Katean Mweenga ao Kakoaua
Ana bitineti Sarah iaon te kateitei e a rikirake. Ma iai te babaire ae e na karaoia.
Korotamnei iroun Christina Smith, n tii akana a kaotaki
Ibukin Noa, bon te aake. Te Uea Beniamina e katea te taua. Tarin Iareta e karaoi bwaati. Ao tera iroun Sarah Christensen mai Montana, USA? Eng, e baireia bwa e tangiria ni katei taian auti.
Hermana Christensen, ngkai te mitinare ae bwanin ana tai ni beku i Minnesota Minneapolis Mition, n te taina ao e tabeaianga bwa te mition e a katabetabea ana kouru iaon te kateitei—ao bon tiaki oin ana mition!
Tia moanna mai moana.
“I a tia ni bubuoka tamau ni katei bwaai inanon maiu,” e taku neiei. “I a taneiai ni kabonganaan bwaai ni mwakuri aika korakora ao te kateitei, ao I a rikirake n tatangiria. Ngaia are, ngke 16 au ririki, I a baireia bwa N nanga waakina au bitineti iaon te kateitei.”
“E a tia n reireinai tamau aron kanimwakin bwaai, man kairababa aika uoua nakon te auti ae bwanin,” e taku Sarah.
Katean te Bitineti
Sarah e moan katamaroa te auti n te ririki teuana n tain te tiamwa. E rangi n tangiria n te aro are e a manga anaa teuana riki te karikirake iaon te katamaroa n te ririki are imwiina. N tokina, e baireia bwa e na karaoa te karikirake ae bubura riki—te auti ae “rang tamaroa”, ke te auti are ngaia ma ana tiim ni kaonturaeki a na kateia man aan te kateitei ni karokoa e tia, ma te kantaninga bwa a na kabonakoa ni karekea te raka mai iai.
Te bong n Urubeke! Sarah e uota te aama nakon te roki are e na urua n ana karikirake teuana.
Waakinan te karikirake n te bitineti e aki beebete, riki ibukina bwa Sarah e bon tabetabe n ana reirei n te kauarinan ao n te biri are e rinuukan te aba.
Sarah e waakina oin ana kambwana ni kateitei ngke 16 ana ririki.
“E rang mwaiti bwaai aika I reiakin,” e taku. “N na bae ni kabongana te tiekiboki ni kabooia aomata, are I tuai kakaraoia mai imwaina. N na riai n ata arou n taetae nakoia ianena ake au taan ibuobuoki. N na riai naba n rabakau arou n rinanon te rawawata ni kabutan te kambwana, are e bon aki manikangare. Iai te raraoma n tainako bwa ko aki kona ni karekea te mwane are kainnanoaki nakon mwaitin boona ao ana karekemane riki ni kabonakoan te auti.”
Aki Maroa
Ma e ngae ngke iai te raraoma ao te rawawata are e airi ma kabutan te bitineti, Sarah e aki maroa ni kaitara miina ae bubura n ti ngaia.
“E nakoraoi n tainako, ao I ataia ibukina bwa iai te Uea,” e taku neiei. “Te bitineti aei e aki beebete ngkana akea Ngaia. E buokai rinanon bong aika aki nakoraoi, te mwakuri ae matoatoa, bwaai ni kabane.”
Te reitaki ae toma raoi are e reke iroun Sarah ma ana utu e roko man te reitaki ni mwakuri.
Ana utu Sarah a boutokaia naba n aanga nako—are e kairiira rikaaki nakon te mition are e katabetabea ana iango.
Mwanena are ikawai riki Tyler e baireia bwa e na buoka Sarah ni katea te auti ngkana e okira mweengana man ana mition. Ma n te bong teuana, e tareboniia ma te rongorongo are e tia n tuangaki bwa e na reita ana mwakuri ni mitinare.
“I rang un irouna,” e kaotia neiei. “I taku, ‘Tyler, ko aki kona ni butimwaea anne. I a tia ni kaman baireia aei.’ Ao e taku, ‘E kakaawaki riki ana mwakuri te Uea nakon am mwakuri.’ Anne ae kamamara nanou. I ataia bwa e eti are irouna ao I riia n onimakina ana babaire te Atua.”
Ana utu Sarah a butimwaea mwanena n okiran mweengana imwiin reitan ana mition.
Tamnei n anganano iroun Sarah Christensen
Ngkana e karekea te ibuobuoki mairoun tamana ke te ibuobuoki mairoun Tamana are i Karawa, Sarah e ataia bwa e aki maroa.
Te Mition are Bon Ana Tai
Ana banna ni katooto Tyler e kaunga nanon Sarah bwa e na waakina ana iango ni beku iaon ana mition. “I ataia ni mwaitiia aomata ake e buokiia mwaneu n roko nakon Kristo, ao I a tia naba n noora arona boni ngaia n nakon Kristo. I tangiria naba ni kareke te taneiai ae aron anne,” e taku Hermana Christensen. “I waaki n taua ma nanou ni kamatebwaia te euangkerio ao I kunea bwa e rikirake au kakoaua ao au reitaki ma au Tia Kamaiu, ao mwaitin riki are I kan tibwaia are I karekea.”
Sarah e karaoa ana rinerine bwa e na katuka ana bitineti iaon te kateitei ao e na beku ibukin te Uea. Te babaire aei e a tia n anganna te taratara ae boou ae raka riki.
“Te bwai are rang rianako are I reiakinna n au mition bwa te euangkerio e biti maiuia aomata aika a mwaiti,” e taku Hermana Christensen. “Ibukina bwa I ikawairake inanon te Ekaretia e bon matoa irou noorakin kakawakin te euangkerio inanon maiu.
“Ikai iaon au mition, I katobibiaki irouia aomata aika aki ata rongorongon Tamara are i Karawa ao Iesu Kristo. Ngke a reiakinna bwa ngaiia natin te Atua ao iai Ana babaire ibukiia, e biti maiuia. Bon te bwai ae moan te tikiraoi are I a kakoaua iai ao n riki bwa mwakorona. I ata anne imwain au mition, ma ngkai I ataia bwa ana euangkerio Iesu Kristo e kakaawaki ibukin te kimwareirei n te aonaaba aei ao n te aonaaba ae e na roko.”
Hermana Christensen (angatai) ao toana Hermana Taylor (angamaing) a tatangiria ni beku n aroaro nako ake a kona.
Tamnei n anganano iroun Sarah Christensen
Te onimaki iaon te Maaku
Kairake ake tabeman ake a iangoia te beku n te mition, Hermana Christensen e taku, “Onimaki ao tai maaku. Te nako ni Mitinare e aki beebete, ma e uaana. Te Atua e na kakabwaiako ni kawai aika ko aki kona n iangoia ngkai ko karaoa am babaire bwa kona riki bwa temanna Ana toro.”
E ngae ngke e aki reke ana tai ni katei auti ngkai e beku, Hermana Christensen e aki tang nanona n ana babaire. “E koaua, e na iai te kona n rikirake nakon au bitineti are e na reke ngkai e a bwanin au tai ni mitinare,” e taku neiei. “Ma I ataia bwa te Uea e na kakabwaiaa au anganano ni katikua moa n te tai ae uarereke. E kona n tataninga au bitineti, ma ana mwakuri te Uea e bon aki kona!”