O Le Fanau Mai o Iesu
Aoao e uiga i lenei vaaiga masani o le Kerisimasi ma le auala e fesoasoani ai ia i tatou e taulai atu i le Faaola.
Ata na tusia e Caroline Vibbert
Peteleema
Peteleema o lona uiga o le “fale o areto” i le gagana Eperu. O nisi taimi e ta’ua ai o le aai o Tavita, o lona gafa na valoia ai le afio mai o le Mesia (tagai i le Ieremia 23:5; Ioane 7:42). Na faauuina e Samuelu le tupu o Tavita i Peteleema (tagai i le 1 Samuelu 16:1–13). Na valoia o le a fanau mai ai le Mesia iina (tagai i le Mika 5:2).
Faletalimalo
O le upu Eleni mo le faletalimalo e mafai ona faauigaina o soo se fale e nonofo ai mo se taimi le tumau, e aofia ai ma se potu mo malo faaaloalogia. O Maria sa ia “faataoto ia te ia [le Tamaitiiti o Keriso] i le fale povi, auā latou te le ofi i le fale e tali ai malo” (Luka 2:7). (O le Faaliliuga a Iosefa Samita o loo faapea mai “faletalimalo.”) “Leai se avanoa” e mafai ona faauigaina o le teenaina o i latou pe leai foi se nofoaga atonu sa latou nonofo ai e i ai se avanoa e fanauina ai se pepe. Ae peitai, sa latou o i se mea sa i ai se faatanoa vao.
Faatanoa vao
O se faatanoa o se pusa maualuga po o se vaega faaofuofu e taofia ai meaai mo manu. I Iutaia anamua, sa tele lava ina faia mea nei i maa. O faletalimalo sa i ai lotoa tutotonu sa i ai faatanoa, ma o le tele o fale sa i ai foi faatanoa i le potu autu tele ina ia mafai ona taofia ai manu iina i le po.
Ie e Aui A’i
Ua faitau afe tausaga o aui e tina ia pepe fou (e afifi i latou i se palanikeke po o se ie). O lenei mea e faatoafilemuina ai ma faamafanafanaina ai i latou pe a uma ona faateia i le tuua o le manava. O le ie na faaaogā e Maria atonu sa iai se faailoga faapitoa i le aiga.
Maria ma Iosefa
O i laua o ni tagata lelei ma amiotonu, ma e tupuga mai ia Tavita. Sa asia i latou taitoatasi e se agelu e sauniuni ai mo le fanau mai o le Faaola (tagai i le Mataio 1:18–25; Luka 1:26–38). Sa latou malaga i le 100–140 km (60–90 maila) i Peteleema. Sa maitaga Maria i le taimi o le malaga.
Leoleo Mamoe
Sa vaai e leoleo mamoe a latou lafu e latalata i Peteleema. E tusa ai ma le faamatalaga a nisi o tagata atamamai, e na o mamoe e faamoemoe e fai ai taulaga o le malumalu na faatagaina e tausia e latalata i se aai. O lea la, atonu sa tausia e nei leoleo mamoe ia mamoe lea o le a faatusa i le taulaga a Iesu Keriso mo i tatou (tagai i le Mose 5:6–7). Na latou tuua a latou lafu ae o atu e vaai i le Mesia, o lana taulaga togiola o le a aveesea ai le taulaga i manu.
O Le Pepe o Keriso
O Iesu Keriso o le faatusa totonugalemu lea o le vaaiga o le Fanau Mai o Iesu—ma o tatou olaga.