O Le Kerisimasi i le Tautotogo

Ata na tusia e Simona Love

O le Kerisimasi sili ona lelei a lo matou aiga e lei tupu i le Aso o le Kerisimasi. Na tupu i le Eseta.

I se tasi Kerisimasi sa faamalumaluina i le popole mo lo ma atalii o Tanner, o lē sa tauivi i le falemai ma se ma’i e lamatia ai lona ola. Sa i ai o ia i se koma na tuuina i ai e foma’i mo le 10 vaiaso. Sa moe moni lava o ia i le taimi atoa o le Kerisimasi.

Sa toe maua lemu e Tanner lona malosi ma sa mafai ona toe foi mai i le fale i le tautotogo. A o latalata mai le Eseta, sa ma talanoa e uiga i le misia e Tanner o le Kerisimasi. Sa filifili ona tuafafine ma lona uso e tatau ona ia faia se Kerisimasi e sui a’i. Sa ma mafaufau i le fiafia o le a i ai pe a avea le Eseta ma se aso malolo e faamanatu ai vaega nei e lua.

Ina ia saunia mo la matou faamanatuina o le Kerisimasi i le tautotogo, sa matou tosoina mai se pusa o moli o le Kerisimasi, teuteuina se tamai laau Kerisimasi, ma faatau ma afifi ni meaalofa laiti o le Kerisimasi mo le tasi ma le isi.

O le po a o lumanai le Eseta, o la matou “Po o le Kerisimasi,” lea sa matou ofuina ai ofu solo talaloa ma ni togiga e sui faatopetope ai mo se faaaliga faaleaiga o le Fanau Mai o Iesu. Sa matou faitau mai tusitusiga paia e uiga i le agelu na faaali atu ia Maria ma Iosefa, o la la’ua malaga i Peteleema, ma le la’ua sailiga mo se nofoaga e nonofo ai ae sa leai se avanoa na maua i le faletalimalo.

Sa matou faitau foi e uiga i leoleo mamoe o loo tausia a latou lafu i le po, o le agelu a le Alii na faaali atu ia i latou, ma se aufaipese a le autau faalelagi o loo usuina le pese, “O le viiga i le Atua i mea aupitoaluga; ma le manuia i le lalolagi, i tagata ua alofagia e ia” (Luka 2:14). I la matou faaaliga, sa asiasi atu ai leoleo mamoe i le fale o manu lea sa oofu ai le ma fanau o ni manu i le faatoaga (o le tausaga lena, sa aofia ai foi i le matou falemanu o le Fanau mai o Iesu, se giraffe!).

E lei muta ai iina le faaaliga o le Kerisimasi a lo matou aiga. Talu ai o le Eseta, sa faaauau ai ona matou faitau e uiga i le auala na tuputupu ae ai le pepe o Iesu i le tino, asiasi atu ma aoao atu i tagata atamamai i le malumalu, faia vavega, auauna atu i Lona nuu, ma feiloai ma Ana Aposetolo i se potu pito i luga i Ierusalema, lea na Ia faalauiloa mai ai le faamanatuga.

Na matou faitau ma le migao i le o le ulufale atu o Iesu i le Faatoaga o Ketesemane e amata Lana galuega togiola tele—ia mafatia, maligi lona toto, ma maliu mo i tatou. Ona matou faitau lea i le ala na toetu ai o Ia i le aso lona tolu. Sa Ia faatoilaloina le oti—o Lona lava maliu ma lo tatou oti. Sa faamanatu mai ia i matou ona o Ia, ua mafai ai mea uma.

I le taeao o le Eseta, sa matou feala po ai lava. Sa matou fiafia i le susulu o moli susulu ma felanulanuai o le Kerisimasi e faasaga atu i le pouliuli ao lei tafa ata. Sa matou tatalaina ma le fiafia a matou meaalofa ma aai i la matou malutaeao masani o le Kerisimasi o falaoa e vaevaeina. A o faamalamalamaina e le la oso le lalolagi i fafo, sa matou saili mo fuamoa o le Eseta ma faamanatuina le ofoofogia o le Toetu. I le lotu, sa matou aai ai i le faamanatuga, lea na aumaia ai le moni o le Togiola a le Faaola i luma i le mea nei ma le taimi nei.

Mo i matou taitoatasi, o lena “Eseta Kerisimasi” na mafua ai ona matou iloa manino atili o le Kerisimasi ma le Eseta e sili ona malamalama i ai pe a tuu faatasi. O le Kerisimasi aua ua tumu i folafolaga, ma le Eseta aua ua faatumulia i folafolaga ua tausia.

E matou te toe tepa i tua ma le fiafia i lenei aafiaga aua na i ai ia i matou Tanner mo le isi Kerisimasi e tasi lava ao le’i faamae’aina lana misiona i le olaga nei. O le asō, matou te vaavaai atu ai i luma ma le mautinoa o lo matou vavaeeseina mai ia Tanner ua mo sina taimi ona ua matou olioli i le Kerisimasi lea “ua fanau mai se tamaitiiti” (Isaia 9:6), ma matou te manatua i le Eseta—ma o le a manatua pea—“Ua toetu o ia” (tagai i le Mataio 28:6).