Tanimai Nakon Kristo

Kailey ae tebwi ma itiua ana ririki e a tia ni kaina te tiim ni kaungaunga imwain reken ikoakin ana kaburoro imwiin te kabuanibwai. Ibukin kamarurungana e aki ira te reirei, ao e a moanna n roko namakinan te tionako ao te maroa. E rootaki ana namakin ao e aki ata te tabo ae e na karekea iai buokana. Te rao e tuangnga bwa e na ongora irouia mitinare. A reireinna taekan ana Mwakuri ni Kamaiu Iesu Kristo. Reiakinan riki rongorongon Kristo e anganna te onimaki ma te namakin ae kaanga bon te Atua ae e anganna te kakorakoraki.

Kailey e tuanga tinana, “I tuai n namakina ae te Atua e tangirai ma imwaina. Ma n te tai aei ao I ataia bwa E tangirai.”

Tinana, Michelle, e kubanako. Ngaia ma kainnabana, Brock, a kitana ana Ekaretia Iesu Kristo ibukiia Aika Itiaki ni Boong aika Kaitira ngke itiua ana ririki Kailey ibukin aia kau titiraki, nanokokoraki, ao tabeaiangaia. Aia kantaninga bwa natiia te aine e na kukurei riki ngkana akea bootaki ao tuua ni kabane.inanon maiuna. A aki iangoia bwa aia rineirne e na kararoa Kailey man reitakina ni kaniiaki nakon te Atua. Ngkai Michelle ao Brock a taratara aron Kaily ni bitaki, a ataia e a bon maan aroia ni kaman namakina te kaniiaki nakon te Atua, ao a tangiria ni manga namakina riki anne.

A kaitibo ma aia bitiobi, ao n te tai ae uarereke te utu, n raonaki ma mwanen Kaily ae Braeden, a okira te Ekaretia. Namakinan te kaniiaki nakon te Atua ao ni manga reitaki ma Ngaia—riki rinanon te tataro—e a kaoka aia onimaki. Okiran te ekaretia e aki kabuai ni kabane aia titiraki ke aia tabeaianga, ma a ataia bwa karekean te reitaki ma te Atua ae korakora riki i bon irouia e bon kakaawaki riki nakon aia aki kakoaua.

Ni kabane aikai a waaki ngke te rao—te tebwitabun n ririki n ai arom—e kaoa Kailey bwa e na tanimai nakon Kristo. Ao e karaoia neiei!

E taku te Uea, ‘Tanimai nakoiu n ami iango n taai nako; tai nanououa, tai maaku’ (Reirei ao Berita aika Tabu 6:36). Aio te kaunganano iakuun ana Botoniango te Roronrikirake n 2025. Kariaia bwa tina tibwa aron ae ko kona n rineia bwa kona onimaki iaon te nanokokoraki ao n onimaki iaon te maaku ngkai ko tanimai nakon Kristo:

Tamara W. Runia

Ngkana I reke n te kangaanga, e buokai n tainako iangoan ae kanga Iesu Kristo ma baina aika tangaina. Ngkana I tanimai nakoina, I uringa taekan te kuna, “N na Nakonako ma au Iesu”: “E na bon aki kitanai, riki ngkana I bwaka.”

Emily Belle Freeman

Ngke I wareka te botoniango man koroboki aika a tabu, I uringa Betero iaon Namani Kariraia. Katikan ana iango nakon te buaka e karikirakea maakuna ao ana nanokokoraki, are e a inako iai n naon buakan taari. Ma kabotoan am iango iaon te Tia Kamaiu e anganna te konabwai ni katia te bwai are tuai karaoia mai imwaina: e nakonako iaon te ran! E bon kamiimi, e koaua. Tera ae ko kona ni katia ngkai ko tanimai Nakoina?

Andrea Muñoz Spannaus

Ngke I tabe n namakina te maaku, n aki taraia bwa I mena iaa ke tera te tabo are I mena iai, e bane au iango n iangoan au reitaki ma Tamara are i Karawa ao Iesu Kristo. I kaokiokia n au iango tabeua te tai: NGAI NATIN TE ATUA. I reitinako ni karaoa aei ni karokoa I a namakinna bwa I a nakoraoi. E mwakuri n taainako!

Bradley R. Wilcox

Titirakiniko bwa antai ae tabeaianga riki iroum ao n tangiriko riki. Am karo ao taan kairiiri n te Ekaretia? Aomata ake iaon bwaai n reitaki are ko kona ni warekaki bwa te mwaiti? Tanimai nakon Tamara are i Karawa ao Iesu Kristo. A bon mwamwannano!

Steven J. Lund

Uringnga bwa ko kauringaki bwa ngkana ko kaokioka n am iango aia botoniango te Kooram n Nakoanibonga ae te Aaron ao aia botoniango ataeinnaine: Ngkoe natin te Atua te mwane ao te aine. Onimaki bwa Tamara iai ana baire ibukim. Tanimai Nakon Kristo nanona bwa noorakin Ana Mwakuri ni Kamaiu e mena i nuukan te babaire anne.

Michael T. Nelson

Warekan koroboki aika a tabu bon te tanimai Nakon Kristo! Nanokokoraki ao maaku a na bua ngkai ti kauringaaki n ana kakai ao ana reirei Iesu. Ti kabwaia bwa ti kona ni karekei Ana taeka. A rooti aroaro nako ake ti rinanona inanon maiura.