Sau, Mulimuli Mai ia te A’u
O Meaalofa Sili Ona Taua
I lenei vaitau o le foai atu o meaalofa, taulai atu i meaalofa ofoofogia ua tuuina mai e le Tama Faalelagi ma Iesu Keriso ia te oe ma mea e mafai ona e foai atu ia i La’ua.
Meaalofa ua Tuuina Mai ia i Tatou
Ua faamanatu mai e le perofeta o Moronae ia i tatou “meaalofa lelei uma” e sau mai ia Keriso (Moronae 10:18). O le Tama Faalelagi ma Iesu Keriso ni tagata foai meaalofa silisili ese! Afai tatou te taumafai e fai se lisi o meaalofa uma ua La tuuina mai ia i tatou (e pei o le ea tatou te manava ai, timuga, le tomai e pepese ai ma sisiva, ma isi mea faapena), e mafai ona faaauau pea le lisi e faavavau! O mea lelei uma i o tatou olaga e sau mai le Faaola ma le Tama Faalelagi.
O nisi nei o a La meaalofa ia i tatou:
-
Soifuaga, maliu, taulaga togiola, ma le Toetu o Keriso (tagai i le Ioane 3:16)
-
O le avanoa mo le ola e faavavau—”o le mea silisili o meaalofa uma a le Atua” (tagai i le Ioane 10:28; Mataupu Faavae ma Feagaiga 14:7)
-
O le faataitaiga a le Faaola (tagai i le Ioane 13:15)
-
Papatisoga ma le meaalofa o le Agaga Paia (tagai i le 2 Nifae 31:12; Ioane 14:16)
-
O le perisitua, po o le pule ma le mana o le Atua i le lalolagi (tagai i le Mose 6:67; Mataio 10:1)
-
poloaiga a le Atua (tagai i le Ioane 13:34)
-
Poto ma le malamalama (tagai i le Iakopo 1:5; 2 Nifae 28:30)
-
Feagaiga ma sauniga, e pei o le faamanatuga ma le faaeega paia o le malumalu (tagai i le Mataio 26:26–28; Mataupu Faavae ma Feagaiga 124:39)
-
Vaivaiga—ioe, e mafai foi ona avea lena ma se meaalofa! (Tagai i le Eteru 12:27)
-
Meaalofa faaleagaga tulaga ese (tagai i le Moronae 10:8)
Ua na o nisi nei o le tele o meaalofa o loo ta’ua i tusitusiga paia, ae e tele atu isi meaalofa!
Luitau: Taumafai e faaopoopo i le lisi lenei ma vaai po o le a le umi e mafai ona e oo i ai!
O Meaalofa e Mafai ona Tatou Foai Atu
O le a se mea e mafai ona e tuuina atu i se tasi ua uma ona tuuina mai ia te oe o mea uma? O loo i ai i tusitusiga paia ni manatu maoae mo meaalofa e mafai ona e tuuina atu i le Tama Faalelagi ma Iesu Keriso. (Ua faaali mai foi e tusitusiga paia ia i tatou le auala La te faamanuiaina vave ai i tatou i nisi meaalofa pe a tatou tuuina atu ia i Laua.)
|
Meaalofa e Mafai Ona Tatou Tuuina Atu i le Atua |
Meaalofa Na Te Toe Foaiina Mai Ia i Tatou |
|---|---|
|
Tausi i poloaiga. |
O le a faamanuiaina ma faatamaoaigaina oe e le Atua. (Tagai i le 1 Nifae 2:20; Mosaea 2:22 |
|
Faafitia oe lava mai mea uma e le faaleatua ma alofa i le Atua. |
Ua lava Lona alofa tunoa mo outou. (Tagai i le Moronae 10:32.) |
|
Osi se taulaga o le loto momomo ma le agaga salamo. |
O le a faamanuiaina oe i le Agaga Paia. (Tagai i le 3 Nifae 9:20.) |
|
Alofa ia i latou o siomia oe. |
O le a iloa e isi o oe o se so’o o Iesu Keriso. (Tagai i le Ioane 13:34–35.) |
|
O mai ia Keriso, ave Lana amo i o outou luga, ma faaa’oa’o e uiga ia te Ia. |
O le a e maua le malologa mo lou agaga. (Tagai i le Mataio 11:28–30.) |
|
Faasoa atu le talalelei i isi. |
O le a faatasi le Keriso ma oe. (Tagai i le Mataio 28:19–20.) |
O le Kerisimasi lenei, filifili se meaalofa e mafai ona e tuuina atu i le Faaola ma le Tama Faalelagi. E mafai ona e filifili se tasi e tuuina atu, mai i lenei lisi, sue isi manatu mai tusitusiga paia, pe ole atu i le Tama Faalelagi mo se meaalofa patino e mafai ona e tuuina atu. E ui atonu e le faatusatusa lau meaalofa i a La meaalofa, ae o lau meaalofa—pe afai e tuuina atu ma lou loto—o le a aumaia ai pea ia i Laua le olioli. A o e faia lena mea, e mafai ona avea lenei Kerisimasi o se Kerisimasi e manatua pea!