O Tali mai Taitai o le Ekalesia
E Mafai Faapefea Ona Taialaina A’u e le Agaga Paia?
A o tatou sailia le Agaga Paia, o le a avea o Ia ma se soa faatuatuaina, faamoemoeina, ma pele.
Mai se saunoaga na tuuina atu i le semina mo taitai fou o misiona i le aso 24 o Iuni, 2023.
Ina ua faamauina i tatou o ni tagata o le Ekalesia i le mae’a ai ona papatisoina, sa tatou maua se tusi faamaonia o le papatisoga ma le faamauga. Ae o le a le aoga o lena tusi faamaonia o loo tautau i luga o se puipui pe faapipii ma faailoa i se tusi faapitoa pe afai tatou te lē faaaogaina le meaalofa ua tuuina mai ia i tatou?
E tatau ona tatou saili ma le atamai ma faalagolago i le Agaga Paia.
E Faapefea ona Saili le Agaga
O le sailia o le Agaga Paia e aofia ai le tele o mea nai lo le na o le faamauina o se tagata o le Ekalesia. E taufaavalea le mafaufau faapea ona ua tatou mauaina le meaalofa o le Agaga Paia ma se tusi faamaonia e o faatasi ai, pau lava le mea e tatau ona tatou faia o le fai atu, “Ua lelei. Ua ou sauni. Faaali maia!”
Galuega Faaleagaga
O faatinoga o le tuuto patino faaletagata lava ia, e taua tele i lo tatou sailia o le Agaga Paia. O le galuega faaleagaga o le sailia o le Agaga e aofia ai:
-
Tatalo faatauanau i le Tama ma le faatuatua ia Iesu Keriso. I a tatou tatalo, a o tatou faailoa atu lo tatou agaga faafetai i le Atua, o le a sili atu ona tatou iloaina Lona alofa mutimutivale i o tatou olaga.
-
Suesuega faifai pea ma taula’i o tusitusiga paia. O le taumafa i afioga a Keriso, e pei ona maua i tusitusiga paia, e faaosofia ai faaaliga faaletagata lava ia.
-
Tausiaina o tulafono a le Atua, auā “o le meaalofa o le Agaga Paia o le aiā tatau lea e maua ai le mafutaga faifai pea ma le Agaga Paia a o tatou agavaa.”
-
Agavaa. O lona uiga tatou te taumafai i le mea sili tatou te mafaia e tausia poloaiga a le Atua ma aua le tau fetuuna’i ina ia tauamiotonuina amioga agasala. Pe a tatou tautevateva, tatou te salamo. Afai tatou te le faia, ua tatou faatapulaaina le gafatia o le Agaga Paia e fai mai ai se isi lava mea ia i tatou nai lo le, “E tatau ona e salamo!” E le mafai ona tatou mauaina se isi lava faaaliga seia vagana ai ua tatou salamo.
-
Faamamaluina o feagaiga ua tatou osia ma le Atua. O se tasi o vaega o le faamamaluina o a tatou feagaiga o le saunia lea ma le lotofuatiaifo e auai, ma aai ma feinu ma le agavaa i le faamanatuga i vaiaso taitasi.
Aoao ia Iloa le Agaga
E ui lava i se faavae mautu o le galuega faaleagaga, ae e manaomia pea ona tatou aoao e iloa le siufofoga o le Agaga Paia.
E fesootai le Agaga Paia i auala eseese i tagata eseese i taimi eseese. O le siufofoga o le Agaga Paia e le leotele pe pisapisao ae e vaivai ma filemu, e pei o se musumusu. E mafai ona maofa i le faigofie ma manino. E mafai ona tuia pe mumū. E aafia ai le mafaufau ma le loto. E aumaia ai le filemu, olioli, ma le faamoemoe—ae le o le fefe, atuatuvale, po o le popole. E faamalamalamaina ma manaia, ae le o le fenumiai.
Mo a’u, e tele taimi e oo mai ai faaaliga i ni faatonuga pupuu ma tāua, e pei o le “Alu!,” “Fai!,” po o le “Fai atu!” Pe atonu foi e oo mai o ni manatu, e masani lava ona sau faatasi ma se uunaiga e faatino na manatu. O lena tomai ma le malamalama e mafai ona faailoa atu e aunoa ma ni upu. E seāseā ona oo mai faaaliga faatasi ma ni faamalamalamaga manino o le mafuaaga e tatau ai ona tatou faia se mea.
O le sailia o le Agaga e aofia ai le aveesea o mea faalavefau. Ina ia maua faaaliga patino faaletagata lava ia, e manaomia ona tatou savavali ese mai le pisapisaō faalelalolagi. Tatou te le mauaina faaaliga pe a tatou ita, le fiafia, pe vevesi, to’atama’i pe na o le popole lava foi. Ae, tatou te fatuina se siosiomaga e atiina ae ai lagona ma iloaina le Agaga.
Faalagolago i le Agaga.
O le taimi lava tatou te sailia ai ma faamanuiaina ai i tatou e le Agaga i o tatou olaga, pe ua uma ai ea iina? E leai. O le sini o le faalagolago lea i le Agaga a o tatou faia le galuega a le Faaola.
O le faalagolago i le Agaga o lona uiga moni lava o lo tatou galulue i le faatuatua, ma le faatuatuaina o le a taitai ma taialaina i tatou e le Atua ma o le a faalauteleina e le Agaga Paia a tatou taumafaiga.
O le aoao e faalagolago i le Agaga Paia o lona uiga ua tatou tuuina lo tatou talitonuga ma le faatuatua ia Iesu Keriso. E tatau ona tatou faalagolago i le Agaga nai lo a tatou lava taleni ma tomai. O le a faalauteleina e le Agaga Paia a tatou taumafaiga e sili atu nai lo mea e mafai ona tatou faia na o i tatou lava.
O le galulue i le faatuatua ma tuu lo tatou talitonuga ma le faatuatua ia Iesu Keriso e le faapea ai o le a tatou le lagonaina ai se isi lava mea, pe afai tatou te le lagonaina se uunaiga faamautuina.
E Faapefea Ona Ou Iloa Pe o le Agaga po o Ou Lava Mafaufauga?
O se tasi o fesili e sili ona taatele o le, “E faapefea ona ou iloa pe o lo’u lava manatu pe mai le Agaga Paia?” O se fesili talafeagai lenei. Ae atonu o se fesili e sili atu ona lelei e faia ia i tatou lava o le: “Pe tatau ona ou faatinoina lenei manatu patino?”
Na tuuina mai e le perofeta o Mamona ni fua faatatau e fuafua ai pe tatau ona tatou galulue i se manatu faapitoa: e faalauiloa ai le talitonu i lo tatou Tama Faalelagi ma Iesu Keriso; e faalauiloa ai le alofa ma le auauna atu ia i La’ua; ma e faalauiloa ai le faia o mea lelei. Afai e ausia e le manatu nei fuataga, e afaina moni ea la pe na totoina sao e le Agaga Paia i lena lava taimi pe na tulai mai lena manatu faafetaii aafiaga i se olaga atoa ma faaiuga na faia muamua atu? O le mea moni, e leai.
O le aoao e saili ma faalagolago i le Agaga o se tomai o le olaga, e le na o se auala le tumau e manumalo ai i se misiona po o se faalavelave. A o tatou sailia le Agaga Paia, o le a avea o Ia ma se soa faatuatuaina, faamoemoeina, ma pele.