“Sākalamēniti ʻi Sahalá,” Ko e Kaumeʻá, Fēpueli 2026, 20–21.
Sākalamēniti ʻi Sahalá
ʻI he kei siʻi ʻa ʻIsapelá, naʻe ngāue fakakautau ʻene tangataʻeikí ʻi he vaʻa fakakautau Falaniseé. Naʻe lahi ʻa e hiki holo hono fāmilí. ʻI hono taʻu valú, naʻa nau hiki ki he Toafa Sahalá. Naʻe ʻikai toe ʻi ai ha kāingalotu ʻo e Siasí ʻe ofi mai, ko ia naʻa nau maʻu ha ngofua ke maʻu ʻa e sākalamēnití ʻi honau ʻapí.
ʻI he Sāpate kotoa pē, naʻe fakataha mai ʻa ʻIsapela mo hono fāmilí ki he loto falé ʻo hivaʻi ha ngaahi himi naʻa nau ako maʻuloto. Naʻe tāpuakiʻi ʻe heʻene tamaí ʻa e maá mo e vaí ki he sākalamēnití. Naʻe taufetongi leva ʻene ongomātuʻá mo e ngaahi tokouá mo e tuongaʻané ʻi he malangá.
Naʻe fakahā ʻe he meʻá ni kia ʻIsapela hono mahuʻinga ke moʻui ʻaki ʻa e ongoongoleleí. Koeʻuhí naʻa nau nofo mamaʻo mei he kāingalotu kehe ʻo e Siasí, he ʻikai ʻiloʻi mai ʻe ha taha ia kapau he ʻikai ke nau toe lotu ʻi ʻapi ʻi he Sāpaté. Ka naʻa nau fili ke fai ʻa e meʻa ʻoku totonú.
Hili ha taʻu ʻe ua mei ai, naʻa nau hiki ki Falanisē, ʻa ia naʻe tokolahi ange ai ʻa e kāingalotu ʻo e Siasí. Naʻe lava ʻa ʻIsapela ʻo papitaiso. Naʻe tokoni ʻene mamata ki hono moʻui ʻaki ʻe heʻene ongomātuʻá ʻa e ongoongoleleí ʻi he Toafa Sahalá ke tupulaki ai ʻene fakamoʻoní. Naʻá ne maʻu ai ʻene tui ki he ʻOtuá ke ne fai ʻa e meʻa ʻoku totonú, naʻa mo e taimi naʻe ʻikai sio mai ai ha tahá.
ʻOku mau palōmesi atu neongo pe ko e fē feituʻu ʻokú ke nofo ai ʻi he māmaní, ʻoku ʻafioʻi koe ʻe he Tamai Hēvaní! ʻOkú Ne ʻofa ʻiate koe mo finangalo ke tokoniʻi koe ke ke hoko ʻo hangē ange ko Iá.
Ongoʻi Taʻeʻiloa ʻi ha Fuʻu Toafa Lahi
Ko e Toafa Sahalá ko e toafa vela lahi taha ia ʻi he māmaní! ʻE lava pē ke faingofua ke te ongoʻi taʻeʻiloa ʻi ha feituʻu lahi. Ka ʻoku ʻikai teitei ngalo kitautolu ʻi he ʻOtuá pea ʻe lava ke ʻiate kitautolu maʻu ai pē. Te ke lava ʻo kumi ʻa e ngaahi ʻata ʻi ʻolungá ʻi he fakatātaá?
Ngaahi tā fakatātā ʻa Katie Kear