’Aita i rahi te mau matahiti i muri iho

E ’ere ā ïa te Buka a Moromona i te pāpa’a ’ā’amu ’o tē fāriu i muta’a ra. ’Aita, e hi’o teie ma’a pāpa’ira’a mo’a i te ananahi ’e tei roto te mau parau tumu faufa’a rahi, te mau fa’aarara’a ’e te mau ha’api’ira’a faufa’a rahi tei ferurihia nō te vaira’a ’e te mau fifi o tō tātou nei tau. Nō reira, te Buka a Moromona, e buka ïa nō ni’a i tō tātou ananahi ’e te mau mahana tā tātou e ora nei ’e ’o tā tātou e ora atu […]

Tē tāparu nei te reo nō tahito ra mai raro mai i te repo ia tātou ’ia ’apo mai i teie ha’api’ira’a mure ’ore ē : ’ua riro te manuiara’a, te tao’a rahi ’e te fāna’ora’a ’ei ’āno’ira’a pūai ’o tē nehenehe e arata’i roa i tei parauti’a ’ia inu i te rā’au ta’ero pae vārua nō te te’ote’o […]

[…] Tītau-roa-hia ’ia vai ara noa tātou i te mana’o fa’a’ū’ana a te te’ote’o i tō tātou iho faufa’a rahi, i te hi’ora’a hape i tō tātou iho rava’ira’a ’e i te ’imira’a ’ia ha’apa’o noa ia tātou iho ’eiaha rā e tāvini ia vetahi ’ē […]

Teie tō’u mana’o, mai te peu tē ti’aturi nei ’outou ’e ’o vau ē ’ua nava’i tō tātou pūai ’e te pāutuutu nō te ’ape i te ahaaha o te te’ote’o, pēnei a’e ïa ’ua ro’o-a’ena-hia tātou i teie ma’i mate pae vārua […]

Mai te mea rā tē ti’aturi nei tātou e nehenehe tātou e ro’ohia ’e e fa’ahepohia e te te’ote’o, e rave tāmau ïa tātou i te mau mea iti ’e te ’ōhie ’o tē pāruru ’e ’o tē tauturu ia tātou ’ia riro mai « te hō’ē tamari’i ra i te auraro, te marū, te ha’eha’a, te fa’a’oroma’i, te ’ī i te aroha, te hina’aro ’ia auraro i te mau mea ato’a tā te Fatu e hina’aro ’ia tu’u mai i ni’a [ia tātou] » [Mosia 3:19].

[…] ’Ia ’imi tātou ’e ’ia feruri ho’i i [te Buka a Moromona], e ha’amaita’ihia tātou i te mata e hi’o ’e te tari’a e fa’aro’o ’e te ferurira’a e hāro’aro’a ’e te ’ā’au e māramarama i te mau ha’api’ira’a e mea tano ia tātou ’ia ’apo mai nō te « ara […] i te te’ote’o ’o te ō atu ho’i [tātou] i roto i te fa’ahemara’a » [Te Ha’api’ira’a Tumu ’e te mau Fafaura’a 23:1].