O Le Tamaitiiti o Keriso

Ata na pueina e Cristy Powell

I se tasi tausaga sa ou galue ai i se galuega laitiiti mo ni nai aoauli e maua ai sina tupe e faatau ai se seti o le vaaiga o le Fanau Mai o Iesu. Sa ou faatauina se seti e matua taugofie lava lea na o mai faatasi ma se tamai falemanu laupapa. O faatusa o loo faaalia ai tamaiti o loo ofu i ofu o le Fanau Mai o Iesu; e tusa ma le tolu inisi le umi ma e faia i ni uga simā paepae. Sa ou filifilia lena seti faapitoa aua sa i ai o ma atalii laiti e toalua—o Caleb, o lē sa tolu tausaga, ma Josh, na faatoa atoa lona tausaga.

Sa ou aumaia i le fale le seti o le vaaiga o le Fanau Mai o Iesu ma faatulaga ma le faaeteete i luga o le laulau pito i tua i lo matou potu malolo. Sa vave ona manao Caleb e vaai i le faaaliga fou. Sa ou faamatala atu ma le onosai ia te ia le maaleale o vaega taitasi ma e le tatau ona ia pa’i atu i ai, ae na o le vaai lava i ai o ona mata. Sa ou faaaluina sina taimi e faasino atu ai Iosefa ma lona to’oto’o leoleo mamoe, ma Maria o loo tootuli i autafa o le faatanoa lea sa si’iina le pepe o Iesu. Sa i ai se agelu laitiiti, o le au makoi e toatolu, ma se leoleo mamoe faatasi ma ni tamai mamoe laiti se lua. Sa ou tuuina ma le faaeteete ia faatusa taitasi i o latou tulaga. Ona ma nofonofo lea ma Caleb ma faamemelo ma le mitamita i le ma teuteuga fou.

O le taeao na soso’o ai na muamua ai o’o Caleb i lalo i le faasitepu ae ou te le’i alu atu. Pe tusa ma le sefululima minute mulimuli ane, sa ou mulimuli atu ai ia te ia i lalo, ma tu e vaai i la’u ‘oa fou a o ou agai atu i le umukuka. Sa ou te’i i lou tilotilo atu ua matua sui atoa lava le faatulagaina! Sa faaputuputu faatasi uma ia faatusa i totonu o le fale o manu. Sa foliga mai sa leai se ogatasi po o se mafuaaga i lo latou tulaga, ma sa ou iloaina atonu o se faiga lea a Caleb.

Sa ou toe tuuina ma le faaeteete ia faatusa taitasi i o latou tulaga ma alu e aumai Caleb. Sa ou toe faamatala atu ma le onosai le taua o le le pa’i atu i faatusa laiti aua e ono ta’ei. O Caleb o se tamaitiiti usiusitai—e masani ai lava o ia i taimi uma—ma sa ou iloaina o le a le toe tupu.

Vaai faalemafaufau i lo’u te’i ina ua ou savali ifo i lalo i le faasitepu i le taeao na sosoo ai ma iloa ai ua toe o’o lava le vaaiga i le tulaga faaletonu na i ai le taeao na muamua atu. O le taimi lea sa ou alu sa’o ai i totonu ma aumai Caleb. Sa ou tuuina o ia i luma o le seti o le vaaiga o le Fanau Mai o Iesu ua felavasa’i solo, ma ou fesili atu, “Na e lotea le faatanoa?” Sa tilotilo ae o ia ia te au ma ona mata lanumoana lapotopoto ma tali mai, “Ioe.”

“E te manatua e le tatau ona e pa’i atu i le faatanoa a Tina?” Sa ou fesili atu ai. Sa toe tutusa lava le tali: “Ioe.”

“Aisea la na e lotea ai?” Sa ou fesili atu ai.

“Ona e le o mafai ona latou vaai ia Iesu,” o lana tali faigofie lea.

Sa ou tilotilo atu ma le faaeteete i le faatanoa ma iloa ai atonu sa i ai lava sina faatulagaga i le tulaga felavasa’i sa i ai. Sa taumafai ona lima laiti e tuu faatusa uma i se li’o faataamilo i le vaega aupito sili ona taua o le seti—o le pepe i le faatanoa. I le tumu ai i totonu o le tamai fale o manu, sa tofu i latou ma se vaaiga lelei atoatoa o le pepe. Sa mafai ona vaai tagata uma ia Iesu.

O se lesona loloto lena mea.

E lē tau faapea atu, ae sa tumau ai pea la matou faaaliga i lena vaaiga i le vaitau atoa, ma ua faia i tausaga uma talu mai lena taimi.

O le mea e mata’ina ai, o le taimi lava na tuu ai ma le faaeteete ia faatusa taitasi i se li’o faataamilo i le pepe, e le’i toe lotea lava e Caleb le seti. Sa faamalieina o ia i le faatulagaga. O le faatusa sili ona taua ua avea ma taula’iga.

O fea o e taulai atu i ai i lenei vaitau o le Kerisimasi?

O mafai ona e iloa atu Iesu?