E Na Te Lē Faagaloina i Tatou

Sa matuai faigata lava lo’u tausaga muamua i le aoga maualuga. Sa ou aoga i luga o le initoneti ona o le KOVITI-19. I le tausaga lena, na maua ai lo’u tama i le KOVITI ma maliu ai. Sa ou feagai ma lena faigata o le maliu, i le tausaga atoa. I le tasi le tausaga mulimuli ane, na maliu ai lo’u tamāmatua. I lo’u tausaga lona tolu, na maliu ai lo’u tināmatua. Sa ou i ai faatasi ma ia i totonu o le potu ina ua maliu o ia.

Sa i ai lava i taimi uma so’u lagona o le gaogao ‘i’i ona o nei mea na tutupu i lo’u olaga. Sa ou lagonaina atonu sa ou faia se mea sese pe o se totogi foi lea mo ni au mea sese po o se mea lava faapena. I lena taimi, sa ou le faia foi ni mea sili ona lelei. Ou te lei faatagaina le malamalama o Keriso e susulu mai ia te a’u.

I se tasi aso, a o faitauina upu o le viiga “Ou te Tu ma Ofo” (Viiga, nu. 107), na taia ai au i le laina “Le galo ia a’u se alofa ua faapena” Ina ua ou faitau i lena mea, sa ou lagonaina le faatumulia o lo’u gaogao. O upu “e mafai ona galo ia te au” na ou tu ai ma mafaufau. I lo’u olaga atoa, faatasi ai ma mea uma sa ou mafatia ai ma oo i ai, sa ou manao ai e faagalo. Sa ou manao e saili se auala faigofie atu, ia maua le fiafia, ma faia mea e le sa’o, ae ou te lei faalagolago lava ia Iesu Keriso.

E ui lava sa ou i ai i se nofoaga pogisa ma taumafai e se ese, ae sa lei faatagaina au e Iesu Keriso e faagalo Lona alofa mutimutivale ma le alofa. Ina ua ou i ai i se tulaga maualalo, sa le’i galo ia te Ia a’u. Afai la e le galo ia te Ia a’u, e le tatau ona galo ia te a’u o Ia.

Ou te talitonu e tusa lava pe o e i ai i se nofoaga pogisa ma e te manatu o le a le tuuina atu e le Atua ia te oe se avanoa lona lua, o le a Ia tuuina atu ia te oe. E alofa o Ia ia te oe ma Na te tausia oe.