Auaunagai Telefoni Feaveai

Ata na tusia e Michael Mullan

I se tasi tausaga sa matou o ai ma lo’u tina, ma lo’u uso i le fale o le tuagane o lo’u tina e faaalu ai aso malolo. I se aso ae matou te lei malaga, sa ou tapeeseina uma au polokalama o ala o faasalalauga faaagafesootai aua sa matuai aafia ai lava lo’u faaleagaga. Sa ou iloaina o le alu ese mai ala o faasalalauga faaagafesootai sa mo le mea sili lea, ae sa i ai sina o’u lagona o le tuuatoatasi ma le vavaeina ese mai. Mo ni nai aso talu ona ou tuua le fale, sa leai se tasi na aapa mai ia te au, ma sa ou lagonaina e leai se tasi na popole moni lava.

I le Aso o le Tausaga Fou, sa ou lagonaina pea le tuuatoatasi ma le faanoanoa. Ae na ou mauaina se feau tusitusia e lei faamoemoeina mai se uo, sa aumaia ai ni faamanuiaga mo se tausaga fou manuia. Ma te le’i latalata tele le tasi i le isi, ae sa matua taua tele lana feau tusitusia ia te au—o lona uiga sa i ai se tasi na popole (mo a’u).

Ona ou maua lea o se uunaiga—aisea e le auina atu ai ni feau tusitusia i au uo uma? Sa vave ona ou alu e galue ma faamanuia atu i tagata taitoatasi se tausaga fou manuia ma ta’u atu ia i latou lo’u lotofaafetai mo i latou. Atonu o nisi o i latou sa manaomia se tasi e aapa atu foi ia i latou. Na faafuasei lava, ona faigofie atu ia te au ona ou matauina le musika o loo taina ma le fiafia i foliga o o’u tausoga. Sa ou lagonaina le Agaga, ma sa tumau lo’u lagona fiafia i le aso atoa.

Ou te matua faafetai lava i la’u uo mo le auina mai o lena feau tusitusia, ma ou te fiafia sa ou usitai i le uunaiga e auina atu a’u lava feau tusitusia. I le tulaga lea, na fesoasoani ia te au e aapa atu ai i isi pe a ou lagonaina e tatau ona aapa mai foi se tasi ia te au . Ou te iloa e moni upu nei a Peresitene M. Russell Ballard (1928–2023): “O le a tatou maua le filemu, olioli, ma le fiafia i o tatou olaga pe a auauna atu i le Alii ma o tatou tuaoi.”