“E faapefea ona ou iloa o mea o lo’o o’u faitauina i le Tusi a Mamona e moni?”

“E taua tele le tatalo e uiga i mea o loo e faitauina. Pe a ou maua se tali mai le Tama Faalelagi, e i ai se filemu toafimalie e le mafai ona ou faafitia. A o e faitau, o le a tuputupu ae lau molimau ma o le a faateleina lou tomai e malamalama ai.”

Lilia W., 13, Iuta, ISA

“Soo se taimi lava ou te faitau ai i le Tusi a Mamona, ou te taumafai e tuu ese mea faalavefau uma e mafai ona taofia ai a’u mai le lagonaina o le Agaga. E molimau mai le Agaga i le moni o mea uma, ma a o e faaaluina se taimi e faalogo ai i Lona siufofoga, o le a e iloa ai o mea o loo e faitauina i le Tusi a Mamona e moni.”

James Z., 15, Iuta, ISA

“E mafai ona ou iloa e moni le Tusi a Mamona aua o mea na valoia i le Tusi a Mamona ua faataunuuina i o tatou aso. Ma le isi, e pei lava o Nifae, sa ou tatalo ma ole atu i le Atua pe moni.”

Azuonwu P., 16, Nigeria

“O loo ou aoaoina i le taimi nei se gagana lona lua i le aoga, ma e lei leva ona amata ona ou faitauina foi le Tusi a Mamona i lena gagana. A ou faia, e fesoasoani lena mea ia te a’u e mafaufau loloto atili ai i upu a perofeta anamua aua e tatau ona ou faatelegese ma mafaufau moni i mea o loo ou faitauina ina ia malamalama ai. Ona faigofie lea ona faamautu mai e le Agaga o mea o loo ou faitauina e moni.”

Amelia C., 15, Arisona, ISA

“Ou te fiafia i le faatomuaga o le Tusi a Mamona lea e faapea mai, “Matou te valaau atu i tagata uma e i soo se mea, ia faitau i le Tusi a Mamona, ia mafaufau loloto i ai i o latou loto i le sāvali o i ai, ona ole atu lea i le Atua, le Tama Faavavau, i le suafa o Keriso pe ua moni le tusi. O i latou e faia lea mea ma ole atu i le faatuatua o le a maua se molimau i le moni ma le faalelagi o lenei tusi, e ala lea i le mana o le Agaga Paia (tagai i le Moronae 10:3–5.’”

Obediah, 19, Nigeria

“O le Tusi a Mamona o se tusi na tusia e le aao o le Atua ma Ona soo. O le a afio mai le Agaga Paia ia te oe ma tuuina atu ia te oe se lagona e moni mea o loo e faitauina. Ia matau lena lagona i le taimi lava e uma ai ona e faitauina pe a o e faitauina le Tusi a Mamona. Ma le isi, e mafai ona e tatalo e uiga i ai!”

Colton N., 13, Iuta, ISA

“Pe a e faitau, aua le na ona faia e togi ai mea mai se lisi. Ia mautinoa o loo e faia mo lou soifua manuia faaleagaga. O le a fesoasoani lenei mea ia te oe e mafai ai ona e faalogo lelei atu i le Agaga. E mafai foi ona e tatalo ia iloa e moni.”

Jacob W., 15, Iuta, ISA

“Na aoao mai Elder David A. Bednar e manaomia ona tatou faatinoina upumoni ua aoaoina mai tusitusiga paia. E mafai ona tatou faia lenei mea mo upumoni o loo aoaoina i le Tusi a Mamona e uiga i le tatalo ina ia maua se molimau o le tusi. Afai e lelei taunuuga, o lona uiga e mai le Atua. O le Agaga o le Alii e na te faamaonia lava le moni.”

Joseph N., 17, Kolwezi, Ripapelika Temokarasi o Congo

“Ua mafai ona ou iloa e moni le Tusi a Mamona i le auala ou te lagonaina pe a ou faitauina. E fesoasoani ia te au le amata ai i se tatalo. Ou te tausia foi se api talaaga o tusitusiga paia e faamaumau ai ou manatu ma lagona ina ia mafai ona ou toe tepa i tua i mea na ou faitauina.”

Anna K., 11, North Dakota, ISA

“Soo se taimi lava e te faitau ai i le Tusi a Mamona, tatalo i le Atua e fesoasoani ia te oe ia iloa pe moni mea o loo e faitauina. Tatalo foi ina ia fesoasoani o Ia ia te oe ia e malamalama. Afai e te faia lenei mea ma le naunautai ma le faatuatua, o le a e maua le uunaiga e moni mea o loo e faitauina, e ala i le fesoasoani a le Agaga Paia.”

Onyinyechi O., tausaga, nofoaga