O le a se mea ua tatou iloa e uiga ia Iosefa, le tane a Maria?

O mea nei o loo ta’u mai e tusitusiga paia ia i tatou e uiga ia Iosefa, o le tane a Maria.

• O ia e tupuga mai ia Tavita (tagai i le Mataio 1:1–16, 20; Luka 2:4; 3:23–38) ma sa nofo i Nasareta (tagai i le Mataio 2:19–23).

• Sa faamau o ia ma Maria e faaipoipo, ina ua ia iloa o le a avea o ia ma tina o Iesu, le Alo o le Atua (tagai i le Mataio 1:18).

• O ia o se kamuta (tagai i le Mataio 13:55).

• O ia o “se tagata amiotonu” (tagai i le Mataio 1:19).

• Ina ua ia iloa ua maitaga Maria, sa manao e faasao o ia mai le maasiasi ma le faalumaina i nofoaga faitele (tagai i le Mataio 1:19–20).

• Sa fesootai atu le Atua ia te ia i se miti e le itiiti ifo ma le faafa: (1) sa ta’u atu e se agelu ia te ia ua maitaga Maria i le Alo o le Atua (tagai i le Mataio 1:20–21).), (2) sa lapataia o ia e se agelu e sosola faatasi ma lona aiga i Aikupito (tagai i le Mataio 2:13), (3) sa ta’u atu e se agelu ia te ia e toe foi atu i Isaraelu (tagai i le Mataio 2:19–20), ma le (4) sa lapataia o ia e aua le alu i Iutaia pe a toe foi mai (tagai i le Mataio 2:22).

• Sa alu o ia i Peteleema ina ia tusia, faatasi ai ma Maria, ma sa i ai o ia iina ina ua fanau mai le Faaola (tagai i le Luka 2:1–7, 16).

• E le o ia o le tama moni o Iesu Keriso, ae na faamamaluina o ia e Iesu e peiseai o ia lava o lona tamā moni (tagai i le Luka 2:48, 51).

• E foliga mai e pe tusa ma se toafa o la atalii faatasi ma Maria, faapea foi ma ni afafine (tagai i le Mataio 13:55–56).

• Atonu na maliu o ia i se taimi ina ua mavae le 12 tausaga o Iesu ma a o lei oo i le Faasatauroga (tagai i le Luka 2:42–52; Ioane 19:25–27).