Mānava i roto i te ’ēkālesia nō te ’oa’oa

Maoti te fa’anahora’a here a tō tātou Metua i te ao ra nō tāna mau tamari’i tāta’itahi, ’e maoti te ora ’e te misiōni tāra’ehara a tō tātou Fa’aora Iesu Mesia, e ti’a ia tātou—’e e mea tano ho’i—’ei feiā ’oa’oa roa a’e tātou i ni’a i te fenua nei ! […]

[…] ’E ’aita e vāhi ’ē atu e ’itehia ai te ’oa’oa o tō tātou feiā maori rā i te taime ’a putuputu ’āmui ai tātou i te Sābati tāta’itahi i roto i tā tātou mau purera’a ’ōro’a nō te ha’amori i te puna nō te ’oa’oa ato’a ! […]

Te mana’o tura ’e te ’oa’oa ? E ui paha ’outou : « E ’ohipa mau ānei terā ? ». ’Oia mau ïa ! E here rahi roa tātou, e fa’ahanahana ’e e fa’atura ho’i i tō tātou Atua, ’e nō roto mai tō tātou mana’o tura i te hō’ē vairua e ’oa’oa i te here, i te aroha ’e i te fa’a’orara’a a te Mesia, e mani’i mai ai ! […]

Mai te peu tē putuputu nei tātou nō te ha’amana’o i te Fa’aora ’e te tāra’ehara tāna i fa’ati’a, e mea tano ’ia fa’aho’a tō tātou mata i tō tātou ’oa’oa ’e te māuruuru ! […]

[…] ’Ua pāpa’ihia i roto i te pāpa’ira’a mo’a ē, « ’ua riro te hīmene a te feiā parauti’a ’ei pure [i te Atua] » [Te Ha’api’ira’a Tumu ’e te mau Fafaura’a 25:12], ’o tāna e au roa nei. Nō reira, e hīmene ana’e ! ’E ’ārue ana’e iāna !

E fa’atumu tātou i tā tātou mau a’ora’a ’e mau ’itera’a pāpū i ni’a i te Metua i te ao ra ’e ia Iesu Mesia ’e i te mau hotu nō te orara’a ma te ha’eha’a i tā rāua ’evanelia, e hotu « tei hau tōna monamona i tō te mau mea monamona ato’a ra » [Alama 32:42] […]

[…] I te taime nō te ’ōro’a, e roimata nō te māuiui ānei ’aore rā e roimata nō te māuruuru, ’ia mani’i ïa te reira nō te māere au i te parau ’āpī maita’i nō te hōro’a a te Metua i tāna Tamaiti ! […]

[…] E tītaura’a manihini teie ’ia fa’ari’i i te hōro’a nō te hau ’e nō te māramarama ’e nō te ’oa’oa a te Fa’aora—’ia hope te au, ’ia fa’ahiahia i te reira ’e ’ia fa’a’oa’oa i te reira i te mau Sābati ato’a […]

Mānava i roto i te ’ēkālesia nō te ’oa’oa !