O Lou Faamoemoe Ola, Lelei, ma Sili Atu Ona Lelei

O le meaalofa faaleagaga o le faamoemoe ia Keriso o le faamoemoe fiafia lea o le ola e faavavau e ala i “galuega, ma le alofa mutimutivale, ma le alofa tunoa o le Mesia Paia” ma se manao malosi mo faamanuiaga folafolaina o le amiotonu. O upu “ola,” “lelei,” ma le “sili atu ona lelei” o loo faamatala ai lo tatou faamoemoe ia Iesu Keriso. O se faamautinoaga faateleina ma le malosi o le Toetu ma le ola e faavavau e ala i le faatuatua ia te Ia.

Na faamalamalama mai e le perofeta o Mamona, “Ou te fia tautala atu ia te outou e uiga i le faamoemoe. E mafai faapefea ona outou maua o le faatuatua, vagana ai ua ia te outou le faamoemoe?

“Ma o le a le mea tou te faamoemoe i ai? Faauta ou te fai atu ia te outou, tou te faamoemoe, e ala i le togiola a Keriso ma le mana o lona toetu, ia faatutu mai outou i le ola faavavau, ma o le pogai ona o lo outou faatuatua ia te ia e tusa ma le folafolaga.

“O le mea lea, afai ua i ai i se tagata le faatuatua e tatau ona i ai ia te ia le faamoemoe; ona a aunoa ma le faatuatua e le mafai ona i ai se faamoemoe.”

O lou faamoemoe ola, lelei, ma sili atu ona lelei ia Keriso e amata i le malamalama o loo soifua le Atua le Tama Faavavau. O Ia o lou Tama. O oe moni lava o Lona atalii po o le afafine agaga, ma ua e mauaina uiga paia mai ia te Ia.

O le Tama o le tusitala o le fuafuaga o le fiafia. I le avea ai ma Ona atalii po o afafine agaga, ua e “talia le fuafuaga [a le Tama Faalelagi] e mafai ai e Lana fanau ona maua se tino faaletino ma maua le tomai faalelalolagi latou te maua ai le atoatoaga ma iloa tino ai lo tatou taunuuga paia o ni suli o le ola e faavavau.”

O oe o se tagata e itu lua. O lou agaga, o le vaega e faavavau o oe, ua faaofuina i se tino faaletino lea e i ai manaoga ma faanaunauga o le olaga faaletino. O le fuafuaga a le Tama o le fiafia ua mamanuina e tuuina atu ai le taitaiga mo oe, e fesoasoani ia te oe e toe foi saogalemu atu ai ia te Ia ma se tino toetu, faaeaina, ma maua faamanuiaga o le olioli ma le fiafia e faavavau.

O Iesu Keriso o le Alo Pele e Toatasi o le Atua le Tama e Faavavau. Na afio mai o Ia i le lalolagi e fai le finagalo o Lona Tama. O Ia o lo tatou Faaola ma le Togiola aua na Ia faatoilaloina uma le oti ma le agasala.

Na valoia e Alema: “Ma o le a afio atu o ia, ma mafatia i tigā ma puapuaga ma faaosoosoga o ituaiga eseese uma; …

“Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, … ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga.

“ … E mafatia le Alo o le Atua e tusa ai ma la le tino, ina ia mafai ona ia ave i ona luga agasala a ona tagata, ina ia mafai ona ia soloi ese a latou solitulafono e tusa ai ma le mana o lana lavea’iia.”

O le uluai mataupu faavae o le talalelei o le faatuatua lea i le Alii o Iesu Keriso. O le faatuatua moni e taulai atu i le Faaola ma mafai ai ona tatou faalagolago ia te Ia ma maua le talitonuga atoatoa i Lona mana e laveai ai i tatou mai le oti, faamamaina i tatou mai agasala, ma faamanuiaina i tatou i le malosi e sili atu nai lo o tatou lava malosi.

Ou te molimau atu na motusia e le Faaola noataga o le oti. Sa toetu o Ia ma “faataunuuina [lo tatou] toetu [ma] le togiola.” O loo soifua o Ia. Ua na o Ia lava le puna o le faamoemoe ola, lelei, ma sili atu ona lelei.

Na molimau mai le perofeta o Eteru, “O le mea lea, soo se tasi e talitonu i le Atua e mafai moni lava ona faamoemoe mo se lalolagi sili atu ona lelei, ioe, se nofoaga lava i le aao taumatau o le Atua, o le faamoemoe lea e sau mai le faatuatua, e fai ma taula i le agaga o tagata, lea o le a latou mautinoa ma mausali ai, ma faatumulia ai pea i galuega lelei e le aunoa, ma taitaiina ai e viia le Atua.”

I lenei vaitau faapitoa o le faamanatuina o le fanau mai o le pepe i Peteleema, tau ina ia outou manatua pea na afio mai Iesu Keriso i le lalolagi e avea ma o tatou Faaola ma Togiola. Ua Ia ofoina atu ia te oe meaalofa faaleagaga e le mafaatauina o le ola, malamalama, faafouina, alofa, filemu, vaaiga, olioli, ma le faamoemoe.

Na Faataunuuina Aso, saunia e Justin Kunz

Ou te valaaulia outou ia saili ma le talafeagai mo le meaalofa faaleagaga o le faamoemoe i le Faaola, e ala i le suesueina o aoaoga ma molimau a perofeta anamua ma aso nei e faatatau i Lana taulaga togiola ma le toetu moni. A o outou faia lena mea, ou te folafola atu o le a faamalosia la outou molimau i le paia o le Togiola. O le a faalolotoina lou liua ia te Ia. O le a faateleina lou manao ma le naunautaiga e tu atu o Lana molimau lototoa. Ma o le a faamanuiaina oe i se taula i lou agaga—e oo lava i le faamoemoe ola, lelei, ma sili atu ona lelei.

Faatasi ai ma Aposetolo o e na molimau atu ia te Ia i le tele o tausaga, ou te tautino atu ma le olioli la’u molimau o Iesu Keriso o le Alo soifua o le Atua soifua. O Ia o lo tatou Togiola toetu. Ona o le togiola ma le faaleleiga ma le Atua lea ua Ia faia mo tagata uma, e mafai ona e maua le faamautinoaga faaleagaga ma se faamoemoe ola, lelei, ma sili atu ona lelei lea “e faaolaina uma ia Keriso.”