« Inaha, ’o vau ïa te māramarama tā ’outou e fa’ateitei i ni’a »

E’ita te Fa’aora e mo’e i roto i tō tātou mau tere i te tāhuti nei […] I te mau taime e rave rahi, nā roto i tōna here mo’a ’e tōna aroha, tē pāturu nei ’oia ia tātou a fa’aruru ai tātou i te fifi o te orara’a […]

E ’itehia taua aroha ra ’ia pāturu ana’e tātou i te tahi ’e te tahi i roto i tāna ’ohipa.

E pāturu tātou i tō tātou peropheta ora i te ’āmuira’a rahi, ’e te Peresidenira’a Mātāmua, te pupu nō te Tino ’Ahuru Ma Piti ’āpōsetolo, te huimana fa’atere rahi ’e te feiā fa’atere rahi o te ’Ēkālesia. Te aura’a o te parau pāturu, ’oia ho’i, e fa’ateitei i te tahi atu ta’ata, e hōro’a i tō tātou ara māitera’a ia rātou, ’ia ha’apa’o maita’i i tō rātou ti’aturira’a, ’ia ’ohipa i ni’a i tā rātou mau parau. E paraparau rātou nā roto i te fa’aurura’a a te Fatu ; ’ua ’ite rātou i te mau fifi o teie taime, te topara’a te Sōtaiete i te pae mōrare, ’e te mau tāmatara’a rahi a’e a te ’enemi nō te pato’i i te ’opuara’a a te Metua. Nā roto i te fa’ateiteira’a i tō tātou mau rima, tē hōro’a ra ïa tātou i to tātou turu, ’eiaha nō taua taime noa ra, i roto ato’a rā i tō tātou orara’a i te mau mahana ato’a […]

[…] Tē fa’ateitei nei tātou i te māramarama o te Fatu ’ia ha’apa’o pāpū ana’e tātou i tā tātou mau fafaura’a ’e ’ia turu ana’e tātou i tō tātou peropheta ora ’ia parau ana’e ’oia i te mau parau a te Atua […]

E ’ohipa mo’a te fa’ateiteira’a i te peropheta. ’Eiaha tātou e pārahi māmū noa, e pāruru itoito rā tātou iāna, e pe’e i tāna a’ora’a, e ha’api’i i tāna mau parau, ’e e pure nōna […]

E te mau taea’e ’e te mau tuahine, e ti’a ia tātou ’ia rave rahi a’e i te mau ’ohipa fa’ateitei ’e fa’aiti a’e te amuamu, ma te pāturu rahi a’e i te parau a te Fatu, tōna mau ’ē’a, ’e tāna peropheta […]

[…] ’Ia pāturu ana’e tātou i tō tātou peropheta, tē fa’a’ite pāpū ra ïa tātou ē, ’ua pi’ihia ’oia ’e tō tātou Fa’aora, ’oia « te māramarama o te ao ».