Миагийн Ариун долоо хоног

Аав, ээж хоёр минь судраас Далдуу модны ням гаргийн түүхийг уншиж өгсөн. Есүс Христийг Иерусалимд орж ирэхэд хүмүүс далдуу модны мөчрөөр даллан “Хосанна!” хэмээн хашхирцгаажээ.

Миний эмэгтэй дүү Люси илжиг унаж яваа Есүсийн зургийг гартаа барьж, бусад нь цаасан мөчрүүдээрээ даллав. Би Есүсийг угтан мэндчилж байна хэмээн төсөөлөхөд сэтгэл минь баяраар дүүрэв.

Хүмүүс ариун сүмд юм зарж байгаад Есүс бухимдаж, тэднийг хөөж гаргасан юм. Бид сүмийн эргэн тойрон дахь бутнуудын хог хаягдлыг түүлээ. Бид Бурханы өргөөг арчилж тордоход тусалж чадсанд би баяртай байна!

Ээж Есүс Христийн хүмүүст ярьсан түүхүүдийг уншиж өгсөн. Бид сонсоод, түүхүүдэд гарсан зүйлсийг баримлын шавраар хийв. Есүс бол Сайн Хоньчин учраас Люси хонь хийв. Би жижиг тосон дэнлүү хийлээ. Энэ нь зүрх сэтгэлээ итгэлээр дүүрэн байлгах ёстойг санахад минь надад тусалсан.

Аав бидэнд Мариа Есүс Христийн хөлд онцгой тос түрхэж өгсөн тухай ярилаа. Тосны үнэр байшинг бүхэлд нь дүүргэжээ.

Бидэнд ийм онцгой тос байгаагүй. Үүний оронд бид синамон ашиглан амттан хийлээ. Амттаныг жигнэх зуур гарч буй синамоны үнэрийг үнэртэнгээ Есүст бид юу өгч чадахаа бодох хэрэгтэй гэж ээж хэлсэн.

Есүс Христ, Түүний шавь нар Сүүлчийн зоогийн үеэр дуулсан шиг бид лаа асаагаад, дуу дууллаа. Бид анхны ариун ёслолыг дурсан санахын тулд пита талх идэж, усан үзмийн шүүс ууцгаав. Бидэнд Есүсийн асгаруулсан цусыг сануулж анар жимс, Гетсеманийн цэцэрлэгийн тулд чидун жимс байлаа.

Биднийг хооллож байх зуур гадаа аянга цахилгаан нүргэлэв. Есүс хамгийн харанхуй шуургатай аль хэдийн нүүр тулж байсан гэдгийг мэдээд би аюулгүй байгаагаа мэдэрч талархалтай байсан.

Есүс Христ хэрхэн бидний төлөө амиа өгсөн тухай бид уншсан. Дараа нь бид хоосон цэцгийн савыг цэцэрлэг рүү аваачиж, булш шиг хажуу тийш нь хэвтүүлэв. Бид эргэн тойронд нь хөрс шороо, чулуу тавьсан ч амыг нь онгорхой үлдээв. Ээж бидэнд Есүсийн биеийг төлөөлөх нэгэн дүрс өгөв. Бид үүнийг хүндэтгэлтэйгээр цагаан даавуунд ороож, цэцгийн саванд хийв.

Хэдийгээр энэ зүгээр л нэг цэцгийн сав байсан ч амыг нь чулуугаар таглаж байхдаа би гунигтай байлаа.

Есүс Христ нас барсныхаа дараа сүнсний дэлхийд номлолын ажлыг эхлүүлсэн гэж ээж минь хэлсэн. Ингэснээр дэлхийд байхдаа Түүний сайн мэдээнд суралцаагүй хүмүүс ч Түүний тухай суралцах боломжтой болжээ. Ариун сүмүүдэд бид нас барахаасаа өмнө баптисм хүртээгүй хүмүүсийн төлөө баптисм хүртэх боломжтой.

Люси, бид хоёр ариун сүмд орох насанд хүрээгүй ч хэвлэсэн нэрийн хуудсуудыг хайчилж бэлдэхэд тусалсан. Аав, ээж хоёр нэрийн хуудсан дээрх хүмүүсийн төлөө ариун сүмийн ажлыг ээлжлэн хийж, бидэнтэй хамт ариун сүмийн талбайгаар алхдаг байв. Гаднаас нь харахад л ариун сүм диваажин шиг санагдсан.

Христийн амилсны баярын өглөө цэцгийн савны аман дээр байрлуулсан чулуу байхгүй болж, даавуу хоосон үлдсэн байлаа. Тэнд Тэр амилсан! гэсэн бичигтэй ил захидал байв.

Есүс Христ бол Христийн амилсны баярын шалтгаан юм гэдгийг би аль хэдийн мэддэг байсан. Ариун долоо хоногийг тэмдэглэсний дараа би Түүнийг арай илүү сайн мэддэг болсон юм шиг санагдаж байна.