Te Rongorongo ae Kakukurei Ibukim ao te Aonaaba
Ko kona ni karekea te rongorongo ae kakukurei ibukin te tangira ao te kimwareirei ibukina ngkai e a tia Iesu Kristo ni kaoka Ana Ekaretia bwa aonga ni kakabwaiaaki natin te atua ni kabane.
Te Buakonikai ae Tabu, iroun Al Rounds
Ara rongorongo ibukin te kantaninga ao te rau nakoia aomata ni kabane bwa e maiu Iesu Kristo ao e a tia ni kaoka Ana euangkerio ao Ana Ekaretia ni boong aika kaitira. “Ai bon mimitongira aron kabwarabwaraan bwaai aikai nakoia reeti n aomata nako!” e taetae te Burabeti Iotebwa Timiitit. Bon taian “rongorongo aika a korakora kakimwareireia nakoia aomata ni kabane… are a riai ni kaona te aonaaba ao ni kakukurei nanoia aomata n tatabemaniia ngkana a ongo i taningaia.”
Rongorongo aika a kakukurei aikai bon te kaotioti ae nano ibukin ana tangira Tamara are i Karawa ao ara Tia Kamaiu ae akea tiana. A na kakabwaiaiia aomata ni kabane ao ni katauraoa te aonaaba ibukin te bong are e na manga oki iai Iesu Kristo. I kimwareirei bwa I kona ni kamanena maiu aei n tataekini koaua aikai ni kabuta te aonaaba.
Moaningabongin te Mangauti, iroun Sarah Hatch
Ae Kangaanga n Riki ao Ae Rangi ni Kamiimi
N te buakonikai, te Atua te Tama ao Natina, Iesu Kristo, a kaoti ao a taetae nakon Iotebwa Timiti ni kaekaan ana tataro Iotebwa ibukin ukoran te aro ae koaua (taraa Iotebwa Timiti—Rongorongo 1:16–20). Iesu e tuanga Iotebwa bwa akea te aro ae e na kaainna. E berita bwa bwaninin Ana euangkerio e na kaokaki nakon Iotebwa n taai aika a na roko.
Irouia aomata, tima taraan ae e na aki kona ni weteaki Iotebwa nakon te mwakuri ae moan te kakawaki aei. N aia taratara, bon tii te ataeinimwaane ae aki reirei ae roko man te tabo n ribana ao n ununiki. Ma rinanon Iotebwa, Tamara are i Karawa ao Iesu Kristo a karaoa te bwai ae koaua ae moan te kamiimi. Iotebwa e anganaki tuua, kaotioti aika a onoti, ao reirei aika a rangi ni kakawaki ibukin ana babaire n tangira Tamara are i Karawa ao ana tangira ni kaboomwi Iesu ao ana Mwakuri ni Kamaiu ni kakabwaiaira ao ni buokiira bwa ti na ataia bwa ti na kanga ni manga okira mweengara.
Te Tia Kakoaua ae Mwaakaroiroi ibukin ana Tangira te Atua
E kaoti te anera ae Moronaai nakon Iotebwa Timiti ao n tuanga Iotebwa taekan te rekooti, are e koreaki iaon bwaatua koora, e taunaki n te tabo ae uakaan (taraa Iotebwa Timiti—Rongorongo 1:33–34). N tokin te tai, e raira te rekooti anne Iotebwa nakon are e a riki ngkai bwa ana Boki Moomon, are e tei irarikin te Baibara bwa teuana kakoauaan taekan Iesu Kristo.
N ana Boki Moomon ae bwanin, aomata, bubua n ririki imwaain Kristo, a ataia ao a kaman tuangaki taekan Rokona ao a ingainga nanoia ao ni kakantaningaia. Ti warekia naba bwa e kanga ni kaoti te Tia Kamaiu ao n ibuobuoki nakoia Nibwaite. E kaoia aomata ni kabane bwa a na Nakoina. E kamarurungiia aoraki, e kateirakeia aika a mwauku, ao aomata ni kabane ake a rootaki. Ngkanne e kakabwaiaiia ataei aika a uarereke ao n tataro ibukiia (taraa 3 Nibwaaii 11:14–15; 3 Nibwaaii 17:7–9; 3 Nibwaai 17:21).
E mwaiti baika ti reiakinaki iai man ana Boki Moomon ibukin ana tangira ao ana nanoanga te Tia Kamaiu. E kaotia raoi n ae koaua bwa “Iesu bon te Kristo.” Iai inanona tamaron Ana euangkerio ae aki totoki. Ana Boki Moomon e katauraoa te tamnei ae itiaki bwa e kanga Tamara are i Karawa ao ara Tia Kamaiu n tangiriira n ae riaon bwaai aika ti kona n iangoi.
Bwaatua Koora, iroun Robert Theodore Barrett
Te Kakabwaia ibukin te Nakoanibonga ao te Ekaretia
A kaoti tabeman taan uarongorongo mai karawa ni kawara Iotebwa Timiti. E roko Ioane te tia Bwabetito ni kaoka te kariaiakaki ibukin karaoan te bwabetito. Betero, Iakobo, ao Ioane a kaoka te nakoa ni kairiiri ibukiia abotoro ao kiingin te nakoanibonga. “A roko naba tabeman, n raonaki ma Eria, are e kaoka te kariaiakaki bwa utu a na ikotaki n akea tokina n te reitaki n te maiu are akea tokina are e riaon te mate.”
Ngkanne Iesu Kristo e katea rinanon Iotebwa Timiti ana banna te Ekaretia imwiin are ti te arona ma are e kateia n tain te Nu Tetemanti (taraa Taekan te Onimaki 1:6). Rinanon Iesu Kristo ao Ana abotoro ao burabeti, Ana Ekaretia Iesu Kristo ibukiia Aika itiaki ni Boong aika Kaitira e katauraoi kakabwaia ibukin kaokan mwaakan te nakoanibonga nakoia natin te Atua ni kabane.
I kan taekinna bwa ngkana iai rawawatan nanom ke ko namakinna bwa ko aki tau ke tiaki ngkoe kaaina, bwaina te akoi ni bon nakoim ao n ataia bwa ko tangiraki iroun Tamara are i Karawa ao Natina, ara Tia Kamaiu, n ae riaon riki ae ko kona n iangoia. A kaoaki aomata ni kabane bwa a na nakon Kristo ao Ana Ekaretia. Te Ekaretia tiaki ibukiia aika a kororaoi. Kanga titebo ma te onaoraki ike ti karekea iai te kamaiuaki. N te taromauri ti taraa tinanikura, ni beku ibukiia tabeman ma te tangira, ao n tibwaua te euangkerio. Ti kona n “uringaki ma ni kamwarakeaki n ana taeka te Atua ae raoiroi” (Moronaai 6:4). Ti kona ni karekea te rau ao te kamarurungaki. Bon te kakabwaia ae rianako!
Iai Bukin te Kimwareirei ae Korakora
Tamara are i Karawa ao Natina, Iesu Kristo, a tangiriko ma nanoia—ae riaon riki bwaai ni kabane—ni kairiko nakon mweengam ao ni maiu n aron Maiuia. E kaotaki ni Kaokan Bwaai bwa A tia ni karaoi bwaai ni kabane bwa te tai ae moan te mimitong ibukim. N te tai teuana ma teuana, ko na bae n rinanon kataaki ma kangaanga, ma ko a riki ngkoe “bwa [ko] aonga ni karekea te kimwareirei” (2 Nibwaai 2:25) n te maiu aei ao are imwiina. E ataia te burabeti Iotebwa bwa e riaon te tamaroa. Ko na kunea bwa ko kona ni karekea te kimwareirei ngkana ko teimatoa n raira nanom ao n rairaki nakon Tamam are i Karaawa ao am Tia Kamaiu.
Iotebwa e rinanon te kakaitara ao te bwainikirinaki n te tai ae mwaiti, ma e bon teimatoa ni kawakina “ana taneiai ma anuana ni kukurei” (Iotebwa Timiti—Rongorongo 1:28). E teimatoa ni kukurei, ni korakora, waekoa ni marurung, ao e kakoroa bukin te mwakuri are e mwiokoaki bwa e na karaoia. E teimatoa n tiku te koaua anne nakoia ni kabane ake a onea mwiina.
E bon taraa n aobuaka bongin te Ekaretia n taai ake ngkoa, ao e kona naba n aobuaka ni boong aikai, e reitianko Kaokan bwaai imwiina—ao e reitinako naba ni boong aikai. E kaira ana Ekaretia Iesu Kristo. Ti teimatoa ni kairaki irouia burabeti aika maiu. A na reitinako ni kateaki ana auti te Uea. Ana tangira te Atua ao Iesu Kristo e nakoia kaain aonaaba ni kabane ngkana ti toumwiin ana tua te Tia Kamaiu ni kamwarakeia Ana tiibu ao n tibwaua Ana euangkerio. Koaua ibukin Kaokan bwaai e na waaki nako inanon aanga ao nakon taabo are e kangaanga aron iangoana n ana tai ni maiu Iotebwa. Ti na kataia ni karaoa te aonaaba bwa e na akoi riki teuana ao ni kauarerekea te kakauntaeka.
Ngkai ko kamatebwaia te euangkerio ni katoa bong, tataro n tainako, ao buokiia tabeman, rongorongon Kaokan bwaai e na riinga nanom ao ni bita maium. E na bae n aki riki n te tai ae waekoa, ma e na anganiko te kimwareirei—n aron are e karaoaki nakon te Burabeti ae Iotebwa.
Ai bia tera ngke te rongorongo ae kakukurei n te tangira ao te kimwareirei are e reke man Kaokan bwaai e na uota te kakabwaia ao ni kairiira maium—ngkai ao n tainako.