Fa’a’amu i te mau a’a, e tupu mai te mau ’āma’a

Te hō’ē o te mau mea faufa’a roa a’e tā tātou e nehenehe e ’apo mai i roto i teie orara’a maori rā, te ta’a-’ē-ra’a i rotopū i te mea mure ’ore ’e te mea e ’ere i te mea mure ore […]

[…] E mea faufa’a roa te tahi mau parau mau i ni’a i te niu ’o tō tātou fa’aro’o. E mau hu’ahu’a ’aore rā e mau ’āma’a te tahi atu mau mea—e mea faufa’a, ’ia ta’a’ihia rā rātou i te mau mea tumu […]

E nehenehe e parau ē, ’o Iesu Mesia ’e tōna tusia tāra’ehara, ’o te a’a ïa ’o tō tātou ’itera’a pāpū. Te tahi atu mau mea ra, e mau ’āma’a ïa […]

Nō te fa’a’amu i tō tātou ’itera’a pāpū no Iesu Mesia, tē uiui nei au ē, i te tahi mau taime, ’aita ānei tātou e hape ra i te mau ’āma’a ’ei mau a’a […]

E ti’a ia tātou ’ia ui ia tātou iho : ’Ua niuhia ānei tō’u ’itera’a pāpū i ni’a i te mea ’o tā’u e hina’aro e tupu mai i roto i tō’u orara’a ? Tei te huru ānei o te mau ’ohipa ’aore rā te mau huru o vetahi ’ē ? ’Aore rā ’ua niu-pāpū-hia ānei te reira i ni’a ia Iesu Mesia, « ’ia a’ahia ’e niuhia i roto iāna » [Kolosa 2:7], noa atu te mau tauira’a o te orara’a nei ? […]

’Eiaha e mana’o ē, e ta’a tātou i te mau mea ato’a hou a rave ai tātou i te hō’ē ’ohipa. E ’ere te reira te fa’aro’o […] Mai te mea ē, e tīa’i tātou ’ia rave i te ’ohipa e tae roa atu i te taime ’ua pāhonohia mai tā tātou mau uira’a ato’a, e tā’ōti’a rahi ïa tātou i te maita’i tā tātou e nehenehe e rave, ’e e tā’ōti’a ïa tātou i te mana o tō tātou fa’aro’o […]

E fa’a’oroma’i te fa’aro’o i te mau tāmatara’a ’e te mau mea pāpū ’ore o te orara’a nō te mea ’ua a’a-pāpū-hia te reira i ni’a i te Mesia ’e tāna ha’api’ira’a tumu. ’O Iesu Mesia ’e tō tātou Metua i te Ao ra tei tono mai iāna, ’ua riro ïa rāua ’ei tumu hō’ē roa ’e te ti’aturi pāpū i tō tātou ti’aturira’a […]

’Ia tāmau noa tātou i te fa’a’amu i te mau a’a o tō tātou fa’aro’o i te Fa’aora, i tāna ha’api’ira’a tumu, ’e i roto i tāna ’Ēkālesia, ’o tā’u ïa pure ’e tā’u ha’amaita’ira’a.