E mea ’ōhie roa te ha’api’ira’a tumu a Iesu Mesia

Te parau a te Atua ’o te ha’api’ira’a tumu ïa tei ha’api’ihia e Iesu Mesia ’e tāna ato’a mau peropheta […]

[…] Teie ha’api’ira’a tumu, ’oia te fa’aro’o i te Fatu Iesu Mesia, te tātarahapa, te bāpetizora’a, te fāri’ira’a i te Vārua Maita’i, ’e te tāpe’a-māite-ra’a ē tae noa atu i te hope’a, e ha’amaita’i te reira i te mau tamari’i pā’āto’a a te Atua.

’Ia ha’api’i ana’e tātou i teie mau tumu parau ia rātou tā tātou e here nei, e tauturu mai te Vārua Maita’i ia tātou ’ia ’ite i te parau mau. Nō te mea ho’i ē e hina’aro tātou i te mau fa’aurura’a a te Vārua Maita’i, e ti’a ïa ia tātou ’ia ara maita’i ’e ’ia ha’apa’o maita’i ’ia ’ore tātou e ha’api’i i te tahi mea ta’a ’ē atu i te ha’api’ira’a tumu mau.

[…] Te hō’ē o te mau rāve’a pāpū roa a’e nō te ’ape i te piri atu i te ha’api’ira’a tumu hape ’o te mā’itira’a ïa ’ia ha’api’i ’ōhie noa i roto i tā tātou huru ha’api’ira’a […]

Nā te ha’api’ira’a ’ōhie e tauturu ia tātou ’ia fa’a’ite i te ha’api’ira’a tumu o te fa’aorara’a i te ’āpī-roa-ra’a ra, ’a pāruru-noa-hia ai te mau tamari’i i te mau fa’ahemara’a a te ta’ata ha’avare ’o tā rātou ho’i e fa’aruru atu i muri mai, hou roa te mau parau mau e tītauhia ia rātou ’ia ’ite, e mo’e atu ai i roto i te mau rāve’a ha’apararera’a parau, te mau hoa, ’e tō rātou iho mau ’arora’a […]

Noa atu ē, e ’imi tātou i te mau rāve’a maita’i ato’a nō te ha’api’i ia rātou tā tātou e here nei i te ha’api’ira’a tumu a Iesu Mesia, e nehenehe ā te tahi pae e ’ore e pāhono mai. E tupu mai paha te mau mana’o fē’a’a i roto i tō ’outou ferurira’a […] ’Eiaha e fati i roto i te reira mau mana’o tapitapi. ’A fāriu atu i te Atua ra nō te ani i te tauturu […]

[…] E riro mai ’outou ’ei ta’ata itoito ’e te fa’a’oroma’i. ’E i muri iho, e nehenehe ’outou e ’ite ē, ’ua rave ’outou i te mau mea ato’a tā ’outou e nehenehe e rave nō te tauturu i te feiā tā ’outou e here nei ’e te feiā tā ’outou e pure nei ’ia ’ape i te mau tāmatara’a a Sātane nō te fa’a’ino ia rātou.