2025 Aia Kibu ni Koora Kairake
7 Kawai n Tanimai nakon Kristo
Katai katei aikai ni katokaa matam iaon te Tia Kamaiu.
Kamwakuran aia kibu ni koora kairake ibukin te ririki aei—“Tanimai nakon Kristo”—e kaota teutana te kakaewenako. Ko na kanga n tanimai nakon temanna are e aki kaoti n rabwatana? Moanna ma anua aika itiua aikai.
1. Uringnga bwa E aki Karabaa
Eng, ko riai n tanimai Nakoina. Ma E tangiria bwa e na kuneaki! Tiaki te takakaro are te ikaraaba ao te ikakaae. E ingainga nanon te Atua ni kan kakabwaiako—ni koauana, e rangi ni kukurei iai (taraa Reirei ao Berita aika Tabu 41:1). Tiaki te bwai ae e na kakaea bukina bwa e na kaakiko bwa ko aki tau. Boni kaitaraana: E aki toki ni kakaeko bwa e na kakabwaiako. N aron ae taku Unimwaane Patrick Kearon man te Kooram n Abotoro n te Tengaun ma Uoman, “Tiaki, [te Tia Kamaiu] e aki katei bwaai ake a na tuuka kawaim ke bwaai n totoko; E kamwaawai ni kanakoi. E aki katinanikuko; E butimwaiko bwa ko na rin. Ana mwakuri ae bwanin bon kaotan nanona aei”
2. Kinai Aroarona inanon Maium
E kukurei te Uea ngkana ti “kakoauai …ana mwakuri ni bwaai ni kabane” (Reirei ao Berita aika Tabu 59:21). Ngaia are kakoaua raoi bwa ko kinai aroarona inanon maium! Anganna am kakaitau ngkana a nakoraoi bwaai ibukim ao ukora te rau ao te atatai ngkana iai te aki nakoraoi.
3.Bwaina te Kakaitau ni Bwaai ake Ko Karekei
N raonaki ma kinakin aroaron te Uea inanon maium, e bon kakawaki naba bwa ko na namakinna—ao ni kaota—te kakaitau. Ko na bae n aki kona n “noora ” te Tia Kamaiu n te maiu n rabwata, ma ko kona n noori Ana kakabwaia inanon maium! E taku Unimwaane Gary B. Sabin man te Itingaun, “Ko na bon aki kona ni kukurei nakon ae ko na rangi ni kakaitau riki.” Kakaitau nakon te Uea ni katoa bong ibukin ana kakabwaia. Ngkana ko namakina te rawawata, touamwiin te taeka n reirei man te anene n taromauri are ngkoa: “Wareki am bwai; atong araia, ao e na mimi nanom iroun Iesu.”
4. Tataro ni Katoa Bong
Ko na kona raoi n “noora” te Tia Kamaiu inanon te bong ae bwanin ngkana ko moana am tataro nakon Tamara are i Karawa. Butiia bwa e na buokiko n uringa te Tia Kamaiu ao ni kinai Aroarona inanon maium. Ko kona n tataro ni mwaitin are ko tangiria inanon te bong anne. Ao imwaain matuum, manga tataro riki n tuanga Tamara are i Karawa bwa e uara kanoan am bong. E aki kona ni kua n ongongora mairoum!
5. Kamatenanoi Koroboki aika Tabu ao Anene n Taromauri
Teuana te anga ae e na kateimatoa am iango iaon Iesu Kristo bwa ko na kamatebwaia taekan te kibu ae mamate nanom iai ke taekan te kuna ae kaunganano ae tiku n am ururing. Kataneiako n ururingii ngkana iai namakin aika a buakaka aika a rin inanom. Kamwaita am tai n ururingnga (ao n anene ni karaurau) atuun te anene n taromauri ae tau ni kairiira am iango: “Ngai natin te Atua.” I kainnanoiko ngai.” “E bon rau, tamneiul.”
6. Taraa tamnein te Tia Kamaiu
Kakaei tabeua korobanna aika tamnein te Tia Kamaiu ake ko nano iai, ao katokai n te tabo are ko na kona n noori n taainako. Tabeua taabo tao iaon am oo inanon am ruu ni matu, iaon am tirotaam inanon te roki, ni nnen am bwai n te reirei, ke ni karaoia bwa tamnein am kaombiuta ke iaon am tareboon.
7. Taraa te Aonaaba ae Katobibiko
E tamaroa! Ao e karaoia te Tia Kamaiu ibukim (taraa Reirei ao Berita aika Tabu 14:9)! Akea bukina bwa ti na ataia ae te aonaaba e bon rangi n tamaroa. Tao ti na kona ni kabanea ara tai n te maiu ae mamate n te aonaaba ae e rinano man booraoi, e tikuea, ao ni kureei. Irarikin anne ao e karika te aonaaba te Tia Kamaiu “ibukin kabwaiaia aomata ao buokaia, bwa a na kakukureia te mata ao te nano naba” (Reirei ao Berita aika Tabu 59:18). N taekana teuana, e tamaroa te aonaaba ibukina bwa bwaai aika a tamaroa anganiira te namakin ae kakukurei. Ngkana ko tangiria bwa ko na ururinga te Tia Kamaiu, nakonako katobibi n tarai bwaai akana irarikim.