Le Alii e, Afio Mai

O le Tausiga Faatamā, saunia e Kelsy ma Jesse Lightweave

O Floyd, o se alii talavou e nofo i Uganda, e fiafia e siva, atiina ae ana taleni, ma auauna atu i le Atua. I le 13 o ona tausaga, sa feagai ai Floyd ma faaosoosoga i le Upu o le Poto. O le inuina o le kofe ma le lauti o se mea masani i lona nuu, ma e iai taimi e auai ai Floyd ma ana uo.

Ina ua uma ona talanoa ma ona matua ma faitau mea o loo aoao mai e tusitusiga paia e uiga i le soifua maloloina, sa filifili o ia e mulimuli i le Upu o le Poto. Faatasi ai ma se manao e sui, sa tatalo ai Floyd i le Tama Faalelagi mo se faamagaloga. O le faatoilaloina o se mausa leaga e manaomia ai le “taimi ma taumafaiga,” o lana tala lea.

Ua maua e Floyd le faamoemoe e ala i upu o lana viiga e sili ona fiafia i ai, “Afio Mai!” (Viiga,, nu. 92). “O se viiga e faamalosia ai o tatou agaga,” o lana tala lea.

E pei o Floyd, e mafai ona tatou maua le malosi ia Iesu Keriso. Pe a “afio mai” Keriso faatasi ma i tatou, e nofo o Ia faatasi ma i tatou, faamafanafanaina i tatou, ma tuuina mai ia i tatou le faamoemoe! O se tasi o auala e mafai ona tatou valaaulia ai Keriso e nonofo faatasi ma i tatou o le salamo lea i a tatou agasala ma ole atu i le Atua mo se faamagaloga.

Ua tatou aoaoina “soo se taimi” tatou te salamo ai ma saili le faamagaloga, ma le faamoemoe faamaoni, e faamagaloina i tatou (Moronae 6:8). Afai tatou te pauu i lalo, e mafai ona tatou toe tu i luga ma taumafai, toe taumafai! E leai se fiu!

Sa oo Floyd i faamanuiaga o le salamo ma le faamagaloga i lona olaga. Na te maua le malosi e ala mai ia Iesu Keriso. “Ou te iloa o loo i ai o Ia iina mo i tatou i o tatou luitau,” o lana tala lea.

O le meaalofa o le faamagaloga e mafai ona faamaloloina ma faamalosia ai i tatou. Ua suia e Keriso lo tatou tausalaina ma le tiga i le filemu ma le olioli! O le isi taimi e te ole atu ai i le Alii mo se faamagaloga, ia manatua o le a Ia malamalama atoatoa ia te oe, ma o le a i ai pea o Ia iina mo oe.