongon Kaokan Bwaai bon rongorongon Iotebwa Timiti ngke e rangi ni kaan ma te Tia Kamaiu.
A na Katorobubua Bubua ni Wae ni Bane,, iroun Dan Wilson
Karakinan maiun Iotebwa Timiti bon te rongorongo ae raka arona.
Ngkana ti karakina taekan Kaokan ana euangkerio Iesu Kristo, n tainako ti moanna man rongorongon Iotebwa Timiti. Ao anne e boni mataata. E bon karakina rongorongon maiuna n taai ake ngkoa tabeua taai aika a kakaokoro ngke e buokiia aomata bwa a na ataia bwa e kanga ni waakinaki Kaokan bwaai. N te namakin, rongorongon maiun Iotebwa Timiti bon rongorongona ngke e a rangi ni kaan ma Iesu Kristo.
Te Mii ni Kabwarabure
E namakina te mangaongao n taekan te aro te ataeinimwaane ae Iotebwa Timiti. Ao iai te namakin ae raka riki are e a kaunga nanona bwa e na tataro n te buakonikai n te tabo are e moan karekea iai te Moan Mii ni Burabeti: “I namakinna ae N na tang ibukin oin au bure.”
Ngke e taetae te Tia Kamaiu nakon Iotebwa, E taku, “Iotebwa, natiu te mwaane, a kabwaraaki am bure.”
E ataia Iotebwa n te moan tai ae e maiu Iesu Kristo. E ataia naba bwa Iesu Kristo e nanoanga ao ni kabwarai buure. Iai kakawakin te atatai ae onoti aei iroun Iotebwa. “Kamiauan tamneiu bon te kabanea ni kakawaki irou [ibukina] bwa I atai koauan bwaai aika akea tokiia,” e taku.
Te atatai aei ibukin Iesu Kristo e rangi ni kakawaki naba n te mwakuri are e weteaki iai Iotebwa bwa e na karaoia ngkai te burabeti ngaia. E kaota ana koaua ae moan te mwaakaroiroi n ana akoi ao ana nanoanga Iesu Kristo inanon maiuna ae bwanin. N aron te katooto, e reirei n te taina, “A riai naano ni kabane n rairi nanoia ao n itiaki, ao e na mutiakiniia te Atua ao ni kakabwaiaiia n te aro are aki kona ni kakabwaiaaki ni kawai riki tabeua.”
Kaairua ao te Nanoanga
Te mwakuri are e weteaki iai Iotebwa Timiti e rangi ni kakawaki. Ao e ataia Iotebwa bwa e riai nai ni kawakin ana tua ma ana reirei te Uea ma nanona ni koaua, rinanon kaairua ake e karaoi.
N aron te katooto, ngke a bua manin koroboki man baan ana Boki Moomon, te Uea e anaa te bwaintituaraoi n te rairairi mairoun Iotebwa ao e taku nakoina imwiina: “Ai mwaitira am tai ae ko a urui ana tua te Atua. … Bwa ko riai n aki maaka te aomata nakon ao ko na maaka te Atua (Reirei ao Berita aika Tabu 3:6–7).
Ma iai naba ana rongorongo te Uea ibukin Iotebwa: “Ma uringnga, bwa te Atua e nanoanga; ngaia are, raira nanom” (Reirei ao Berita aika Tabu 3:10).
E raira nanona Iotebwa ao e anganaki te bwaintituaraoi n rairairi. E taraa ni kammaraki te taneiai ae bwanin aei nakoina, ma e reiakin reirei aika a kakawaki—n raonaki ma te kona n rairi nanora ao ni kakabwaiaaki ibukina bwa e nanoanga te Uea.
Te Tia Kamaiu ao te Rao
E mwaiti miin ni burabeti Iotebwa Timiti, kakawarana irouia anera, ao kaotioti are e noora ao n ongo bwanaan te Uea Iesu Kristo ke n reiakina aron Rikina, anuana, ao ana mition (taraa, n aron te katooto, Reirei ao Berita aika Tabu 19; 76; 93; 110).
Teuana te koaua are e reiakinna bwa ana mwakuri ni kabooan maiura bon ibukiia aomata ni kabane ake a maeka n te aonaaba aei—ao aonaaba ni kabane are a maeka iai natin te Atua mwaane ao aine (taraa Reirei ao Berita aika Tabu 76:24).
N te tai naba anne e reiakina aron korakoran ana mwakuri te Tia Kamaiu, e reiakinna naba Iotebwa bwa Tamara are i Karawa ao Iesu Kristo a kinaira ao a tangiriira n tatabemaniira nako. A tangiria bwa e na rang kaan aia reitaki mangaira n tatabemaniira nako. A tangiria bwa ti na karaoi berita aika tabu, ni kawakinii, ao ni kakaonimaki ni uaa te toki. Te reitaki ae rangi n nano aei e na anganiira te kimwareirei ao te onimaki.
Oin ana reitaki Iotebwa ma Tamara are i Karawa ao Iesu Kristo e rikirake n nano bwa teuana te tai are ngke e kaitara ma kangaanga inanon maiuna, ngke e rokanaki n te Karabuti i Liberty, e taetae ni kangai:
“I kataia ni kukurei ao n rauaki inanon maiu, n ataia bwa te Atua bon raoraou. Irouna ao I kona ni kunea te raunnano. I anga maiu nako nanon baina. I tauraoi n nakon ana wewete. I tangiria bwa N na mena irarikin Kristo.”
Ngkai ko kamatebwaia maiun Iotebwa Timiti ao ana reirei, ko kona n iriira ana banna ni kakairi. Raira nanom, karaoi ao kawakin berita aika tabu, ao teimatoa ni kakaonimaki. Ngkanne ko kona naba n ataia bwa bon raoraom te Tia Kamaiu.