Ko Noa pea mo e ʻAʻaké

Tā fakatātaaʻi ʻo Noa mo hono fāmilí ʻi hono tokangaʻi ʻo e fanga sipí

Na‘e talangofua ʻa Noa mo hono fāmilí ki he ‘Eikí. Na‘e faiangahala ʻaupito ‘a e toenga ʻo e kakaí kotoa. Na‘e folofola ʻa e ‘Eikí kia Noa ‘e ʻufiʻufi ʻe ha lōmaki ‘a e māmaní kapau he ‘ikai fakatomala ʻa e kakaí.

Na‘e talaange ‘e Noa ki he kakaí, naʻe ‘ofeina kinautolu ʻe he ‘Eikí pea naʻá Ne finangalo ke nau fakatomala pea tui kia Sīsū Kalaisi. Naʻe ʻikai ke nau fie fanongo.

Ko e faʻu ʻe Noa mo hono fāmilí ʻa e ʻaʻaké

Naʻe folofola ʻa e ʻOtuá kia Noa ke ne foʻu ha vaka lahi ne ui ko ha ʻaʻake. ʻE maluʻi ʻe he ʻaʻaké ʻa e fāmili ʻo Noá he lolotonga ʻa e lōmakí.

Ko e lue ʻa e fanga monumanú ki loto ki he ʻaʻaké

Na‘e ʻomi ‘e he fāmili ʻo Noá ‘a e meʻakai ki he ‘aʻaké. Naʻe fekauʻi mai ʻe he ʻEikí ha monumanu ʻe ua mei he faʻahinga kotoa pē kia Noa ke ne fakahū ki he lotoʻaʻaké. Naʻe kamata leva ke ʻuha.

Naʻe ʻuha ʻi ha ʻaho ʻe 40 mo e pō ʻe 40. Naʻe ʻufiʻufi ʻe ha lōmaki ʻa e māmaní, ʻo hangē pē ko e fakatokanga ʻa e ʻEikí.

Ko Noa mo hono fāmilí ʻi loto ʻi he ʻaʻaké

Na‘e tētē malu ʻa e fāmili ʻo Noá mo e fanga monumanu kotoa pē ‘i he ʻa‘aké he fukahi vaí.

Ko e tuʻu ʻa e fāmili ʻo Noá mo e fanga monumanú ʻi he fonuá ʻo sio ki ha ʻumata

‘I he ʻosi ‘a e lōmakí, naʻe hake ʻa e ʻa‘aké ʻi he kelekele mōmoá. Naʻe fakamālō ʻa Noa mo hono fāmilí ki he ʻEikí ʻi hono maluʻi kinautolú. Na‘e palōmesi ‘a e ʻEikí he ‘ikai ke toe lōmakiʻi ʻa e māmaní. Na‘á Ne tuku mai ha ‘umata ko ha fakamanatu ʻo ‘Ene palōmesí.