Kaekaakin Au Titiraki iaon Rongorongon te Ekaretia

N au kiraati n te History, au tia reirei e waaki ni maroroakina taekan ana Ekaretia Iesu Kristo ibukiia Aika Itiaki ni Boong aika Kaitira. E aki rang tamaroa ana iango iaon te Ekaretia. E taku bwa a mwaiti buuia ao a kairiribai nakoia reeti tabeua.

Bwaai ni kabane ake I a tia n atai iaon te Ekaretia e a mataata irou. Ma au namakin n te kiraati e anganai titiraki tabeua aika a matoatoa man rongorongon te Ekaretia, n aron tera bukina aki kariaiakaki aomata aika a bwatabwata bwa a na karekea te nakoanibonga n te tai anne, ao bukin tera e karaoa te iein ma ae e mwaiti buum.

Ibukin anne, I a rang n iango, tabeaianga, ao n tataro. I wareware man koroboki aika a tabu, marooro ma au karo ao taan kairiiri, ao n reiakinna ae mwaiti riki i bon irou. E ngae ngke iai au titiraki, e aki bwara nanou ke ni kan konaaki.

Ngke I kamatebwai ao I a ataia, kanga I namakina ae I uouotaki. I teimataoa n aki bwanin au atatai iaon bwaai ni kabane, ma I a kona ni karekea te rau.

Ngkai ngkana iai au titiraki, I taua are I a kaman ataia, n aron taneiai ni kabane ake a tia ni buokai ni karikirakea au kakoaua. Ngkana iai te bwai ae I aki ataia, n taainako bon te tataro are I taneiai n nako iai, ao imwiina I kataia ni kakauongo nakon te Tamnei ngkai I wareki koroboki aika a tabu.

Te ririki ae nako aei, I a tia n ataa mwaakan te Tamnei, ao I a tia n namakina te rau ao te raunnano ao te tangira. I ataia bwa bon iai te Atua are e taetae nakoira ao e tangiriira bwa tina okira mweengara.