Ko e Muimui kia Sīsū ʻi Sileí

ʻOku muimui ʻa Sanitiako kia Sīsū Kalaisi ʻaki hono fakakau mai ʻa e niʻihi kehé. Naʻe ʻi ai ha taha ʻi hono kaungāakó naʻe ʻikai ko ha tokotaha lele oma pea naʻe faʻa tuku ia ki tuʻa mei he ngaahi timi ʻakapulú. Naʻe kamata fakaafeʻi ia ʻe Sanitiako ke vaʻinga ʻi heʻene timí! ʻOkú ne pehē, “ʻOku ou ongoʻi lelei koeʻuhí naʻá ku muimui ki he sīpinga ʻa Sīsuú.”

ʻOku muimui foki ʻa Sanitiako ki he Fakamoʻuí ʻaki ʻene lotu. ʻI he taimi naʻe fasi ai ʻa e nima ʻo Sanitiakó, naʻá ne ongoʻi ilifia. Naʻe talaange ʻe heʻene faʻeé ke lotu ki he Tamai Hēvaní ke maʻu ha fakafiemālie. ʻOkú ne pehē, “Naʻe tokoni ia ke u maʻu ha nonga.”

Taʻu:7

Mei he: Vāhenga Valapalaisó, Silei

Lea Fakafonuá: Faka-Sipeini

Taumuʻá: 1)Hoko ko ha tokotaha vaʻinga ʻakapulu. 2) Ngāue fakafaifekau.

Ngaahi Meʻa ʻOku Manako Aí: Kakaú, vaʻinga ʻakapulú mo e pasiketipoló, mo e ako sipoti foʻoú

Fāmilí: Sanitako, Mami, Teti, mo ha ongo tuofāfine

Talanoa fekauʻaki mo Sīsuú: Luke 2 koeʻuhí ʻokú ne akoʻi ʻa e founga naʻe ʻaloʻi ai ʻa Sīsū ʻi he ʻaiʻangakai ʻo e manú pea mo ʻEne loto-fakatōkilaló

ʻAho Mālōloó: Kilisimasí, he ko e ʻaho fāʻeleʻi ia ʻo Sīsū Kalaisí pea ʻoku faʻa fakataha ai ʻa e fāmilí kotoa

Meʻakaí: Humita (efuefuʻi koane ʻoku kofu ʻaki ʻa e kiliʻi koané pea haka mao) mo e salati Sileí (temata mo e onioni)