Tuha’a purera’a nō te avatea mahana mā’a
Huna i tā tātou mau mauha’a tama’i nō te ’ōrurehau
Hu’a parau
E nehenehe e ’itehia te ’ōrurehau ma te ha’a ’e ma te ha’a ’ore […]
Pēnei a’e te hōho’a fa’ahema atu ā nō te ’ōrurehau i te Atua, ’o terā paha ma te ha’a ’ore—te tāu’a-’ore-ra’a i tōna hina’aro i roto i tō tātou orara’a. E rave rahi te ta’ata ’o tē ’ore roa e ’ōpua i te ’ōrurehau ma te ha’a, ’e tē pāto’i nei rā paha i te hina’aro ’e i te parau a te Atua nā roto i te haerera’a i tō rātou iho tere ma te hi’o ’ore i te arata’iraa a te Atua […]
Te ’o’e ’e te tahi atu mauha’a tama’i tā te feiā fa’afāriu ’āti Lamana i huna, e mau mauha’a ïa nō te ’ōrurehau nō te huru rātou i fa’a’ohipa ai i te reira. ’Aita roa atu te reira huru mauha’a tama’i i roto i te rima o tā rātou mau tamaiti, tei fa’a’ohipahia nō te pāruru i te ’utuāfare ’e i te ti’amāra’a, i te mauha’a nō te ’ōrurehau i te Atua […]
Nā reira ato’a, e mau mea i roto i tō tātou orara’a, ’aita paha e ’ino ’aore rā e mea maita’i iho, nō te fa’a’ohipa-hape-ra’a rā, riro mai nei ’ei « mauha’a tama’i nō te ’ōrurehau. » […]
Mai te peu tō tātou here i te Atua ’e tō tātou tapitapi ’ore ’ia tāvini iāna ma tō tātou pūai ato’a, tō tātou mana’o ato’a ’e tō tātou itoito, e riro mai ’ei ’ōfa’i hi’opo’a nō tātou nō te hi’o i te mau mea ato’a ’e nō te rave i tā tātou mau fa’aotira’a ato’a, e huna ïa tātou i tā tātou mauha’a tama’i nō te ’ōrurehau. Nā roto i te maita’i rahi o te Mesia, e fa’aore mai te Atua i tā tātou mau hara ’e mau ’ōrurehau nō tahito ra ma te horoi atu i te tāfetafeta o te reira mau hara ’e mau ’ōrurehau i roto i tō tātou ’ā’au […]
E arata’i te hunara’a i te mauha’a tama’i nō te ’ōrurehau i te ’oa’oa hō’ē roa […] ’Ia huna tātou—i te hōhonu roa ’ino—i te mau mea ri’i ato’a nō te ’ōrurehau i te Atua i roto i tō tātou orara’a, ma te mono i te reira i te ’ā’au tae ’e te mana’o tae.