Fefaasoaai o le Kerisimasi

I le vaitau o le Kerisimasi ua te’a, sa ou taulai atu ai i le faitauina o tala o le Kerisimasi i tusitusiga paia ma faasoa atu i isi. I se tasi po a o o’u vaaia lo’u tausoga e fa tausaga, o Boedi, sa ou fesili atu ia te ia pe aisea e faapitoa ai le Kerisimasi. Sa amata ona ia talanoa e uiga ia Santa ma meaalofa. Sa ou faamalamalama atu ia te ia e faapitoa lava le taua o le Kerisimasi ona o Iesu.

Sa ou faaali atu ia Boedi se kalena laitiiti e faitauina ai aso agai atu i le Kerisimasi, i luga o le puipui lea sa i ai se ata ata komi o le tala o le Kerisimasi. Sa ia matauina e foliga mai ua susulu le ata o le pepe o Iesu, ma sa ou faamatala atu ia te ia e faapitoa tele Iesu. Sa ou fai atu ia te ia na afio mai o Ia i le lalolagi e maliu mo i tatou ina ia i ai se aso e mafai ai ona tatou ola faatasi ma Ia. Sa ma matamata i vitio ma tilotilo i ata o [Iesu].

Sa ou tatalo i lena po ina ia mafai ona ou manatua le agaga sa ou lagonaina ma ia manatua e Boedi mea sa ou aoaoina ai o ia.

I ni nai vaiaso mulimuli ane, na faatasitasi ai lo matou aiga mo le Vaeluaga o le Kerisimasi. Ina ua uma ona matou taaalo i taaloga, tatala meaalofa, ma matamata i le vitio a le Ekalesia “O le Tamaitiiti Keriso,” sa alu atu Boedi i le laulau e valivali. Sa ou matamata a o ia faaali atu i lo matou tausoga e lua tausaga, o Jerett, lana ata o le pepe o Iesu i totonu o se faatanoa, faatasi ma Maria ma Iosefa. O le faamatalaga sa sili ona ou fiafia i ai o le susulu sa ia faataamilo ai i le pepe. Sa ia faamatala atu ia Jerett sa susulu o Ia ona sa matua faapitoa lava o Ia.

Sa manatua e Boedi mea sa ou aoaoina ai o ia. Sa faamafanafanaina lo’u loto i le vaai atu ia te ia o faasoa atu le tala i isi, e pei lava ona sa ou faia.

Ou te iloa le taua o le faasoaina atu o tala ia Keriso ia i latou o loo siomia au, talavou ma e matutua. Ua i ai nei sa’u molimau malosi atu i le faapitoa moni o Keriso.