Sau, Mulimuli Mai ia te A’u
Sāvali Mulimuli a Moronae mo Oe
Sa manatu Moronae ua uma lana talafaamaumau. Ia fiafia sa ia tusi teisi atu.
E faigata ona vaai faalemafaufau i le faateteleina o le tulaga leaga o mea na tutupu i le faaiuga o le Tusi a Mamona. O Moronae, le perofeta mulimuli o sa Nifaē, na molimauina le faatafunaga atoa o lona nuu—o lona aiga atoa, o ana uo uma, o tagata uma.
O lea la ua sola ese.
Ua tauto sa Lamanā e fasioti soo se tasi e le faafitia Iesu Keriso, o lea e tatau ai ia Moronae ona fealua’i na o ia “mo le saogalemu o [lona] lava ola” (Moronae 1:3).
Ma’eu le taufaafefe o lea mea! Na faapefea ona sao mai Moronae i nei mea?
Sa ia tautino atu ma le lototoa, “O a’u, o Moronae, ou te le faafitia lava le Keriso” (Moronae 1:3). Sa ia iloa e tusa lava po o le a le mea e tupu, o lona faatuatua ia Iesu Keriso o le a faasaoina ai o ia. E moni foi lena mea mo oe. O le sāvali mulimuli lenei a Moronae na ia tuuina atu mo oe.
Manatua Mea e Aupito Sili ona Taua
A’o lafi ai na o ia, sa galue Moronae e faauma talafaamaumau a lona tamā, o Mamona, o lē na fasiotia i le taua. Ina ua uma ona faaopoopo le tusi a Eteru ma nisi o ana lava upu (tagai i le Mamona 8–9), sa manatu Moronae ua mae’a—seia oo ina ia lagonaina le musuia e “tusi ni isi mea faaopoopo itiiti” sa ia faamoemoe o le a “aoga … i se aso i le lumanai” (Moronae 1:4). O lena aso o o tatou aso, lea na vaai i ai Moronae (tagai i le Mamona 8:35). O le a le mea na manatu Moronae “e taua” ia i tatou?
Na faasoa mai e Moronae upumoni taua o le talalelei (tagai i le Moronae 2–6) ma molimau mai ia Iesu Keriso. E oo lava i taimi faigata, sa manatua e Moronae le mea e sili ona taua. E pei o Moronae, e mafai ona e maua le malosi e ala i le manatuaina o mea e sili ona taua—o au sootaga ma le Tama Faalelagi, Iesu Keriso, ma lou aiga ma uo; o le ola i le talalelei; ma faasoa atu mea ua e iloa e moni.
Maua le Faamoemoe i le Alofa Mama o Keriso
Sa faaaofia ai foi e Moronae upu a lona tamā (tagai i le Moronae 7–9). Na aoao mai Mamona o le faatuatua ia Iesu Keriso e taitai atu ai i le “faamoemoe e ala i le togiola a Keriso ma le mana o lona toetu” (Moronae 7:41). Ona taitai atu lea o le faatuatua ma le faamoemoe i le alofa mama, o le “alofa mama lea o Keriso” (Moronae 7:47).
Sa soifua Iesu Keriso mo i tatou, sa mafatia o Ia, faamaligiina Lona toto, ma maliu mo i tatou, aua e alofa o Ia ia i tatou. E mafai ona tatou tatalo “ma le malosi atoa o le loto” ina ia faatumulia i Lona alofa, o le alofa mama lea (Moronae 7:48; tagai i le Eteru 12:33–34). E na o le Faaola lava “e mafai ona tatou maua ai lenei faamoemoe” (Moronae 7:48). Sa iloa e Mamona ma Moronae lenei mea ma o laua loto atoa. O le alofa e le mavae o le Faaola ua tuuina mai ai ia i tatou mafuaaga uma e faamoemoe ai.
Vaai atu i le Lumanai ma le Faatuatua
I se tulaga lamatia tele, na faamaeaina ai e Moronae le talafaamaumau ma tanumia ai e latalata i le tumutumu o se mauga. I le faitau selau o tausaga mulimuli ane, na faaliliuina ai e Iosefa Samita le faamaumauga ma lolomiina i le lalolagi o le Tusi a Mamona: O Se Isi Molimau a Iesu Keriso.
I lana sāvali mulimuli, ua faasoa mai ai e Moronae le auala e mafai ona tatou iloa ai e moni le Tusi a Mamona (tagai i le Moronae 10:4–5). Ua Ia valaaulia foi i tatou ia “o mai ia Keriso” (Moronae 10:32). Pe a tatou taliaina le valaaulia a Moronae, e mafai ona tatou vaavaai atu i le lumanai ma le faatuatua e tusa lava pe ua tatou faia le mea sili tatou te mafaia ae e le o faia lava mea e pei ona tatou faamoemoe i ai.
Sa sili atu le iloa e Moronae o lenei mea nai lo le toatele. O lona faatuatua na mafai ai ona ia faataunuuina le folafolaga lenei mai ia Iesu Keriso: “Afai tou te faatuatua e mafai ona outou faia mea uma e tatau ai ia te au” (Moronae 10:23). O le sāvali mulimuli a Moronae ua molimau mai ai o lenei folafolaga e mo oe foi.
O Iesu Keriso o lo outou Faaola ma le Togiola—i taimi lelei po o taimi faigata; i le taimi nei ma i taimi uma.
Sa Tu Iesu i le Lotolotoi, saunia e Casey Childs